Łukašenka: Biełaruś i Siryja majuć namier realizavać trochbakovyja prajekty ź Vieniesuełaj i Kataram

Biełaruś i Siryja majuć namier realizavać trochbakovyja prajekty ŭ śfiery ekanomiki ź Vieniesuełaj i Kataram, zajaviŭ Alaksandr Łukašenka na sustrečy z prezidentam Siryi Bašaram Asadam.

Pavodle słoŭ Łukašenki, jakija cytuje pres-słužba prezidenta, padčas jaho apošniaha vizitu ŭ Vieniesuełu Uha Čavies prapanavaŭ znajści ahulnyja dla Biełarusi, Vieniesueły i Siryi prajekty. Ministry zamiežnych spraŭ troch krain adpracujuć hetaje pytańnie, i najbližejšym časam try prezidenty sustrenucca ŭ Damasku, kab zaćvierdzić hetyja prajekty. «Anałahična my pasprabujem vyjści na cikavyja prajekty z Kataram i ažyćciavić ich najbližejšym časam», — skazaŭ Łukašenka.

Jon paćvierdziŭ hatoŭnaść biełaruskaha boku raźvivać supracoŭnictva ź Siryjaj pa ŭsich aśpiektach, ad vajenna-techničnaha da ŭzajemadziejańnia ŭ ekanomicy i sielskaj haspadarcy. Biełaruski bok hatovy ŭdzielničać u prajektach pa stvareńni sumiesnych vytvorčaściaŭ u Siryi, u realizacyi prahram zakupak traktarnaj i aŭtamabilnaj techniki, arhanizacyi zboračnaj vytvorčaści. «My možam vyrablać razam ź siryjcami na ich terytoryi ŭsio, što jany zachočuć, plus hatovy navučyć ich i vyvieści na ŭzrovień našych śpiecyjalistaŭ pa hetych napramkach… Siryjski bok cikavić raźvićcio elektraenierhii, i my hatovy ŭ hetym udzielničać», — skazaŭ biełaruski kiraŭnik.

Łukašenka taksama zajaviŭ, što Biełaruś vysoka cenić mižnarodnyja namahańni Siryi ŭ blizkaŭschodnim urehulavańni i adznačaje važnuju rolu hetaj krainy ŭ padtrymcy rehijanalnaj biaśpieki.

«My salidarnyja z patrabavańniami mižnarodnaj supolnaści realizavać zakonnaje prava paleścincaŭ na stvareńnie ŭłasnaj dziaržavy», — skazaŭ biełaruski kiraŭnik.

Padčas sustrečy ŭ pašyranym składzie padpisany pakiet dakumientaŭ ab supracoŭnictvie ŭ roznych abłaściach.

U pryvatnaści, padpisana mižviedamasnaje pahadnieńnie ab supracoŭnictvie ŭ vobłaści elektrasuviazi i infarmacyjna-kamunikacyjnych technałohij, Miemarandum ab ŭzajemarazumieńni pamiž Ministerstvam adukacyi Biełarusi i Ministerstvam vyšejšaj adukacyi Siryi. Ministerstvy justycyi dźviuch krain zaklučyli miemarandum ab uzajemarazumieńni pa pytańniach supracoŭnictva.

Byli padpisanyja Miemarandum ab namierach u śfiery dystancyjnaha zandziravańnia Ziamli pamiž Nacyjanalnaj akademijaj navuk Biełarusi i Hienieralnaj arhanizacyjaj dystancyjnaha zandziravańnia Siryi i vykanaŭčyja prahramy na 2011–2012 hady ab techničnym i navukovym supracoŭnictvie ŭ śfiery sielskaj haspadarki. Baki taksama padpisali prahramu pa realizacyi pahadnieńnia pamiž biełaruskim Dziaržstandartam i Siryjskaj Arabskaj arhanizacyjaj pa standartyzacyi i mietrałohii ab supracoŭnictvie ŭ śfiery ŭzajemnaha pryznańnia vynikaŭ acenki adpaviednaści.

Jak zajaviŭ Łukašenka, realizacyja sumiesnych prajektaŭ Biełarusi i Siryi budzie sadziejničać u tym liku ŭmacavańniu biaśpieki dźviuch krain. «U nas jość masa prajektaŭ i napramkaŭ supracoŭnictva, realizacyja jakich moža ŭmacavać nas, a značyć, i našu biaśpieku, i prymusić inšych nas pavažać», — skazaŭ biełaruski kiraŭnik.

Pavodle jaho słoŭ, biełarusy i siryjcy padobnyja pamiž saboj tym, što zaŭsiody zmahalisia i zmahajucca za niezaležnaść i suvierenitet svaich dziaržaŭ. «My vystupajem suprać lubych sposabaŭ nacisku, budź to palityčnyja, ekanamičnyja, ci, nie daj Boža, vajennyja. My cyvilizavanyja ludzi i patrabujem da nas cyvilizavanaha staŭleńnia», — zajaviŭ Łukašenka.

• 0
• 0
• 0
• 0
• 0
• 0
• 0
• 0