Ultymatum Mierca ab dapamozie Ukrainie ŭ abmien na biudžet užo adchilili čatyry krainy ES
Staršynia Jeŭrapiejskaj rady Antoniu Košta pasprabavaŭ supakoić fiederalnaha kanclera Hiermanii Frydrycha Mierca paśla taho, jak toj nakiravaŭ list z patrabavańniem źviazać zaćviardžeńnie biudžetu Jeŭrasajuza z abaviazacielstvami ŭsich krain-členaŭ finansavać dapamohu Ukrainie. Ultymatum niamieckaha kanclera ŭžo adchilili čatyry dziaržavy, piša Euronews.
U liście, ź jakim aznajomiłasia Euronews, Košta paviedamiŭ, što abmierkavańnie abodvuch pytańniaŭ adbudziecca ŭ kancy listapada na śpiecyjalnym samicie ŭ Brusieli. Heta adbudziecca paśla taho, jak Jeŭrakamisija padaść prapanovy pa pakryćci finansavaha deficytu Ukrainy.
Mierc, adnak, nastojvaŭ, kab pytańnie razhledzieli ŭžo na niefarmalnym samicie ŭ Dublinie na hetym tydni. Košta zajaviŭ, što z ulikam apošnich padziej vydzielić čas dla hruntoŭnaha abmierkavańnia situacyi vakoł Ukrainy padčas hetaj sustrečy. Takim čynam, jon daŭ niamieckamu kancleru mahčymaść uźniać temu pierad inšymi jeŭrapiejskimi lidarami.
Jeŭrasajuz užo paabiacaŭ pakryć dźvie traciny biudžetnaha deficytu Ukrainy, jaki aceńvajecca ŭ 70 miljardaŭ jeŭra. Heta kala 45 miljardaŭ jeŭra. Miechanizm vydzialeńnia srodkaŭ pakul nie vyznačany. Z ulikam vialikaha abjomu patreb najbolš vierahodnym varyjantam stała vydača novych sumiesnych pazyk.
Mierc napisaŭ Koštu, što abaviazacielstva vydzielić Ukrainie novuju dapamohu pavinna stać «klučavoj papiaredniaj umovaj» dla zaćviardžeńnia nastupnaha biudžetu ES. Takim čynam, jon faktyčna źviazaŭ dva sprečnyja pytańni, dla vyrašeńnia jakich patrabujecca adnahałosnaja zhoda ŭsich krain-členaŭ.
«Padtrymka Ukrainy — heta pytańnie našaj ahulnaj jeŭrapiejskaj biaśpieki, i raźmierkavańnie ciažaru hetaj padtrymki taksama pavinna być ahulnym», — napisaŭ niamiecki kancler.
Suprać ultymatumu Mierca ŭžo vystupili Słavakija, Čechija, Vienhryja i Bałharyja. Premjer-ministr Słavakii Robiert Fica nazvaŭ patrabavańnie niamieckaha kanclera «šantažom».
Hetyja čatyry krainy chočuć damahčysia vyklučeńnia svajho ŭdziełu ŭ lubych budučych pazykach dla Ukrainy.
Ciapier čytajuć
Biełaruska hod adpracavała dalnabojščycaj u Jeŭropie. Ciapier sprabuje pastupić u italjanski ŭniviersitet4
Kamientary