Minčanka nazvała syna niezvyčajnym imiem. Jaje Dobr u Biełarusi adziny
Maci kaža, što dziŭna reahujuć na Dobra tolki darosłyja — u dziaciej zvyčajna pytańniaŭ niama.
U 2022 hodzie Taćciana Jurkievič naradziła chłopčyka. Imia jamu vyrašyli dać niebanalnaje — Dobr. Žančyna nastojvaje: heta nie skaračeńnie ad Dabryni, a samastojnaje paŭnavartasnaje imia.
Kab zarehistravali dzicia z takim imieniem, baćkam pryjšłosia pisać u ZAHSie zajavu z prośbaj dazvolić nazvać syna mienavita — bo ŭ słoŭnikach nijakaha Dobra, naturalna, niama.
Taćciana svaim rašeńniem całkam zadavolenaja.
«Ja lublu, jak jano hučyć. Hety nabor zyčnych nadaje niejkaj strohaści, surjoznaści imia. A ŭ spałučeńni ź imieniem pa baćku — Dobr Mikicič — prosta razryŭ majho sercajka», — kaža žančyna ŭ svaim błohu ŭ tyktoku.
Toje, što ŭ budučyni va ŭnukaŭ buduć imiony pa baćku Dabrovič abo Dabroŭna Taćcianu nie zasmučaje.
Prablemy praz aryhinalnaje imia dziciaci ŭźnikajuć tolki z darosłymi. Taćciana skardzicca, što amal kožny ličyć siabie abaviazanym acanić imia. Adny adznačajuć «kłasnaje imia», «cikava nazvali». Inšyja kažuć «Što ŭ baćkoŭ u hałavie?».
Časam dachodzić da absurdu — maci pryznajecca, što jaje ŭžo nie adnojčy sprabavali pierakanać, što pa-sapraŭdnamu chłopčyka musiać zvać Dabrynia, a ludzi, jakija dazvolili ŭpisać u dakumienty Dobr, zvarjacieli.
Krychu ździŭleny byli i babuli-dziaduli. Tyja cikavilisia, jak ža ž inšyja dzieci buduć nazyvać ich unuka. Bo ŭsio ž bolšaść biełarusaŭ pryvykła da bolš standartnych imionaŭ.
Dzieci ž, pa słovach maci, zvyčajna nie ździŭlajucca, pačuŭšy imia novaha siabra.
«Jość dzieci, jakija «nu skazaŭ i skazaŭ, davaj hulać». Jość dzieci, jakija pierapytvajuć. I tady ja ŭžo padklučajusia i kažu, što jaho zavuć Dobr. Bo taki nabor zyčnych dziciaci pramović składana».
Małyja nie śmiajucca, nie kruciać palcam la skroni. Dla ich heta całkam narmalnaje imia.
Taćciana kaža, što jaje Dobr — adziny ŭ Biełarusi. Tamu jana navat krychu zasmuciłasia, kali hladzieła tradycyjnuju padborku niezvyčajnych imionaŭ novanarodžanych za 2022 hod i nie pabačyła tam imia svajho syna.
Ciapier čytajuć
Rasijski repier Jahor Kryd źniaŭsia ŭ majcy z vyjavaj hieroja filma «Idzi i hladzi», jakomu damalavali pirsinh i tatuiroŭki. Cišotku vypuścili krama biełaruski1010
Kamientary