Pierad vybarami na radyjo zabaranili «Pieśniu pra ciešču»

Napiaredadni prezidenckich vybaraŭ z ratacyi Pieršaha nacyjanalnaha kanała Biełaruskaha radyjo źnikli «niesurjoznyja» kampazicyi miascovych vykanaŭcaŭ. Pad niehałosnuju zabaronu taksama trapili Queen, Depeche Mode i navat pieśnia «Deltapłan» rasijskaha śpievaka Mikałaja Naskova.

«Zaprasili na Pieršaje nacyjanalnaje radyjo dla intervju. Redaktar admoviłasia stavić maje pieśni ŭ efir. VYBARY!!!», — taki post źmiaściŭ u svaim tvitery viadomy biełaruski šoŭmen Dźmitryj Uranhiel.

Karespandent «Salidarnasci» źviazałasia ź im, kab raspytać pra situacyju padrabiaźniej. U vyniku my pačuli kamičny dyjałoh, jaki paćviardžaje, da jakoha absurdu i marazmu čaściakom dachodziać biełaruskija dziaržsłužboŭcy napiaredadni prezidenckich vybaraŭ.

— Pradstaŭniki Pieršaha nacyjanalnaha radyjo zaprasili mianie na intervju, — raskazaŭ historyju tydniovaj daŭnaści Dźmitryj Uranhiel. — Pierad žyvym efiram adna supracoŭnica paprasiła kampakt-dysk z maimi pieśniami i pajšła ź im da muzyčnaha redaktara. Praź niekatory čas dziaŭčyna viarnułasia i vybačalnym tonam skazała: «Na žal, my vašyja pieśni pastavić nie možam». Ni «Chałaściaka», ni «Fitnes», ni «Pieśniu pra ciešču». Tolki nie kryŭdujcie, zrazumiejcie mianie…».

«A što ź imi nie tak?» — spytaŭ ja.

«Jany chutkija, žartoŭnyja, niesurjoznyja. A chutka vybary…», — adkazała jana.

«Dobra, bolš času pahutarym ŭ žyvym efiry», — praciahnuŭ ja.

«Ale vy možacie abrać pieśniu kaho-niebudź inšaha», — prapanavała surazmoŭca.

«Tady niešta z Queen.

„Inšaje“.

„Depeche Mode“.

Znoŭ admova i prapanova nazvać pieśniu ruskamoŭnaha vykanaŭcy. Ja ŭspomniŭ pieśniu „Deltapłan“ Mikałaja Naskova. I heta taksama vyjaviŭsia nie varyjant!

Šoŭmen padahulniŭ, što padčas efiru ŭ vyniku ŭsio-tki była pastaŭlena jaho pieśnia. Heta była pavolnaja kampazicyja šmathadovaj daŭniny, jakuju Dźmitryj Uranhiel śpiavaje ŭ duecie z Volhaj Płotnikavaj — " Znali, my pridumali vsio sami…».

— Upieršyniu za piatnaccać hadoŭ majoj dziejnaści sutyknuŭsia z takoj situacyjaj, — prakamientavaŭ historyju Dźmitryj. — Upieršyniu maje pieśni byli padvierhnutyja cenzury. Situacyja davoli absurdnaja, bo hetyja kampazicyi, taksama jak, da prykładu, mnohija pieśni «Dyskateki Avaryi», «Hi-Fi», Jevy Polnaj — niasuć pazityŭ, uzdymajuć nastroj! Ale, jak ja zrazumieŭ, na hetaj radyjostancyi ciapier dziejničaje ŭstanoŭka davać słuchačam muzyku cichuju, spakojnuju, pavolnuju…

Adznačym, što Pieršy nacyjanalny kanał Biełaruskaha radyjo źjaŭlajecca častkaj Nacyjanalnaj dziaržaŭnaj teleradyjokampanii, jakuju ŭznačalvaje Alaksandr Zimoŭski.

• 0
• 0
• 0
• 0
• 0
• 0
• 0
• 0