Što płanuje biełaruskaja moładź? Dziaŭčaty — palepšyć materyjalnaje stanovišča, chłopcy — stvaryć siamju
Daśledčyki Centra novych idej praviali apytańnie siarod biełaruskaj moładzi i pacikavilisia, siarod inšaha, ich płanami na bližejšyja hady.
Jak adznačajuć aŭtary daśledavańnia, u cełym moładź ( 18‑35 hadoŭ) vybiraje stratehiju minimizacyi ryzyk, a nie stratehiju raźvićcia i rostu. Va ŭmovach, kali makraasiarodździe ŭsprymajecca jak niestabilnaje i ciažkapradkazalnaje, racyjanalnym stanovicca pryjarytet asabistych śfier, jakija lahčej kantralavać.
Tak, na pieršym miescy ŭ śpisie metaŭ apynułasia palapšeńnie materyjalnaha stanovišča (44%). Na druhim — kłopat pra zdaroŭje i asabisty dabrabyt (32%). Pra namier pačać abo raźvivać karjeru zajavili 28% apytanych. Faktyčna kožny čaćviorty suajčyńnik imkniecca da spakojnaha i raźmieranaha žyćcia (24%), a taksama da raźvićcia tvorčych ci asabistych prajektaŭ (23%). Stolki ž respandentaŭ — 23% — nazvali svajoj metaj stvareńnie siamji.
Kali hladzieć na danyja bolš detalova, tema žyćciovych metaŭ akazvajecca adnoj z tych redkich śfier, dzie pamiž chłopcami i dziaŭčynami zafiksavana statystyčna značnaja roźnica.
Mienavita chłopcy čaściej za žančyn zajaŭlali pra płany stvaryć siamju — 28% suprać 18%.
A voś dla dziaŭčat značna bolš važnym źjaŭlajecca palapšeńnie materyjalnaha stanovišča: pra heta zajaviła kožnaja druhaja apytanaja. Siarod chłopcaŭ hety pakazčyk značna nižejšy.
Pry hetym stać baćkami ŭ bližejšyja 3—5 hadoŭ płanuje tolki adzin ź siami respandentaŭ (14% dziaŭčat i 15% chłopcaŭ).
U apytańni ŭziali ŭdzieł 465 respandentaŭ va ŭzroście ad 18 da 35 hadoŭ. Aŭtary śćviardžajuć, što danyja byli pieraŭzvažanyja pavodle połu i rehijona pražyvańnia ŭ adpaviednaści z aficyjnaj statystykaj Biełstata za 2022 hod. Maksimalnaja statystyčnaja pahrešnaść składaje kala 4,5 pracentnych punktaŭ.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć44
Kamientary
Niaŭžo ES, jaki padtrymlivaje, prymusiŭ vykarystać rasiejskuju movu? Ci heta ŭžo CNI zamiest CNI?