Lidarka ŭltrapravaj «Alternatyvy dla Hiermanii» paabiacała adnavić impart nafty i hazu z Rasii ŭ vypadku pieramohi na vybarach
U intervju Reuters Alisa Vajdel zajaviła, što Hiermanija pavinna admovicca ad embarha na impart rasijskich nafty i hazu, kab padtrymać ekanomiku krainy, jakaja asłabła.
Pavodle jaje słoŭ, «Alternatyva dla Hiermanii» raźličvaje ŭ najbližejšyja miesiacy pieramahčy na vybarach u dźviuch fiederalnych ziemlach. U partyi spadziajucca, što heta stanie važnym krokam na šlachu da pieramohi na ahulnanacyjanalnych vybarach, jakija pavinny adbycca nie paźniej za 2029 hod. Vajdel raźličvaje zaniać pasadu kanclera FRH «na hetych vybarach abo na nastupnych».
«Tannaja enierhija z Rasii była sakretam pośpiechu brenda «Zroblena ŭ Hiermanii». Nam treba jaje viarnuć», — zajaviła Vajdel, ihnarujučy toj fakt, što ekanamičny pośpiech Hiermanii byŭ zakładzieny jašče paśla Druhoj suśvietnaj vajny, kali nijakich pastavak enierharesursaŭ z SSSR nie isnavała. Akramia taho, jon tłumačycca śpiecyjalizacyjaj na vytvorčaści vysokatechnałahičnaj pradukcyi, aktyŭnymi daśledavańniami i raspracoŭkami, a taksama inšymi faktarami, jakija nie źviazanyja niepasredna z enierharesursami, piša Moscow Times.
Ekanamičnaja stahnacyja ŭ Hiermanii pačałasia jašče ŭ 2019 hodzie, chacia strata tannych rasijskich enierharesursaŭ praz try hady naniesła joj dadatkovy ŭdar. Pavodle Vajdel, heta adkinuła krainu na niekalki hadoŭ nazad.
«Byli stračanyja sotni tysiač pracoŭnych miescaŭ. Heta zrabiła nas zaležnymi ad Złučanych Štataŭ, jakija pradajuć nam enierharesursy pa značna vyšejšych cenach», — zajaviła jana.
Kreml aktyŭna padtrymlivaŭ «Alternatyvu dla Hiermanii» jašče da pačatku vajny suprać Ukrainy i zachoŭvaje z partyjaj kantakty. Na pačatku červienia deputat Bundestaha ad «AdH» Markus Fronmajer naviedaŭ Pieciarburhski mižnarodny ekanamičny forum.
Na sustrečy sa staršynioj praŭleńnia «Hazprama» Alaksiejem Mileram jon abmierkavaŭ mahčymaść adnaŭleńnia pracy hazapravodaŭ «Paŭnočny patok».
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud25
Kamientary
Kali łaska nie vydalać kamientar, pravy nie parušajucca.