«Pačaŭ mianie dušyć». Minčuki pabilisia pad ofisam zabudoŭščyka praź ilhotny kredyt

Pra kanflikt, jaki adbyŭsia pierad ofisam prodažaŭ žyłoha kompleksu «Paŭnočny bierah», vydańniu Onliner raskazaŭ minčuk Aleh. Usio zdaryłasia 6 žniŭnia — u dzień, kali zabudoŭščyk adkryŭ prodažy čarhovaha doma. Uvohule, u «Paŭnočnym bierazie» mała jaki zapusk abychodzicca biez čarhi, a hetym razam u joj jašče i adbyłasia bojka.

Pavialičyć

— Prodaž kvater pačaŭsia a 9‑j hadzinie ranicy 6 žniŭnia, — raskazvaje minčuk. — Ale za niekalki dzion da hetaha ŭ ofisie prodažaŭ źjaviŭsia sšytak sa śpisam-čarhoj, u jaki ja zapisaŭsia pad dziasiatym numaram.

Jak skazaŭ mieniedžar «Paŭnočnaha bieraha», hety sšytak nijakaha dačynieńnia da ich nie maje, maŭlaŭ, heta «narodnaja inicyjatyva», da jakoj im usio roŭna.

A tak luby čałaviek moža pryjści, zaniać čarhu i kupić kvateru.

Pa hetym sšytku stvaryli hrupu ŭ telehramie, pačali raźmiarkoŭvać dziažurstvy za 5 dzion da startu prodažaŭ — dla taho, kab ludzi tam siadzieli i čahości čakali.

Ja napisaŭ u hrupu, što ŭ mianie niama mahčymaści dziažuryć: u mianie žonka ź niemaŭlom, a ja pracuju. Tady heta «narodnaja inicyjatyva» prosta ssunuła mianie z 10‑ha miesca na 15-je.

6 žniŭnia, u dzień startu prodažaŭ, ja pajechaŭ da ofisa «Paŭnočnaha bieraha» na vulicy Śviardłova, kab zaniać žyvuju čarhu. Tam užo było dva čałavieki, jany mnie pačali raskazvać pra śpis, pra toje, što tut užo sfarmiravana čarha. Na što ja im skazaŭ, što ja pa žyvoj čarzie, a raz tut nikoha niama akramia vas, ja budu trecim.

Usiu noč ja stajaŭ prosta kala dźviarej, da 8‑j ranicy narodu stanaviłasia ŭsio bolš.

U 09:00 adčynilisia dźviery ŭ ofis, ale zajści adrazu mnie nie ŭdałosia — čałaviek, jaki stajaŭ zzadu, schapiŭ mianie za šyju ŭdušalnym pryjomam, pačaŭ adciahvać ad uvachoda. Ja schapiŭsia za dźviery, tady jašče niekalki čałaviek pačali mianie adciahvać.

Natoŭp pajšoŭ unutr, ja apynuŭsia apošnim.

Uvohule, dziažurstvy pad dźviaryma zabudoŭščyka — daŭniaja praktyka minčukoŭ. Toj, chto sočyć za navinami śvietu nieruchomaści, cudoŭna viedaje, što ludzi, źmianiajučy adzin adnaho, kruhłasutačna znachodziacca kala ofisaŭ i ŭ zimovuju ściužu, i ŭ letniuju śpiakotu. Mienavita dla taho, kab nichto «pabočny» nie pranik pieršym u zapavietny kabiniet. Tradycyja daŭno skłałasia i ŭkaraniłasia.

— Zajšoŭšy ŭ ofis, ja padyšoŭ da stojki rehistracyi i skazaŭ dziaŭčynie, kab jana mianie zarehistravała, raz užo ja stajaŭ u pačatku i mianie prosta vyciahnuli ź dźviarej (jana heta bačyła). Ale jana prosta nie źviartała na mianie ŭvahi. Tady ja paklikaŭ mieniedžara, na što toj skazaŭ, što ŭ ludziej śpis i prymajuć pa im. Ja zapiarečyŭ, što śpis ničoha nie značyć. Adnak ničoha nie źmianiłasia.

Padyšła inšaja mieniedžarka, spytała, čamu ja nie zapisaŭsia ŭ sšytak. Na što ja joj pakazaŭ natatnik, u jakim ličusia pad numaram dziesiać. Tut užo ludzi stali kryčać, što toj śpis ničoha nie značyć, u ich jość novy — na arkušy A4, u jakim ja taksama byŭ, ale pad numaram 15.

