Vyznačyŭsia budučy kiraŭnik Kitaja

Namieśnik staršyni Kitajskaj Narodnaj Respubliki Si Czińpiń atrymaŭ pasadu namieśnika staršyni Centralnaj vajskovaj kamisii.

Hetaje pryznačeńnie mnohija naziralniki ličać uzmacnieńniem jaho napaŭaficyjnaha statusu pierajemnika ciapierašniaha kiraŭnika partyi i dziaržavy Chu Czińtaa.

Pryznačeńnie adbyłosia ŭ apošni dzień štohadovaha plenuma kampartyi.

Chu Czińtaa musić chutkim časie syści na piensiju: z pasady kiraŭnika partyi jon sydzie ŭ 2012 hodzie, a kiravańnie dziaržavaj pakinie ŭ 2013-m.

Si Czińpiń ciapier paŭtaraje karjeru Chu Czińtaa, jaki, pierad tym jak stać na čale dziaržavy, taksama byŭ pryznačany ŭ Centralnuju vajskovuju kamisiju. Rašeńnie pavysić Si Czińpinia pryniaŭ Centralny kamitet KPK, jaki składajecca z prykładna 200 kiraŭnikoŭ.

Si Czińpiniu 57 hadoŭ, jon budzie pracavać pad kiraŭnictvam Chu Czińtaa, jaki ciapier uznačalvaje kamisiju.

Hety najvyšejšy orhan vajskovaha kiravańnia adkazvaje za Narodna-vyzvalenčuju armiju Kitaja, dzie słužyć kala 2,3 młn sałdat i aficeraŭ.

Kitajskaja kampartyja imkniecca zahadzia prapracoŭvać pytańni vybaru i prasoŭvańnia kandydata na pasadu kiraŭnika partyi i dziaržavy, kab vyklučyć supiernictva i baraćbu za ŭładu pamiž bujnymi fihurami.

Si Czińpiń staŭ čalcom Pastajannaha kamiteta Palitbiuro ŭ 2007, a na nastupny hod atrymaŭ pasadu namieśnika staršyni KNR. Siem ź dzieviaci dziejnych čalcoŭ Pastajannaha kamiteta ŭ 2012 musiać syści na piensiju, bo da hetaha času jany ŭžo adpracujuć pa dva terminy. Takim čynam, u składzie Pastajannaha kamiteta zastanucca Si Czińpiń i Li Keciań. Si Czińpiń — syn Si Čžunsiunia, adnaho z zasnavalnikaŭ KPK. Tamu karjera Si zbolšaha abumoŭlena jaho svajactvam.

Jon viadomy jak abaronca pryvatnaj inicyjatyvy i zmahar suprać karupcyi. Jaho žonka — viadomaja śpiavačka Pen Lijuań.

Na sustrečy, dzie było vyrašana pytańnie ab pryznačeńni Si Czińpinia, abmiarkoŭvalisia taksama płany raźvićcia krainy na nastupnuju piacihodku. Zamiest zabiaśpiečańnia vysokich tempaŭ ekanamičnaha rostu kiraŭniki Kitaja zasiarodzilisia na skaračeńni razryvu pamiž biednymi i bahatymi, a taksama roźnicy va ŭzroŭni ekanamičnaha raźvićcia prybiarežnych i ŭnutranych pravincyj.

Jany taksama chočuć zaniacca palityčnymi reformami, jakija buduć paklikanyja źbierahčy ekanomiku ad prabuksoŭki.

Usio bolš vostra paŭstaje i pytańnie pravoŭ čałavieka. Za niekalki dzion da plenuma 23 starejšyny KPK nakiravali list, u jakim zaklikali źniać abmiežavańni, jakija nakładajucca na svabodu słova. Kala 100 aktyvistaŭ padpisali taksama pietycyju ab vyzvaleńni z turmy Lu Siaoba, zmahara za pravy čałavieka, jaki atrymaŭ Nobieleŭskuju premiju miru.

Dy i prem'jer-ministr Veń Cziabaa niadaŭna zajaviŭ, što zaklikam da demakratyi i svabody ŭ Kitai bolš nie buduć supracivicca.

Choć hetaja jaho zajava była pieradadzienaja CNN, kitajskija ŚMI nie stali retranślavać jaho dla ŭłasnaj aŭdytoryi.

• 0
• 0
• 0
• 0
• 0
• 0
• 0
• 0