Advakata Sańnikava taksama pryciahvajuć da dyscyplinarnaj adkaznaści.
Miniust užyŭ sankcyi da niekatorych advakataŭ za dziejańni, źviazanyja z padziejami 19 śniežnia ŭ Miensku. Advakatcy Valancinie Buśko anulavali licenziju. Advakata Sańnikava Paŭła Sapiełku pryciahvajuć da dyscyplinarnaj adkaznaści.
Jak paviedamlaje aficyjny sajt ministerstva, 4 studzienia kalehija Miniusta padtrymała rašeńnie Kvalifikacyjnaj kamisii pa pytańniach advakackaj dziejnaści ŭ Biełarusi za 3 studzienia ab anulavańni licenzii advakatu Haradzienskaj abłasnoj kalehii Valancinie Buśko. Pryčyna anulavańnia licenzii — «parušeńnie dziejnaha zakanadaŭstva, jakoje vyjaviłasia va ŭdziele ŭ niesankcyjanavanym mitynhu 19 śniežnia 2010 hoda, jaki pryvioŭ da masavych biesparadkaŭ z naniasieńniem škody dziaržaŭnym ustanovam». Za ŭdzieł u akcyi Buśko była pryciahnutaja da administracyjnaj adkaznaści.
Akramia taho, kalehija Miniusta razhledzieła dziejnaść asobnych advakataŭ, jakija ažyćciaŭlajuć abaronu asobaŭ, što ŭdzielničali ŭ akcyi 19–20 śniežnia ŭ Miensku.
U pryvatnaści, pavodle infarmacyi ministerstva, vyjaŭlena, što advakat
«dapuściŭ niekarektnyja vykazvańni na adras advakatury jak niezaležnaha pravavoha instytuta», pastaviŭ pad sumnieŭ abhruntavanaść dziejańniaŭ Ministerstva justycyi jak dziaržaŭnaha licenzujučaha orhana, zajaviŭšy, što heta «presinh z boku dziaržavy na dziejnaść dziaržaŭnych advakataŭ».
U suviazi z hetym Miniust nakiravaŭ na adras Minskaj haradskoj kalehii advakataŭ pradstaŭleńnie ab pryciahnieńni Sapiełki da dyscyplinarnaj adkaznaści. Prapanujecca taksama razhledzieć pytańnie ab metazhodnaści jaho znachodžańnia ŭ składzie prezidyuma Minskaj haradskoj kalehii advakataŭ.
Paviedamlajecca taksama, što kalehija razhledzieła publikacyi, raźmieščanyja ŭ drukavanych i elektronnych ŚMI sa spasyłkaj na advakataŭ. Ustanoŭlena, što advakaty Minskaj haradskoj kalehii advakataŭ Iryna Burak (advakat lidera Abjadnanaj hramadzianskaj partyi Anatola Labiedźki) i Marjana Siamieška (advakat žurnalistki Natalli Radzinaj) z pradstaŭnikami ŚMI nie razmaŭlali i intervju nie davali. Pa dadzienym fakcie jany majuć namier nakiravać u ŚMI abviaržeńnie infarmacyi, raźmieščanaj ad ich imia.
Miniust nakiravaŭ list u Ministerstva infarmacyi «dla dačy acenki dziejańniam žurnalistaŭ i ŚMI, jakija dapuścili praduziatuju infarmacyju ab dziejnaści pravaachoŭnych orhanaŭ ad imia advakataŭ».
«Inšyja advakaty papiaredžanyja pra bolš karektnyja vykazvańni ŭ ŚMI, jakija b nie davali padstavaŭ da skažeńnia realnych faktaŭ i atrymanaj infarmacyi»,— paviedamlaje sajt Miniusta.
Kamientary