Polski płyviec upieršyniu ŭ historyi pierapłyŭ Bałtyjskaje mora. U vadzie jon pravioŭ amal 55 hadzin
Polski płyviec Bartałamiej Kubkoŭski ŭvajšoŭ u historyju, staŭšy pieršym čałaviekam, jaki pieraadoleŭ maršrut praz Bałtyjskaje mora ŭpłaŭ sa Šviecyi ŭ Polšču, piša eurosport.tvn24.pl.
Paśla bolš čym 160 kiłamietraŭ baraćby z marskimi ŭmovami, stomlenaściu i ŭłasnymi fizičnymi miežami Kubkoŭski dapłyŭ ad šviedskaha pasiołka Kasebierha da polskaha ŭźbiarežža ŭ horadzie Dziŭnaŭ. Usia dystancyja zaniała ŭ jaho niapoŭnyja 55 hadzin.
Płyviec startavaŭ u piatnicu, 31 lipienia 2026 hoda. Z samaha pačatku jamu daviałosia sutyknucca ź vielmi ciažkimi ŭmovami. Na praciahu ŭsiaho zapłyvu jon nie moh spać i nie mieŭ prava dakranacca da łodki supravadžeńnia. Ježu i vadu jamu pieradavali tolki z sudna z dapamohaj śpiecyjalnaj pałki. Heta była nie tolki baraćba z moram, ale i vyprabavańnie mahčymaściaŭ ułasnaha arhanizma.
Dla Kubkoŭskaha hety pośpiech maje asablivaje značeńnie, bo heta była ŭžo jahonaja piataja sproba pieraadoleć Bałtyjskaje mora. Papiarednija sproby zaviaršalisia niaŭdała, choć kožny raz spartsmien nabližaŭsia da mety.
Najbolš dramatyčnaj była sproba ŭ 2025 hodzie. Tady płyviec pravioŭ u vadzie bolš za 52 hadziny i ŭžo amal dasiahnuŭ pośpiechu. Jon pieraadoleŭ bolšuju častku maršrutu, ustaloŭvaŭ asabistyja rekordy, ale ŭsiaho za 11 kiłamietraŭ ad finišu byŭ vymušany spynicca. Mocnaje źniasileńnie i paharšeńnie nadvorja nie dazvolili jamu zaviaršyć zapłyŭ.
Hetym razam Kubkoŭski vytrymaŭ šmathadzinnuju nahruzku i vykanaŭ zadaču, jakaja doŭhi čas zdavałasia amal niemahčymaj. Adnak navat na finišy jamu daviałosia pieraadolvać kryzis. Kali da bieraha zastavałasia kala 1500 mietraŭ, płyviec na karotki čas spyniŭsia ŭ vadzie i pačaŭ pytacca ŭ kamandy supravadžeńnia, kolki jašče zastałosia. Jon nie bačyŭ bieraha i straciŭ upeŭnienaść. Tady členy kamandy padtrymali jaho słovami, što na plažy ŭžo bačny natoŭp ludziej. Heta dapamahło jamu sabrać apošnija siły i zaviaršyć zapłyŭ.
Svoj zapłyŭ marafoniec zrabiŭ dabračynnym: jamu ŭdałosia sabrać bolš za 715 tysiač złotych, abo amal 200 tysiač dalaraŭ. Hrošy jon pieradaŭ fondu Cancer Fighters, jaki dapamahaje dzieciam z ankazachvorvańniami.
Adnačasova praz Bałtyjskaje mora płyła jašče adna polskaja spartsmienka — Karalina Ščepniak. Jana vybrała inšy maršrut i nakiroŭvałasia da plažu ŭ vioscy Pabiarova. Jana praviała ŭ vadzie 58 hadzin, ale ŭrešcie jaje sproba skončyłasia niaŭdačaj.
Žančyna sprabavała pierapłyści Pcič u Minskim rajonie, ale nie dała rady
Biełarus u 82 hady pierapłyŭ Basfor
Pad Rečycaj źniali, jak voŭk pierapłyvaje raku VIDEA
Litoŭskija pamiežniki pakazali, jak kala miažy ź Biełaruśsiu raku pierapłyvaje miadźviedź VIDEA
U Basfory znajšli cieła rasijskaha płyŭca, jaki źnik paŭhoda tamu
Ciapier čytajuć
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary