Ziendeja — spartyŭny čałaviek? U dziacinstvie zorka «Čałavieka-pavuka» i «Dziuny» zajmałasia «sokieram» i baskietbołam
Vierahodna, spartyŭnaje dziacinstva i zrabiła Ziendeju, badaj, hałoŭnaj aktrysaj svajho pakaleńnia, piša sports.ru.
U siecivie zavirusilisia kadry ź junaj Ziendejaj, jakaja hulaje ŭ futboł. Amal usie jany vyjšli z aktualnymi dla našaha času paznakami, što heta nie ŠI — u kadry sapraŭdnaja Ziendaja i jaje dziciačyja fota z rodnaha kalifarnijskaha Oklenda, dzie jana hulaje za miascovuju kamandu Rockridge Soccer Club. U kamientarach fanaty navat znajšli padabienstva Ziendei ź Niejmaram.
Zaraz u Ziendei-aktrysy, badaj, najlepšy čas u karjery.
Kinasiezon 2025/2026 Ziendeja moža śmieła zapisać sabie ŭ aktyŭ. Pa-pieršaje, vyjšaŭ treci siezon «Ejfaryi», dzie aktrysa viarnułasia da roli Ru Bieniet, jakaja zrabiła jaje viadomaj šyrokaj publicy. Pa-druhoje, u prakat vyjšła praca z Robiertam Pacinsanam — «Voś heta drama!», novy «Čałaviek-pavuk» z žanichom Ziendei Tomam Chołandam i «Adysieja» Krystafiera Nołana, dzie dziaŭčyna hraje Afinu. A na čarzie jašče treciaja častka «Dziuny».
Ziendeja taksama śpiavaje (u jaje jość niekalki zapisanych sinhłaŭ i albom) i mocnaja ŭ ahučvańni multfilmaŭ.
Tak, niekalki hadoŭ tamu jana padaryła svoj hołas Łole Bani ŭ novym «Kaśmičnym džemie» ź Lebronam, a ŭ nastupnym hodzie vyjdzie čarhovy «Šrek» ź jaje ŭdziełam. I heta vidavočna nie kaniec.
Aktrysie ŭsiaho 29 hadoŭ, a ŭ jaje aktyvie ŭžo jość «Emi» i «Załaty hłobus».
Całkam mahčyma, što sport, i mienavita «sokier» (tak u ZŠA nazyvajuć «naš» futboł), dazvoliŭ Ziendei pavieryć u siabie, raźvić svaju akciorskuju karjeru i nie spynicca ŭ prafiesijnym płanie. Bo ŭsiaho hetaha mahło i nie być.
Ziendeja pačała zajmacca sportam dziakujučy baćku-fizruku. Baćki bajalisia, što ŭ dziaŭčynki aŭtyzm
«Ja dvojčy chadziła ŭ padrychtoŭčy kłas dziciačaha sadka, tamu što była vielmi saramlivaj», — adnojčy raspaviała ŭ adnym sa svaich intervju Ziendeja.
Nasamreč rašeńnie pakinuć dačku na druhi hod pryniali jaje baćki-nastaŭniki miascovaj škoły: mama Kłer i tata Kaziembie Adžamu. Baćki dziaŭčynki bačyli, što jana ni z kim nie maje znosinaŭ i nieachvotna idzie na kantakt u sadku. U niejki momant jany navat pačali padazravać u svajho dziciaci aŭtyzm i naviedvali sieminary dla baćkoŭ dziaciej, u jakich byŭ padobny stan. Adnak dyjahnaz nie paćvierdziŭsia.
Baćka Ziendei, jaki pracavaŭ u škole fizrukom, vyrašyŭ, što praz sport dziaŭčynka lepš sacyjalizujecca, i pačaŭ dałučać jaje da kamandnych vidaŭ sportu, u pieršuju čarhu da baskietboła, ad jakoha jany z Kłer prosta fanacieli.
