Stamatołah Uładzimir Kraŭčanka — baćka Natalli Piatkievič — staŭ «Minčaninam hoda»

U stalicy 11 vieraśnia adbyłasia cyrymonija ŭšanavańnia novych uładalnikaŭ hanarovaha zvańnia «Minčanin hoda».

Jak adznačyŭ staršynia Minharvykankama Mikałaj Ładućka, sioleta ŭznaharody atrymali 13 minčan. Hanarovaje zvańnie prysudžajecca dziesiaty raz. Užo bolš za 100 čałaviek udastojeny hetaha zvańnia «za vysokija dasiahnieńni ŭ pracy, asablivy asabisty ŭkład u sacyjalna-ekanamičnaje i kulturnaje raźvićcio horada». Tradycyjna cyrymonija ŭznaharodžańnia prachodzić u Dzień horada.

Sioleta ŭznaharody ŭručany: u halinie pramysłovaści — hienieralnamu dyrektaru RUP «Biełmiedpreparaty» Viktaru Zalesskamu; transpartu i suviazi — vadzicielu tralejbusa filijała «Tralejbusny park № 4» KUP «Minsktrans» Viačasłavu Pupko; budaŭnictva — kiraŭniku AAT «Trest № 15 «Śpiecbud» DVA «Minskbud» Mikałaju Miłašeŭskamu; ŽKH — ślesaru-santechniku4-ha razradu dziaržaŭnaha daččynaha UP «ŽES № 39 ŽREA Zavodskaha rajona Minska» Viktaru Rydkinu.

U śfiery achovy zdaroŭja hanarovaje zvańnie atrymaŭ hałoŭny ŭrač ustanovy achovy zdaroŭja «7-ja haradskaja stamatałahičnaja paliklinika» Uładzimir Kraŭčanka (baćka pieršaha namieśnika kiraŭnika Administracyi prezidenta Natalli Piatkievič — NN); vyšejšaj adukacyi i navuki — prarektar pa vučebnaj rabocie i sacyjalnych pytańniach Biełaruskaha dziaržaŭnaha ŭniviersiteta infarmatyki i radyjoelektroniki Alaksandr Chmyl; siaredniaj adukacyi — nastaŭnik biełaruskaj movy i litaratury SŠ № 43 Alesia Zianievič; kultury — nastaŭnik muzyki himnazii № 14, kiraŭnik zasłužanaha amatarskaha kalektyvu falkłornaha ansambla «Dudaryki» Dźmitryj Ravienski; fizkultury, sportu i turyzmu — spartsmien-instruktar nacyjanalnaj kamandy Biełarusi pa bijatłonie Darja Domračava; sacyjalnaj abarony nasielnictva — staršynia praŭleńnia Minskaj haradskoj arhanizacyi HA «Biełaruskaje tavarystva invalidaŭ» Ludmiła Kałmykova; handlu i hramadskaha charčavańnia — dyrektar ZAT «Univiersam Pieršamajski» Zinaida Paborcava; bytavoha absłuhoŭvańnia — zasnavalnik PUP «Femistyl» Volha Pryščepava; u pravaachoŭnaj śfiery i orhanaŭ NS — kamandzir adździaleńnia pažarnaj avaryjna-ratavalnaj častki № 24 Savieckaha rajonnaha adździaleńnia Minskaha haradskoha ŭpraŭleńnia MNS Siarhiej Viečar.

Zhodna z rašeńniem Minharvykankama ŭładalniki zvańnia atrymali dypłomy, nahrudnyja znaki i hrašovaje ŭznaharodžańnie ŭ pamiery 25 bazavych vieličyń (875 tys. rubloŭ).

• 0
• 0
• 0
• 0
• 0
• 0
• 0
• 0