U vyniku mianie nie zarehistravali ni pad jakim numaram, ni dziesiać, ni 15. Chacia ja byŭ trecim pa fakcie.

Pry hetym čałaviek, jaki napaŭ na mianie, byŭ paśpiachova zarehistravany, jamu pradali kvateru, chacia, liču, jaho ŭvohule pavinny byli vyhnać z budynka, bo jon pryčyniaje škodu zdaroŭju inšych ludziej, jak minimum, parušaje hramadski paradak.

Ja vyklikaŭ narad milicyi, napisaŭ zajavu na hetaha čałavieka, źniaŭ paboi. Vyrašyŭ nadać ahałosku hetaj historyi, bo ŭsio, što adbyłosia, — dzič. Dzivić, što ŭ ofisie prodažaŭ navat niama achovy. I ahułam atrymlivajecca zamknionaje koła, u jakim supracoŭniki supiarečać sami sabie: kažuć, što śpis ničoha nie značyć, a potym rehistrujuć stroha pa im.

Śpis ci žyvaja čarha?

Historyja Minska viedaje i značna bolš skandalnyja situacyi pad dźviaryma zabudoŭščykaŭ. U 2017‑m «čarhaviki» navat patrabavali admieny prajektnaj dekłaracyi praz toje, što rana ranicaj na hanku źjavilisia «zachopniki». Ale toje byŭ UKB i mietr pa $610 u ekvivalencie (ech, byli časy). A tut — kamiercyjny zabudoŭščyk, darahi «kvadrat» i kredyt pad 1%.

Voś jak situacyju prakamientavali ŭ kampanii «Ryviersajd Deviełapmient Limited».

— Nam viadoma pra incydent, jaki adbyŭsia ŭ dzień startu prodažaŭ kvater u žyłym kompleksie «Paŭnočny bierah» 6 žniŭnia 2026 hoda.

Start prodažaŭ vyklikaŭ vysokuju cikavaść. Na praciahu niekalkich dzion da startu achvotnyja nabyć kvatery samastojna arhanizavali paradak čakańnia. Ustanoŭleny hramadzianami paradak dziažurstvaŭ nie źjaŭlajecca inicyjatyvaj abo aficyjnym instrumientam zabudoŭščyka. Kampanija nie farmiruje hrafiki dziažurstvaŭ abo inšyja śpisy tych, chto čakaje startu prodažaŭ, nie ŭstanaŭlivaje praviły ŭdziełu ŭ ich i nie rehuluje ŭzajemadnosiny pamiž hramadzianami ŭ pieryjad čakańnia adkryćcia ofisa.

Da momantu adkryćcia ofisa prodažaŭ «Paŭnočnaha bieraha» pieravažnaja bolšaść tych, chto sabraŭsia, pryznavała čarhovaść, jakaja skłałasia pamiž imi, i zajaviła supracoŭnikam pra hatoŭnaść rehistravacca mienavita ŭ takoj paśladoŭnaści. U situacyi, kali kala ŭvachodu adnačasova znachodziłasia vialikaja kolkaść ludziej, supracoŭniki ofisa nie mahli samastojna vyznačać, chto z prysutnych faktyčna pryjšoŭ pieršym, druhim ci trecim, abo vyrašać sprečki pra čarhu, jakija ŭźnikli pamiž imi.

Asobna prakamientujem infarmacyju pra prymianieńnie fizičnaj siły. Kanflikt pamiž hramadzianami adbyŭsia na vulicy, za miežami ofisa prodažaŭ. Kampanija nie nadzielena paŭnamoctvami ŭ zabieśpiačeńni paradku za miežami ofisa prodažaŭ. Pakolki havorka idzie pra dziejańni adnoj fizičnaj asoby ŭ dačynieńni da inšaj, pravavuju acenku tamu, što adbyłosia, upravie dać kampietentnyja dziaržaŭnyja orhany.

Kampanija kateharyčna nie padtrymlivaje lubyja formy ahresii i škaduje, što situacyja pamiž tymi, chto čakaŭ, pierarasła ŭ fizičny kanflikt.

Sa svajho boku kampanija pry nieabchodnaści hatovaja akazać sadziejničańnie pravaachoŭnym orhanam u miežach pravierki incydentu, rastłumačyŭ zabudoŭščyk.

• 0
• 0
• 5
• 9
• 0
• 0
• 1
• 0