Kaziembie spačatku hulaŭ z dačkoj sam, a paźniej adpraviŭ dziaŭčynku zajmacca baskietbołam praz Amateur Athletic Union.
Heta najbujniejšaja amierykanskaja niekamiercyjnaja amatarskaja i moładzievaja spartyŭnaja arhanizacyja, zasnavanaja ŭ 1888 hodzie. Praź jaje ŭ jakaści ŭdzielnikaŭ moładzievych i školnych spabornictvaŭ, asabliva ŭ baskietbole, lohkaj atletycy i płavańni, prajšli praktyčna ŭsie vialikija amierykanskija spartsmieny apošnich dziesiacihodździaŭ, uklučajučy Džordana, Kobi i taho ž Lebrona.
Vybar «sokiera» — taksama rašeńnie baćki Ziendei. Tak jon treniravaŭ vynoślivaść dački, kab jana stała pieršaj žančynaj u NBA
U adroźnieńnie ad baskietboła z karotkimi ryŭkami, futboł patrabuje praktyčna bieśpierapynnaha biehu pa vialikim poli, što idealna raźvivaje vynoślivaść. Akramia hetaha, u dziciačym «sokiery» mienš žorstkich viertykalnych skačkoŭ i nahruzak na kaleni, što źnižaje ryzyku traŭmaŭ dla dziciaci, jakoje raście.
Tamu ŭ jakaści dadatkovaj fizičnaj padrychtoŭki Kaziembie vybraŭ dla dački mienavita jeŭrapiejski futboł. Da taho ž dziaŭčynka i tut hulała ŭ kamandzie, a značyć, vučyłasia znachodzić ahulnuju movu z ravieśnikami.
Tak Ziendaja pačała hulać za miascovy futbolny kłub «Rockridge Soccer Club».
«Moj tata chacieŭ, kab ja stała pieršaj žančynaj u NBA», — paźniej raskazvała Ziendeja.
Vidavočna, hetym i tłumačycca takaja apantanaść Kaziembie tym, kab jaho dačka zajmałasia sportam. Akramia kamandnych vidaŭ sportu, Ziendaja taksama zajmałasia bieham.
Ekśpierymienty sa spartyŭnaj sacyjalizacyjaj vidavočna pajšli dziaŭčyncy na karyść. Jana sapraŭdy stała bolš kamunikabielnaj i mienš zamknionaj. Ale praciahvać spartyŭnuju dynastyju Ziendaja vidavočna nie śpiašałasia.
Heta adbyłosia niedzie va ŭzroście 6 hadoŭ. U toj čas dziaŭčynka dapamahała svajoj mamie, jakaja padpracoŭvała ŭ Kalifarnijskim Šekśpiraŭskim teatry. Tam Ziendaja rasstaŭlała kresły, pradavała bilety i časam udzielničała ŭ teatralnych pastanoŭkach u masoŭcy. Scena tak mocna zachapiła dzicia, što dziaŭčynka stała surjozna zajmacca tancami i akciorskim majsterstvam.
Baćka, viadoma, nie byŭ u zachapleńni ad taho, što dačka vyrašyła zaviazać sa sportam, ale asabista staŭ vazić dzicia na ŭsie kastynhi i prasłuchoŭvańni, a paźniej kinuŭ pracu nastaŭnika fizkultury, kab stać pieršym mieniedžaram aktrysy i jaje asabistym ciełaachoŭnikam u Halivudzie.
Ziendeja trenirujecca prykładna 3—4 razy na tydzień, spałučajučy funkcyjanalnyja praktykavańni i kardyjo. Jana nie imkniecca nabirać myšačnuju masu, tamu zamiest ciažkich vahaŭ vykonvaje praktykavańni z ułasnaj vahoj i lohkimi abciažarvalnikami: bałharskija vypady, płanki, ciahi.
