Viarchoŭny sud Ispanii kančatkova pastanaviŭ, što były prezident Katałonii Karles Pučdemon moža viarnucca ŭ krainu biez pahrozy aryštu. Razam ź im viarnucca zmohuć dva byłyja ministry jaho ŭrada — Ljuis Puč i Toni Kamin, piša Bi-bi-si.
Pučdemon abviaściŭ niezaležnaść Katałonii ŭ 2017 hodzie i paśla hetaha źjechaŭ u Bielhiju, dzie žyŭ u vyhnańni. Na refierendumie ab niezaležnaści bolšaść tych, chto pryjšoŭ na ŭčastki, padtrymała adździaleńnie ad Ispanii. Adnak u hałasavańni pieravažna ŭdzielničali prychilniki niezaležnaści, bo Madryd zahadzia abviaściŭ refierendum niezakonnym.
U adkaz na abviaščeńnie niezaležnaści ispanskija ŭłady ŭviali ŭ Katałonii pramoje kiravańnie, raspuścili miascovy parłamient i pryznačyli daterminovyja vybary. Pučdemon vyjechaŭ u Bielhiju, a dzieviać jaho paplečnikaŭ u Ispanii atrymali turemnyja terminy. U 2021 hodzie ŭrad pamiłavaŭ ich.
Paśla źmieny parłamienta i ŭrada Ispanii ŭ 2024 hodzie była abvieščanaja amnistyja dla dziasiatkaŭ katałonskich palitykaŭ i aktyvistaŭ, jakija ŭdzielničali ŭ sieparatysckim ruchu i refierendumie 2017 hoda. Adnak Viarchoŭny sud spačatku vyrašyŭ, što amnistyja nie raspaŭsiudžvajecca na abvinavačańni ŭ rastracie, vystaŭlenyja Pučdemonu i niekatorym jaho paplečnikam. Inšy sudździa, jaki rasśledavaŭ padazreńni ŭ zmovie katałonskich sieparatystaŭ z Rasijaj, taksama pastanaviŭ nie prymianiać amnistyju da fihurantaŭ hetaj spravy, u tym liku da Pučdemona.
U kastryčniku 2026 hoda Kanstytucyjny sud Ispanii admianiŭ rašeńnie ab nieprymianieńni amnistyi da Pučdemona i jaho paplečnikaŭ. Ultrapravaja partyja Vox, jakaja vystupaje suprać niezaležnaści i navat aŭtanomii Katałonii, abskardziła heta rašeńnie, ale ŭ paniadziełak Viarchoŭny sud adchiliŭ apielacyju. Takim čynam, pravavych pieraškod dla viartańnia Pučdemona, źviazanych z hetymi spravami, bolš niama.
U 2024 hodzie Pučdemon niečakana viarnuŭsia ŭ Katałoniju i vystupiŭ na mitynhu ŭ Barsiełonie, paśla čaho znoŭ źjechaŭ za miažu. Palicyja sprabavała znajści i zatrymać jaho, ale biespaśpiachova.
U 2019 hodzie Pučdemona abrali deputatam Jeŭraparłamienta, a ŭ 2024‑m — deputatam parłamienta Katałonii ad pravacentrysckaj partyi «Razam za Katałoniju» (Junts per Catalunya, JxCat). Pry hetym pieradvybarčyja kampanii jon pravodziŭ pa-za miežami Ispanii, źbirajučy prychilnikaŭ na mitynhach na poŭdni Francyi.
Paśla rašeńnia Viarchoŭnaha suda Pučdemon apublikavaŭ videazvarot u sacyjalnych sietkach. Jon zajaviŭ, što dahetul bačyŭ svajoj zadačaj «internacyjanalizacyju kanfliktu» pamiž Barsiełonaj i Madrydam i tłumačeńnie jeŭrapiejskaj hramadskaści taho, što adbyvajecca ŭ Ispanii. Ci vierniecca jon ciapier na radzimu, pakul nieviadoma.
Pavodle karespandenta Bi-bi-si ŭ Madrydzie, za čas adsutnaści Pučdemona pytańnie niezaležnaści Katałonii adyšło na druhi płan ispanskaj palityki. Bolšuju ŭvahu ciapier pryciahvajuć prablemy imihracyi i koštu žylla.
Paśla vybaraŭ 2023 hoda partyja JxCat padtrymała lidara sacyjalistaŭ Piedra Sančesa, što dazvoliła jamu sfarmavać urad. U samoj Katałonii partyja straciła častku prychilnikaŭ, choć u apytańniach zastajecca na druhim-trecim miescy.
U jaje źjaviŭsia surjozny kankurent sprava — etnanacyjanalistyčnaja partyja «Katałonski aljans» (Aliança Catalana). U adroźnieńnie ad Vox, jana taksama vystupaje za niezaležnaść Katałonii.
«Biełaruś pieradusim». Što viadoma pra 23‑hadovaha aficera śpiecnaza, jakoha asudzili na 19 hadoŭ za «zdradu dziaržavie»8
Kamientary
Napeŭna, budzie niby miascovy Paźniak. Zhubiŭ masoŭku, zastałasia tolki čystaja ideja.