U Bałharyi vybuchnuŭ skład bojeprypasaŭ kampanii, jakaja pastaŭlała zbroju Ukrainie
U Bałharyi adbylisia vybuchi i pažar na składzie bojeprypasaŭ kampanii EMCO. Pavodle infarmacyi mera horada Traŭna Denča Minieva, pažar na terytoryi składa ŭžo patušany, usich rabotnikaŭ pradpryjemstva evakujavali, nichto ź ich nie paciarpieŭ, piša The Moscow Times.
Z-za zadymleńnia ŭłady zaklikali žycharoŭ najbližejšych nasielenych punktaŭ začynić vokny, karystacca achoŭnymi maskami i bieź nieabchodnaści nie vychodzić na vulicu. Pry hetym niekatoryja nasielenyja punkty, raźmieščanyja pobač z pradpryjemstvam, evakujavali.
Ministr unutranych spraŭ Bałharyi Ivan Demierdžyjeŭ zajaviŭ, što papiarednie pryčynaj zdareńnia mahli stać unutranyja faktary. Ułady taksama prymajuć miery, kab nie dapuścić raspaŭsiudžvańnia ahniu na inšyja budynki.
Kampanija EMCO naležyć bałharskamu handlaru zbrojaj Emilijanu Hiebravu, jaki taksama zajmajecca vytvorčaściu ŭzbrajeńniaŭ. U 2021 hodzie jon raskazvaŭ, što jaho kampanija pastaŭlała vajskovuju techniku va Ukrainu paśla 2014 hoda. Pavodle infarmacyi, jakuju vydańniu The New York Times paviedamlali ŭkrainskija čynoŭniki, EMCO jašče ŭ 2014 hodzie zaklučyła kantrakt na pastaŭku artyleryjskich bojeprypasaŭ Ukrainie.
Bałharyja praciahvaje vyrablać bojeprypasy savieckaha ŭzoru. Pavodle acenak bałharskich uładaŭ, na krainu prypadaje prykładna tracina patronaŭ i snaradaŭ takoha typu, jakija ŭkrainskija vajskoŭcy vykarystoŭvali ŭ vajnie suprać Rasii. Značnaja častka hetaj pradukcyi pastupaje ŭ krainy, jakija pieradajuć Ukrainie ŭłasnyja zapasy ŭzbrajeńniaŭ.
Ministr abarony Bałharyi Todar Taharaŭ raniej zajaŭlaŭ, što bolš za pałovu bałharskaj vytvorčaści bojeprypasaŭ niepasredna ci ŭskosna nakiroŭvajecca va Ukrainu. Značnaja častka pastavak prypadaje na EMCO.
Vybuchi na bałharskich składach bojeprypasaŭ užo nieadnarazova rabilisia pradmietam rasśledavańniaŭ. U 2011 hodzie vybuch adbyŭsia na składzie ŭ Łaŭnidole, u 2015‑m — na składach u Ihanavie, a ŭ 2020 hodzie — na abjekcie ŭ Mhližy. Bałharskija pravaachoŭnyja orhany praviarali mahčymuju datyčnaść da hetych incydentaŭ rasijskich śpiecsłužbaŭ. U 2021 hodzie prakuratura zajaviła ab padazreńniach u dačynieńni da šaści hramadzian Rasii.
Akramia taho, 31 lipienia 2022 hoda i 25 červienia 2023 hoda vybuchi adbyvalisia na składach EMCO kala Karnabata. Abodva vypadki taksama rasśledavalisia bałharskaj prakuraturaj.
Sam Emilijan Hiebraŭ raniej zajaŭlaŭ, što ŭ 2015 hodzie jaho dvojčy sprabavali atrucić rečyvam, padobnym da niervova-paralityčnaha ahienta «Navičok». Pradprymalnik źviazvaŭ hetyja sproby ź dziejnaściu rasijskich śpiecsłužbaŭ.
Kamientary