U niadzielu ŭ kaściołach adbudziecca aśviačeńnie aŭtamabilaŭ i błasłaŭleńnie kiroŭcaŭ

25 lipienia, u niadzielu, Kaścioł uspaminaje sv. apostała Jakuba i sv. Kryštafa. Śviaty Kryštaf źjaŭlajecca apiekunom vadzicielaŭ, padarožnikaŭ i pilihrymaŭ, a jaho imia z hreč. christophoros aznačaje «toj, jaki nios Chrysta». U hety dzień u kaściołach Biełarusi adbudziecca aśviačeńnie mašyn i błasłaŭleńnie kiroŭcaŭ.

Jak apaviadaje padańnie, adnojčy paśla ciažkaha pracoŭnaha dnia Kryštaf adpačyvaŭ. Razbudziŭ jaho hołas dziciaci, jakoje prasiła, kab jaho pieranieśli na druhi bierah raki. Kryštaf, jaki byŭ vielmi dužy, padchapiŭsia, uziaŭ u ruki svoj kij, jaki słužyŭ jamu padporaju pry pierachodzie praz raku, pasadziŭ na plačo dziciatka i stupiŭ u vadu. Ale z kožnym krokam noša stanaviłasia ŭsio ciažejšaj. Narešcie Kryštaf nie strymaŭsia i spytaŭ: «Chto ty?». U adkaz pačuŭ: «Ja — Jezus, tvoj Zbaviciel. Niesučy Mianie, ty niasieš uvieś śviet, bo Ja — toj, chto jaho stvaryŭ. Ja źjaŭlajusia tvaim Vaładarom, jakomu ty tut słužyš. A kab ty pierakanaŭsia, što ŭsio skazanaje Mnoju, — praŭda, kali vierniešsia, ubi svoj posach u ziamlu — ty ŭbačyš, jak pryhoža jon zakvitnieje». Mienavita hetaja lehienda natchniaje mastakoŭ, jakija malujuć čaściej za ŭsio sv. Kryštafa ź Dziciatkam Jezus na plačach.

Sv. Kryštaf ličycca zastupnikam ad niespadziavanaj śmierci, apiekunom kiroŭcaŭ, marakoŭ, padarožnikaŭ, pilihrymaŭ, a taksama dziaciej, atletaŭ, šachcioraŭ, šukalnikaŭ skarbaŭ, sadoŭnikaŭ, pradaŭcoŭ harodniny; srodkaŭ kamunikacyi;

da jaho źviartajucca pry epidemijach čumy i inšych zaraznych chvarob, pry pahrozie stychii ahniu i vady, zasuchi, bury i hradu, pry chvarobach vačej, pry zubnym bolu, pry ranieńniach. Śviatoha Kryštafa zaličvajuć taksama da 14 zastupnikaŭ u ciažkich žyćciovych abstavinach.

Niahledziačy na toje, što ŭ našaj krainie, zhodna z dadzienymi infarmacyjnych ahienctvaŭ, nazirajecca źnižeńnie kolkaści darožna-transpartnych zdareńniaŭ (u hetym hodzie ich na 13,1% mienš, čym u minułym), na darohach Biełarusi ŭsio jašče hinuć tysiačy čałaviek. Kab supraćstajać hetamu, «śvieckija i kaściolnyja struktury pavinny lepš kaardynavać enierhiju i srodki, prapahandujučy hodnaść čałavieka taksama jak karystalnika daroh», — čytajem u dakumiencie «Ukazańni ab dušpastyrstvie vulicy» (2007 h.) Papskaj rady pastyrstva emihrantaŭ i padarožnikaŭ. Dakumient uklučaje taksama «dekałoh vadziciela» — praviły, jakimi pavinien kiravacca kožny vadziciel-chryścijanin, siarod jakich — «ź luboŭju pierakonvaj vadzicielaŭ nie siadać za rul, kali jany nie ŭ stanie kiravać aŭtamabilem», «akazvaj padtrymku siemjam achviaraŭ darožna-transpartnych zdareńniaŭ», «na darozie abierahaj słabiejšaha» i inš.

Malitva kiroŭcy

Boža, daj mnie ŭpeŭnienuju ruku i zorkaje voka, kab ja nikomu nie pryčyniŭ škody ŭ darozie. Daŭca žyćcia, nie dazvol, kab ja staŭ pryčynaju śmierci albo pryčynaju kalectva tych, kamu Ty daŭ žyćcio. Zachavaj, Panie, ad niaščasnych vypadkaŭ tych, chto padarožničaje sa mnoju. Navučy mianie karystacca aŭtamabilem dla dabra maich bližnich i strymaj spakusu praźmiernaj chutkaści. Učyni, kab charastvo śvietu, stvoranaha Taboju, i radaść Tvajoj łaski zaŭsiody mnie spadarožničali. Amen.

• 0
• 0
• 0
• 0
• 0
• 0
• 0
• 0