U Hrodnie pačali viartacca kvizy paśla masavaj admieny hulniaŭ. Ale nie ŭsie
U Hrodnie paśla skasavańnia pačali viartacca kvizy. Arhanizatary «Mazhabojni» abviaścili pra praviadzieńnie svaich hulniaŭ: sustrečy adbuducca 16 i 20 žniŭnia. Inšyja arhanizatary hulniaŭ pakul maŭčać, piša Hrodna.life.
Arhanizatary «Mazhabojni» ŭ Hrodnie paviedamili pra viartańnie da hulniaŭ.
Najbližejšaja hulnia projdzie 16 žniŭnia. Heta «padvid» «Mazhabojni» — «Tuc-Tuc Kviz» «Chity karaokie» pa ruskamoŭnych trekach. Na 20 žniŭnia ŭžo zapłanavanaja kłasičnaja hulnia.
U inšaha hrodzienskaha kviza — «Smuzi» — situacyja pakul nie źmianiłasia. Arhanizatary ŭ kamientarach u svaim akaŭncie ŭ Instagram paviedamlajuć, što ŭsie hulni da 20 žniŭnia admienienyja, a rehistracyi prypynienyja.
Novaj infarmacyi pakul niama i ŭ «Matroški» dy «VSpomniť VSio». Apošnija publikacyi arhanizataraŭ hetych hulniaŭ źjavilisia kala dvuch tydniaŭ tamu.
Pra masavuju admienu hulniaŭ stała viadoma ŭ pačatku žniŭnia. Intelektualna-zabaŭlalnyja hulni ŭ Hrodnie pryraŭniali da masavych mierapryjemstvaŭ. Praz heta arhanizataram nieabchodna atrymlivać dazvoł na ich praviadzieńnie.
Adnym ź pieršych pra admienu paviedamiŭ hrodzienski kviz «VSpomniť VSio». Nieŭzabavie pra prypynieńnie hulniaŭ paviedamili i inšyja arhanizatary — «Smuzi», «Mazhabojnia», «Uhadaj miełodyju» i «Matroška».
Bolšaść zapłanavanych na žnivień hulniaŭ admianili. Rašeńnie pra skasavańnie kvizaŭ vyklikała aktyŭnaje abmierkavańnie siarod hrodziencaŭ. Žychary horada pisali ŭ sacsietkach, što intelektualnyja hulni byli dla ich dobrym sposabam prabavić viečar, sustrecca ź siabrami i adpačyć.
Dazvoł na praviadzieńnie masavaha mierapryjemstva vydajuć u miascovym vykankamie.
Padać zajavu treba za 15 dzion da mierapryjemstva. U zajavie nieabchodna paznačyć źviestki arhanizataraŭ, mety i miesca praviadzieńnia mierapryjemstva, a taksama mierkavanuju kolkaść udzielnikaŭ.
Kali mierapryjemstva adnosicca da katehoryi kulturna-vidoviščnych, jaho arhanizatar abaviazany być uklučany ŭ rejestr Minkulta i mieć hastrolnaje paśviedčańnie.
Kamientary