U Archanhielskaj vobłaści abrynuŭsia pralot vielmi važnaha čyhunačnaha mosta. Pa im jakraz išoŭ hruzavy ciahnik
U rasijskaj Archanhielskaj vobłaści abrynuŭsia pralot čyhunačnaha mosta praz raku Viledź. U vyniku z rejek syšli vahony hruzavoha ciahnika. Pra zdareńnie paviedamiŭ hubiernatar rehijona Alaksandr Cybulski, piša The Moscow Times.
Pavodle słoŭ Alaksandra Cybulskaha, zdareńnie adbyłosia ŭ 5:10 ranicy. Pryčynaj jon nazvaŭ niejki «incydent», abstaviny jakoha vyśviatlajuć siłavyja struktury.
Pavodle papiaredniaj infarmacyi, nichto nie paciarpieŭ. Pralot abrynuŭsia na pierahonie pamiž stancyjami Čaromucha i Viledź. Ruch na hetym učastku spynieny, na miesca zdareńnia nakiravali adnaŭlenčyja ciahniki.
Z-za avaryi na stancyjach Salvyčahodsk, Kotłas-Paŭdniovy i Viledź zatrymalisia dziesiać pasažyrskich ciahnikoŭ, jakija kursirujuć pa linii, što złučaje harady Varkutu, Syktyŭkar i Łabytnanhi ź inšymi haradami Rasii. Pasažyraŭ pieravoziać aŭtobusami praz paškodžany ŭčastak, a ź inšaha boku dla ich arhanizavali reziervovyja ciahniki.
Faktyčna ŭ vyniku hetaha Respublika Komi zastałasia biez čyhunačnaha złučeńnia z astatniaj Rasijaj. Abjaznych abo zapasnych ruciej na hetym kirunku niama, tamu puścić ciahniki ŭ abchod razburanaha mosta niemahčyma.
Vidavočcy raskazali, što pierad abrynańniem pačuli rezki ahłušalny huk. Pavodle źviestak urada Archanhielskaj vobłaści, cysterny hruzavoha ciahnika, jakija ŭpali z mosta, byli pustymi, tamu raźlivu naftapraduktaŭ nie adbyłosia.
Ukrainskija manitorynhavyja kanały śćviardžajuć, što siarod mahčymych pryčyn zdareńnia razhladajecca dyviersija. Telehram-kanał Supernova+ apublikavaŭ skrynšot kamientaroŭ u miascovym kanale, dzie adzin z karystalnikaŭ piša pra padryŭ čyhunačnych šlachoŭ. Aficyjnaha paćviardžeńnia hetaj viersii niama.
Abrynuty most źjaŭlajecca častkaj Piačorskaj čyhunki — važnaha transpartnaha kalidora, jaki zabiaśpiečvaje pasažyrskija i hruzavyja pieravozki ŭ paŭnočnyja rehijony Rasii.
Miascovy žychar adznačyŭ, što adnaŭleńnie mosta budzie vielmi składanaj zadačaj. Pavodle jaho słoŭ, heta adziny most na kirunku da Varkuty, pa jakim pastajanna chodziać hruzavyja ciahniki. Alternatyŭnaha maršrutu niama, a aŭtamabilnaj darohi da Varkuty taksama nie isnuje.
U Archanhielskaj vobłaści ŭ suviazi z hetym uviali nadzvyčajnaje stanovišča.
Ciapier čytajuć
Biełaruska hod adpracavała dalnabojščycaj u Jeŭropie. Ciapier sprabuje pastupić u italjanski ŭniviersitet4
Kamientary