Jeŭropa patrabuje novych vybaraŭ

Parłamient ES adzinadušna pryniaŭ samuju žorstkuju ŭ historyi rezalucyju pa Biełarusi. Zaklikaje da ekanamičnych sankcyj.

Jak paviedamlaje BiełaPAN sa spasyłkaj na pres-słužbu Jeŭraparłamienta, dakumient «rašuča asudžaje žorstkija represii z boku palicyi i KDB u dzień vybaraŭ» i zaklikaje «pravieści niezaležnaje i biesstarońniaje rasśledavańnie taho, što adbyłosia», pad ehidaj Arhanizacyi pa biaśpiecy i supracoŭnictvie ŭ Jeŭropie (ABSIE).

Nahadajem, Jeŭraparłamient taksama zaklikaje Saviet ES uvieści zabaronu na vydaču viz vyšejšym biełaruskim čynoŭnikam, a taksama pradstaŭnikam sudovych i pravaachoŭnych orhanaŭ, jakija majuć dačynieńnie da falsifikacyj vynikaŭ vybaraŭ i represij u dačynieńni da apazicyi, aktyvistaŭ hramadzianskaj supolnaści i žurnalistaŭ, a taksama zamarozić ich rachunki ŭ krainach Jeŭrasajuza.

U dakumiencie padkreślivajecca, što hetyja sankcyi pavinny dziejničać da taho času, pakul biełaruskija ŭłady nie vyzvalać usich palityčnych źniavolenych i zatrymanych padčas akcyj pratestu i nie źnimuć ź ich abvinavačańni.

Akramia taho, rezalucyja prapanuje razhledzieć mahčymaść ekanamičnych sankcyj u dačynieńni da biełaruskaha ŭrada, u pryvatnaści zamarozku luboj finansavaj dapamohi, što vydzialajecca praź Mižnarodny valutny fond, Jeŭrapiejski inviestycyjny bank i Jeŭrapiejski bank rekanstrukcyi i raźvićcia.

Pry hetym u dakumiencie adznačajecca: ES pavinien ablehčyć praceduru atrymańnia viz dla biełaruskich hramadzian, pavialičyć padtrymku hramadzianskaj supolnaści i niezaležnych maśmiedyja Biełarusi. Uzhadvajucca, u pryvatnaści, takija ŚMI, jak telekanał «Biełsat», radyjostancyi «Jeŭrapiejskaje radyjo dla Biełarusi» i «Radyjo Racyja». Adnačasova prapanujecca prypynić supracoŭnictva ź dziaržaŭnymi ŚMI. Niaŭradavyja arhanizacyi, jakim admoŭlena ŭ rehistracyi ŭ Biełarusi, pavinny być zarehistravanyja ŭ krainach ES i mieć mahčymaść atrymlivać dapamohu ŭ ramkach jeŭrapiejskich prahram.

Radyjo «Svaboda» źmiaščaje prajekt rezalucyi, vystaŭleny na hałasavańnie. Kančatkovy tekst pryniataj rezalucyi z papraŭkami, uniesienymi padčas hałasavańnia, budzie vystaŭleny na sajcie paźniej.

Rezalucyja, Eŭrapiejskaha parlamentu adnosna sytuacyi ŭ Biełarusi

Eŭrapiejski parlament,

— majučy na ŭvazie papiaredniuju rezalucyju Eŭraparlamentu adnosna sytuacyi ŭ Biełarusi, u pryvatnaści rezalucyju ad 17 śniežnia 2009 h.,

— majučy na ŭvazie Rašeńnie Rady 2010/639/CFSP ad 25 kastryčnika 2010 h. adnosna abmiežavańniaŭ u dačynieńni da peŭnych aficyjnych asobaŭ Biełarusi, praciahnuć ich da 31 kastryčnika 2011 h.,

— majučy na ŭvazie Rašeńnie Rady zamiežnych spraŭ ad 25 kastryčnika 2010 h.,

— majučy na ŭvazie zajavy Ofisu demakratyčnych instytucyjaŭ i pravoŭ čałavieka ABSE i Parlamenckaj asamblei ABSE «Ab papiarednich vysnovach adnosna prezydenckich vybaraŭ u Biełarusi» ad 20 śniežnia 2010 h.,

— majučy na ŭvazie Praviła 110 Rehlamentu,

A. U suviazi z tym, što Praskaja deklaracyja samitu Ŭschodniaha partnerstva znoŭ paćvierdziła, u tym liku i adnosna Biełarusi, addanaść pryncypam mižnarodnaha zakonu i asnoŭnym kaštoŭnaściam, u ich liku demakratyi, viaršenstva zakonu i pavahi da pravoŭ čałavieka i asnoŭnych svabod,

