«Babulki chutka pačnuć bicca». Ludzi zajmajuć čarhu pa pradukty aŭtałaŭki z šostaj ranicy
Va Uździe kožny čaćvier kala aŭtałaŭki Staŭbcoŭskaha miasa-kansiervavaha kambinata źbirajecca čarha. Niekatoryja pakupniki zajmajuć jaje jašče kala 6 ranicy, choć mašyna z pradukcyjaj pryjazdžaje tolki kala 10.30. Pryčyna takoha ažyjatažu prostaja: papularnych praduktaŭ chapaje daloka nie ŭsim, piša BGmedia.
Miascovaja žycharka źniała videa, dzie kaža, što padobnaja situacyja praciahvajecca ŭžo kala troch hadoŭ. Pakupniki viedajuć adno adnaho i kožny tydzień faktyčna spaborničajuć za mahčymaść apynucca pieršymi.
«Babulki chutka pačnuć bicca, tam usie adno adnaho nienavidziać, bo pieršy zabiraje ŭsio», — apisvaje toje, što adbyvajecca, biełaruska. Jana prapanavała kambinatu albo pryvozić bolš pradukcyi, albo ŭstalavać abmiežavańnie na kolkaść tavaru ŭ adny ruki.
U kamientarach žančyna patłumačyła, što asabliva chutka raźbirajuć asobnyja pazicyi, naprykład jałavičnyja ščoki i rebry. Pieršyja pakupniki mohuć nabirać pradukty nie tolki sabie, ale i svajakam i znajomym, tamu tym, chto apynuŭsia trecim ci čaćviortym u čarzie, užo dastajecca daloka nie ŭsio.
Aŭtarka raskazvaje, što jaje baćki taksama ŭstajuć kala piaci ranicy, kab paśpieć zaniać čarhu. Pry hetym čakać aŭtałaŭku piensijanieram davodzicca niekalki hadzin niezaležna ad nadvorja.
Pavodle jaje słoŭ, prablema jašče i ŭ tym, što patrebnaj pradukcyi ŭ zvyčajnych kramach Uzdy niama.
Pry hetym da samoha Staŭbcoŭskaha kambinata ŭ kamientataraŭ pretenzij praktyčna niama. Naadvarot, jaho pradukcyju masava chvalać: «Vielmi jakasnaja i smačnaja», «Staŭbcoŭskaja pradukcyja idzie na ŭra», «Varta pasprabavać adzin raz — i ŭsio, vy prapali».
Situacyju prakamientavali i na samim miasakambinacie. Tam patłumačyli, što havorka idzie pra pradukcyju, jakuju fizična niemahčyma vyrablać u vialikich abjomach. Kolkaść niekatorych subpraduktaŭ naŭprost zaležyć ad abjomaŭ pierapracoŭki žyvioły: z adnoj tušy možna atrymać tolki abmiežavanuju kolkaść tych ža ščok abo rebraŭ.
Ciapier čytajuć
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała41
Kamientary