Litoŭskija pamiežniki znajšli kala miažy ź Biełaruśsiu padziemny tunel, jaki kapali ź biełaruskaj terytoryi ŭ bok Litvy. Znachodku zrabili ŭ Aranskim rajonie kala vioski Pieściuki (Piesčiai), paviedamlaje Delfi.lt.
Pavodle infarmacyi Słužby achovy dziaržaŭnaj miažy Litvy, u sieradu ranicaj pamiežniki z dapamohaj śpiecyjalnych techničnych srodkaŭ, jakija fiksujuć padziemnyja vahańni, vyjavili padazronuju padziemnuju strukturu. Paśla hetaha da apieracyi dałučyli polskich kalehaŭ, jakija pryvieźli śpiecyjalnaje abstalavańnie dla pošuku tunelaŭ.
Padčas pravierki było vyznačana miesca, dzie vioŭsia padziemny prachod. Pamiežniki zrabili adtulinu i paćvierdzili, što ź biełaruskaj terytoryi ŭ bok Litvy sapraŭdy prakładaŭsia tunel.
Paźniej z dapamohaj ekskavatara prachod raskryli. Na hłybini kala paŭtara mietra byŭ znojdzieny tunel dyjamietram prykładna adzin mietr. Jon išoŭ z terytoryi Biełarusi, prykładna za piać mietraŭ ad linii dziaržaŭnaj miažy, u napramku Litvy.
Adnak tunel jašče nie byŭ zavieršany: vychad na litoŭskuju terytoryju nie byŭ prakapany, tamu nielehalnyja mihranty abo inšyja asoby nie paśpieli im skarystacca.
Pa fakcie vyjaŭleńnia tunela pačata rasśledavańnie. Paśla praviadzieńnia nieabchodnych śledčych i pracesualnych dziejańniaŭ jon byŭ zasypany.
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary