Mer Vilni inicyjuje zbor podpisaŭ za ŭzmacnieńnie imihracyjnaj palityki
Prapanujecca ŭvieści patrabavańnie, pavodle jakoha dla padaŭžeńnia časovaha dazvołu na žycharstva ŭ Litvie paśla troch hadoŭ zamiežnik pavinien mieć dakumient, jaki paćviardžaje viedańnie litoŭskaj movy nie nižej za ŭzrovień A2.
Mer Vilni Vałdas Biankunskas z paniadziełka płanuje pačać zbor podpisaŭ z metaj umacavańnia imihracyjnaj palityki, piša Delfi.lt.
«Meta zboru podpisaŭ — prapanavać papraŭki da zakonaŭ, jakija praduhledžvajuć, što hramadzianie krain, jakija nie ŭvachodziać u Jeŭrapiejski sajuz, što chočuć pražyvać u Litvie bolš za try hady, pavinny viedać litoŭskuju movu jak minimum na ŭzroŭni A2.
Zaraz takoha patrabavańnia dla tych, chto maje časovy dazvoł na žycharstva i žyvie daŭžej, niama, tamu adsutničajuć realnyja stymuły vyvučać movu, chacia heta źjaŭlajecca bazavaj umovaj dla paśpiachovaj intehracyi», — havorycca ŭ paviedamleńni.
Pavodle słoŭ mera stalicy, paśla taho jak Vilenskaja haradskaja rada pryniała płan dziejańniaŭ u hetaj halinie, horad pačynaje realizoŭvać praduhledžanyja miery. Biankunskas adznačaje, što vyvučeńnie litoŭskaj movy źjaŭlajecca pryjarytetnaj častkaj płana i nieabchodnaj umovaj žyćcia ŭ horadzie. Heta stvoryć umovy dla zamiežnikaŭ, jakija pasialilisia ŭ Vilni, kab jany mahli vyvučać dziaržaŭnuju movu najbolš zručnym sposabam — ad samastojnaha navučańnia i niefarmalnych zaniatkaŭ da akademičnych kursaŭ.
«My možam prapanavać najlepšyja moŭnyja kursy, ale biez vyraznaha jurydyčnaha patrabavańnia ŭ nas nie budzie doŭhich čerhaŭ achvočych vučycca. Ja ŭžo źviartaŭsia da ministra pa hetym pytańni, ale nie atrymaŭ kanstruktyŭnaha adkazu. Mahčyma, kiraŭnictvu ministra nie chapaje padtrymki z boku hramadstva, tamu ja pačynaju mabilizacyju hramadzian — źbirajučy podpisy, my zabiaśpiečym ministru bolšy mandat. My prapanujem uvieści patrabavańnie, pavodle jakoha dla padaŭžeńnia časovaha dazvołu na žycharstva ŭ Litvie paśla troch hadoŭ zamiežnik pavinien mieć dakumient, jaki paćviardžaje viedańnie litoŭskaj movy nie nižej za ŭzrovień A2. I kožny podpis pad pietycyjaj, ja spadziajusia, stanie važnym palityčnym sihnałam ab nieabchodnaści pierahladu dziejnaha rehulavańnia», — padkreślivaje mer.
Paviedamlajecca, što na praciahu maja ŭ roznych miescach Vilni budzie arhanizavany zbor podpisaŭ. Jon budzie pravodzicca jak asabista, tak i anłajn praz płatformu Peticijos.lt.
Paśla pryniaćcia Vilenskaj haradskoj radaj płana dziejańniaŭ intehracyi žycharoŭ zamiežnaha pachodžańnia stalica pačynaje jaho realizacyju. Adznačajecca, što vyvučeńnie litoŭskaj movy źjaŭlajecca pryjarytetam płana i nieabchodnaj umovaj paśpiachovaha žyćcia ŭ horadzie. Na hetuju i inšyja formy dapamohi zamiežnikam płanujecca vydać 4,3 młn jeŭra.
U stalicy Litvy pražyvaje 76 tysiač zamiežnikaŭ, heta značyć kožny dziasiaty žychar nie źjaŭlajecca hramadzianinam Litvy. Pavodle daśledavańniaŭ centra International House Vilnius i inšych arhanizacyj, prykładna treć zamiežnych žycharoŭ stalicy zusim nie razmaŭlajuć pa-litoŭsku.
Piać dzion, 60 udzielnikaŭ, saŭna, biljard i kryki adzin na adnaho. Raskazvajem, jak prajšła zakrytaja «hulnia Mackieviča»42
Kamientary