B. U suviazi z tym, što Rada 25 kastryčnika 2010 h. «zaklikała ŭłady Biełarusi zabiaśpiečyć praviadzieńnie prezydenckich vybaraŭ u adpaviednaści ź mižnarodnymi standartami i normami demakratyčnych vybaraŭ ABSE i AAN,

C. U suviazi z tym, što Biełaruś pryniała na siabie abaviazańni ŭličyć rekamendacyi ABSE i jaho Ofisu demakratyčnych instytucyjaŭ i pravoŭ čałavieka adnosna ŭdaskanalvańnia vybarčaha kodeksu Biełarusi z metaj pryvieści jaho ŭ adpaviednaść mižnarodnym standartam demakratyčnych vybaraŭ i kansultavacca adnosna prapanavanych źmienaŭ z ABSE; u suviazi z tym, što parlament Biełarusi pryniaŭ reformu Vybarčaha kodeksu biez papiaredniaj kansultacyi z ABSE,

D. U suviazi z tym, što Rada «iznoŭ paćvierdziła svaju hatovaść pašyrać dačynieńni ź Biełaruśsiu ŭ zaležnaści ad raźvićcia Biełarusi ŭ nakirunku da demakratyi, pavahi da pravoŭ čałavieka i viaršenstva zakonu, a taksama hatovaść dapamahać Biełarusi ŭ dasiahnieńni hetych metaŭ."

E. U suviazi z tym, što Rada, paśla acenki prahresu ŭ Biełarusi, vyrašyła praciahnuć abmiežavalnyja zachady suprać peŭnych aficyjnych asobaŭ Biełarusi, ale prypynić ŭžyvańnie vizavych sankcyjaŭ na pajezdki ŭ EZ, da 31 kastryčnika 2011 h.,

F. U suviazi z tym, što ŭ adpaviednaści z zajavami PA ABSE i Ofisu demakratyi i pravoŭ čałavieka ABSE «Ab papiarednich vysnovach adnosna prezydenckich vybaraŭ u Biełarusi» peŭny prahres možna adznačyć u časie vybarčaha pracesu, ale jon azmročany surjoznymi parušeńniami ŭ časie hałasavańnia i hvałtam u dzień vybaraŭ 19 śniežnia,

G. U suviazi z tym, što bolš za 700 čałaviek byli źniavolenyja za ich udzieł u demanstracyi 19 śniežnia ŭ Miensku, balšynia ź ich byli vyzvalenyja paśla adbyvańnia karotkich terminaŭ źniavoleńnia pavodle administracyjnych prysudaŭ, tym časam jak 24 apazycyjnyja žurnalisty i aktyvisty, u tym liku 6 kandydataŭ u prezydenty, byli abvinavačanyja «u arhanizacyi masavych biesparadkaŭ» i im pahražaje da 15 hadoŭ źniavoleńnia, a jašče 14 čałaviek mohuć być asudžanyja takim ža čynam nieŭzabavie,

H. U suviazi z tym, što razhon milicyjaj demanstracyi 19 śniežnia 2010 h. i dalejšyja zachady pravaachoŭnych orhanaŭ suprać demakratyčnaj apazycyi, svabody medyjaŭ i hramadzianskaj supolnaści byli asudžanyja prezydentam Eŭraparlamentu, vysokimi pradstaŭnikami EZ i Hieneralnym sakratarom AAN,

I. U suviazi z tym, što advakaty, jakija pradstaŭlajuć demakratyčnych aktyvistaŭ, apazycyjaneraŭ i ich rodnych, nie dapuskajucca da źniavolenych,

1. Pryznaje, što adpaviedna z papiarednimi vysnovami PA ABSE i Ofisu demakratyčnych instytucyjaŭ i pravoŭ čałavieka ab tym, što prezydenckija vybary 19 śniežnia 2010 nie adpaviadali mižnarodnym standartam svabodnych, spraviadlivych i prazrystych vybaraŭ; pryznaje, što hetaje hałasavańnie stałasia stračanaj mahčymaściu dla demakratyzacyi Biełarusi, i zaklikaje, u suviazi sa šmatlikimi surjoznymi parušeńniami, adznačanymi ABSE, da novych vybaraŭ, jakija b byli praviedzienyja adpaviedna z svabodnymi i demakratyčnymi normami i standartami ABSE;