Taki farmat raźvivaje siłu i vynoślivaść, ale zachoŭvaje ruchomaść i płastyčnaść, jakija važnyja padčas praciahłych zdymak. Pierad fizična składanymi rolami prahrama stanovicca bolš śpiecyjalizavanaj. Dla «Dziuny» i inšych dynamičnych prajektaŭ akcent źmiaščajecca na vynoślivaść, intervalnyja nahruzki i pracu niekalkich hrup myšcaŭ adnačasova.
A dla «Pretendentaŭ» Ziendeja dadatkova treniravałasia hulać u tenis: zajmałasia bieham, kaardynacyjaj i raźvićciom siły ŭdaru z tenisistam Bredam Hiłbiertam.
Važnuju rolu ŭ jaje formie adyhryvajuć tancy, jakimi Ziendeja zajmajecca ź dziacinstva. U pačatku karjery Ziendeja vyjhrała 16‑y siezon «Tancaŭ z zorkami». Zaraz, padčas zdymak, jana moža ładzić viačernija tancavalnyja treniroŭki praciahłaściu da 1—2 hadzin — heta adnačasova kardyjo, praca nad kaardynacyjaj i sposab rassłabicca paśla pracoŭnaha dnia.
Raściažka i elemienty piłatesu dapamahajuć zachoŭvać hnutkaść, dobruju vypravu i kantrol ruchaŭ, a chajkinh pa pahorkach Łos-Andželesa daje aktrysie dadatkovuju nahruzku na nohi i padtrymlivaje vynoślivaść.
Pry hetym Ziendeja nie sprabuje kampiensavać treniroŭki žorstkaj dyjetaj. Jana viehietaryjanka ź dziacinstva, nie jeść miasa i rybu, ale nie prytrymlivajecca strohich abmiežavańniaŭ i moža dazvolić sabie sałodkaje abo lubimuju vostruju łokšynu. Časam jana navat prapuskaje śniadanak, kali ranicaj nie adčuvaje hoładu.
U vyniku jaje padychod budujecca nie na ekstremalnych nahruzkach abo dyjetach, a na rehularnym ruchu, tancach i funkcyjanalnych treniroŭkach, jakija dapamahajuć zachoŭvać mocnaje, vynoślivaje i płastyčnaje cieła.
Partnior Ziendei Tom Chołand chvareje za «Totenchem», a Ziendeja?
Sport i kankretna «sokier» u žyćci Ziendai zaraz źviazanyja praź jaje partniora pa «Čałavieku-pavuku». Tom Chołand — łondaniec i pierakanany fanat «Totenchema». Jon nie raz kazaŭ, što maryć ubačyć čempijonstva «špor», sustrakaŭsia z zorkaj kłuba Son Chyn Minam i atrymlivaŭ ad jaho imiannuju futbołku, a ŭ 2021 hodzie pryznaŭsia, što chacieŭ by ŭbačyć u finale Lihi čempijonaŭ paru «Totenchem» — «Brentfard», za jaki chvareje jaho dziadźka.
Razam para chodzić i na matčy NBA, kankretna Ziendeja padtrymlivaje «Hołden Stejt».
Jašče ź jeŭrapiejskim futbołam Ziendeju źviazvaje partnior pa «Dziunie» Cimaci Šałamie. U dziacinstvie jon pravodziŭ kanikuły niedaloka ad Sient-Ećjena i z taho času zaŭzieje za hety kłub. U adnym ź intervju jon nazyvaŭ «Sient-Ećjen» kamandaj, za jakuju chvareje bolš za ŭsio na śviecie, a taksama ŭspaminaŭ, jak haniaŭ na rovary za aŭtobusam kłuba.
Viadoma, što akcior u dziacinstvie hulaŭ za «Mancheten Kikiers» i navat pierasiakaŭsia tam z Džo Homiesam z «Livierpula».
Mahčyma, usia karjera Ziendei nie składvałasia b tak naturalna, kali b u dziacinstvie jana nie zajmałasia sportam.
Ciapier čytajuć
«Ja supracoŭnica KDB, u vas buduć prablemy». Minčanka chacieła napisać skarhu ŭ optycy, ale supracoŭnica pakazała koračku6
Kamientary