Інстаграмнае возера на мяжы Швейцарыі і Францыі праз працяглую спёку амаль высахла ФОТА
Папулярнае сярод турыстаў возера Лак-дэ-Брэнэ, якое знаходзіцца на мяжы Швейцарыі і Францыі, амаль цалкам страціла ваду пасля некалькіх месяцаў засухі і трох хваляў экстрэмальнай спёкі, што ахапілі Еўропу, піша выданне Independent.
Звычайна летам сюды прыязджаюць тысячы адпачывальнікаў, каб купацца, катацца на каноэ, адпачываць у кемпінгах і падарожнічаць на турыстычных суднах. Аднак цяпер суднаходства практычна спынілася.
Асноўнай прычынай стала рэзкае зніжэнне ўзроўню вады ў рацэ Ду, якая сілкуе возера. У выніку дзясяткі лодак і катараў апынуліся на аголеным глейкім дне. Паводле ўладальніка адной з турыстычных кампаній, яму ўжо давялося скараціць частку супрацоўнікаў, бо сезон фактычна сарваны. Узровень вады цяпер больш чым на дзевяць метраў ніжэйшы за норму і працягвае паніжацца прыкладна на 22 сантыметры за дзень.
Паводле звестак швейцарскай метэаслужбы, з красавіка ў гэтым рэгіёне выпала толькі каля паловы звычайнай колькасці ападкаў. Па маштабах цяперашняя засуха ўжо параўноўваецца з найбольш цяжкімі перыядамі 1976, 2003 і 2018 гадоў. Сіноптыкі таксама не чакаюць істотных дажджоў як мінімум да сярэдзіны жніўня.
Мясцовыя жыхары адзначаюць, што падобныя засухі адбываюцца ўсё часцей. Вада, якая яшчэ засталася ў возеры, набыла бураватае адценне і ператварылася ў вузкую паласу, дзе пакуль яшчэ трымаюцца рыба і некалькі лебедзяў. Амаль цалкам высах і вядомы вадаспад Со-дзю-Ду, які жывіцца вадой гэтага возера.
Жыхары рэгіёна кажуць, што ў звычайныя гады гэта месца выглядае казачна, таму сённяшняя карціна выклікае ў іх вялікі сум.
Праблемы з засухай назіраюцца і ў іншых частках Еўропы. Напрыклад, Дунай таксама моцна абмялеў. Асабліва цяжкая сітуацыя склалася ў Венгрыі, дзе рака настолькі страціла ваду, што круізныя цеплаходы пачалі сядаць на мель. З-пад вады паказаліся скалы, пясчаныя водмелі і нават затанулыя судны, якія раней былі схаваныя.
Зірніце, як змялела Піна сёлета ВІДЭА
У Венгрыі і Румыніі з-за спёкі і абмялення Дуная спынілі атамныя рэактары
На Зямлі зафіксавалі самую нізкую тэмпературу за апошнія 14 гадоў
У Грэцыі лясныя пажары ахапілі ваколіцы Афінаў
Дождж, народжаны агнём. Што такое вогненная хмара і як яна робіць пажары яшчэ больш разбуральнымі
Каментары
Заходняя Еўропа бліжэй да Афрыкі, вось хвалі спёкі і больш моцныя і частыя.
Ніякая бравада гэта не зменіць.