2. Asudžaje ŭžyvańnie suprać pratestoŭcaŭ hrubaj siły milicyjaj i KDB u dzień vybaraŭ, asabliva žorstki napad na U. Niaklajeva, parušeńnie pravoŭ na svabodu schodaŭ i vykazvańnia, a taksama pravoŭ čałavieka, i vykazvaje zakłapočanaść sprobami ŭładaŭ Biełarusi ŭziać pad apieku Daniła Sańnikava, 3-hadovaha syna kandydata ŭ prezydenty Andreja Sańnikava i žurnalistki Iryny Chalip, jakija aboje zastajucca źniavolenyja ad 19 śniežnia;

3. Rezka asudžaje aryšt i zatrymańni mirnych demanstrantaŭ i balšyni kandydataŭ u prezydenty, lideraŭ demakratyčnaj apazycyi i vialikaj kolkaści hramadzianskich aktyvistaŭ, žurnalistaŭ, nastaŭnikaŭ i studentaŭ, jakim pahražajuć prysudy da 15 hadoŭ źniavoleńnia; zaklikaje da niezaležnaha i abjektyŭnaha raśśledavańnia pad ehidaj ABSE; zaklikaje da nieadkładnaha spynieńnia palityčna matyvavanych prysudaŭ;

4. Asudžaje represii i zaklikaje ŭłady Biełarusi nieadkładna spynić usie formy hvałtu, pieraśledu i zapałochvańnia aktyvistaŭ hramadzianskaj supolnaści, rejdy, pieratrusy i kanfiskacyju materjałaŭ u pryvatnych pamiaškańniach, pradstaŭnictvach niezaležnych śmi i ofisaŭ hramadzkich arhanizacyjaŭ, a taksama vyklučeńniaŭ z universytetaŭ i zvalnieńniaŭ z pracy;

5. Patrabuje nieadkładnaha i biezumoŭnaha vyzvaleńnia ŭsich źniavolenych u dzień vybaraŭ i paśla vybaraŭ, u tym liku i źniavolenych, pryznanych Amnesty International viaźniami sumleńnia; zaklikaje ułady Biełarusi zabiaśpiečyć nieabmiežavany dostup svajakoŭ, jurystaŭ i medykaŭ da źniavolenych;

6. Vykazvaje škadavańnie adnosna rašeńnia ŭładaŭ Biełarusi zakryć ofis ABSE ŭ Biełarusi i zaklikaje ŭłady Biełarusi admianić hetaje rašeńnie;

7. Asudžaje blakadu ŭ internecie šerahu bujnych internet-staronak, u tym liku sacyjalnych sietak i apazycyjnych veb-sajtaŭ u dzień vybaraŭ u Biełarusi; padkreślivaje, što ciapierašni zakon ab ŚMI ŭ Biełarusi nie adpaviadaje mižnarodnym standartam i tamu zaklikaje biełaruskija ułady pierahledzieć i źmianić jaho;

8. Zaklikaje Radu, Kamisiju i vysokich pradstaŭnikoŭ EZ pierahledzieć palityku EZ adnosna Biełarusi, u tym liku ŭžyć ekanamičnyja sankcyi i zamarozić usiu makrafinansavuju dapamohu praz kredyty MVF, aperacyi Eŭrapiejskaha investycyjnaha banku i Eŭrapiejskaha banku rekanstrukcyi i raźvićcia; padkreślivaje, što aryjentacyja na Eŭrapiejskuju palityku dobrasusiedztva i nacyjanalnaj dapamohi dla Biełarusi pavinna być pieranakiravanaja i pravodzicca ŭ sfery padtrymki hramadzianskaj supolnaści; nahadvaje pra istotnaść efektyŭnaha vykarystańnia Eŭrapiejskaj inicyjatyvy ŭ spravie demakratyi i pravoŭ čałavieka;

9. Zaklikaje Kamisiju padtrymać usimi finansavymi i palityčnymi srodkami vysiłki hramadzianskaj supolnaści, niezaležnych ŚMI (u tym liku TV Biełsat, Eŭrapiejskaha radyjo dla Biełarusi, Radyjo Racyja i inšych) i niedziaržaŭnych arhanizacyjaŭ u Biełarusi, jakija raźvivajuć demakratyju i supraćstajać režymu; bačyć nieabchodnaść aktyvizavać i zaachvočvać suviazi biełaruskich niedziaržaŭnych arhanizacyjaŭ ź mižnarodnaj supolnaściu; razam z tym zaklikaje Kamisiju prypynić ciapierašniaje supracoŭnictva i adklikać dapamohu dziaržaŭnym ŚMI ŭ Biełarusi;

10. Zaklikaje Eŭrapiejskuju Kamisiju raźvivać mechanizm rehistracyi niedziaržaŭnych arhanizacyjaŭ, jakim admoŭlena ŭ rehistracyi ŭ Biełarusi z palityčnych pryčynaŭ, dla taho, kab dać im mahčymaść karystacca prahramami EZ;

11. Zaklikaje Kamisiju praciahvać i pavialičvać finansavuju dapamohu Eŭrapiejskamu humanitarnmau universytetu (EHU), jaki mieścicca ŭ Vilni (Litva), pavialičyć kolkaść stypendyjaŭ dla biełaruskich studentaŭ, represavanych za ich hramadzianskuju aktyŭnaść i vyklučanych z universytetaŭ i zrabić uniosak u kanferencyju donaraŭ «Salidarnaść ź Biełaruśsiu», zaplanavanuju na 2/02/2011 i nastupnuju kanferencyju ŭ Vilni 3–4/02/2011;

12. Zaklikaje Radu, Kamisiju i Viarchoŭnuju pradstaŭnicu EZ nieadkładna adnavić vizavyja zabarony ŭ dačynieńni da kiraŭnikoŭ Biełarusi i pašyryć ich na dziaržaŭnych čynoŭnikoŭ, a taksama supracoŭnikaŭ pravaachoŭnych orhanaŭ i siłaŭ biaśpieki, jakija mohuć być adkaznymi za parušeńni ŭ časie hałasavańnia i paślavybarčyja žorstkija represii i aryšty pradstaŭnikoŭ apazycyi, a taksama zamarozić ich bankaŭskija aktyvy; źviartaje ŭvahu, što sankcyi pavinny zastavacca ŭ sile jak najmieniej da vyzvaleńnia ŭsich palityčnych źniavolenych i poŭnaha źniaćcia ź ich abvinavačańniaŭ; vitaje dobryja prykłady ŭradu Polščy i parlamentu Litvy, jakija ŭviali ŭ dziejańnie vizavyja abmiežavańni dla pradstaŭnikoŭ režymu ŭ Miensku i razam z tym ablehčyli pajezdki ŭ Eŭraźviaz dla biełaruskich hramadzianaŭ;

13. Zaklikaje Radu razhladzieć mahčymaść prypynieńnia ŭdziełu Biełarusi va Ŭschodnim partnerstvie na samicie Uschodniaha partnerstva ŭ Budapešcie, kali da hetaha nia budzie prymalnaha tłumačeńnia i značnaha palapšeńnia sytuacyi ŭ Biełarusi, pry hetym prypynieńnie nie raspaŭsiudžvajecca na niaŭradavyja arhanizacyi i hramadzianskuju supolnaść;

14. Zaklikaje Kamisiju i Radu aktyvizavać pieramovy ŭ spravie pahadnieńnia ab readmisii dla spraščeńnia vizavaha režymu, u tym liku i dastupnych vizavych zboraŭ ŭ metach spraščeńnia kantaktaŭ pamiž ludźmi;

15. Vykazvaje spadziavańnie, što krainy-siabry EZ nie asłabiać dziejańni Eŭraźviazu dvuchbakovymi kantaktami ź biełaruskim režymam, što asłabiła b aŭtarytet i efektyŭnaść eŭrapiejskaj źniešniaj palityki;

16. Vykazvaje mierkavańnie, što spartovyja mierapryjemstvy, takija jak Čempijanat Śvietu pa chakiei ŭ 2014, nia mohuć być praviedzienyja ŭ Biełarusi, pakul u hetaj krainie buduć zastavacca palitviaźni;

17. Vykazvaje škadavańnie ŭ suviazi z krokami Rasiejskaj Federacyi, jakaja pryznała vybary i rascaniła represii jak «unutranuju spravu», rekamenduje Eŭrakamisii raspačać dyjaloh, kansultacyi i palityčnuju kaardynacyju z susiedziami Biełarusi, jakija nie ŭvachodziać u EZ, ale jakija tradycyjna majuć asablivyjaia adnosiny z hetaj krainaj i adnačasna źjaŭlajucca partnerami EZ — a mienavita, Rasiejaj i Ŭkrainaj — kab maksymalna pavysić efektyŭnaść palityki EZ u dačynieńni da Biełarusi, a taksama supracoŭničać u spravie naležnaha ŭraŭnavažańnia reakcyi na niedachop demakratyi i parušeńni pravoŭ čałavieka ŭ Biełarusi ź nieabchodnaściu paźbiehnuć jaje mižnarodnaj izalacyi.

18. Daručaje staršyni nakiravać hetuju rezalucyju ŭ Radu Eŭropy, Eŭrapiejskuju Kamisiju, Viarchoŭnamu pradstaŭniku, dziaržavam-siabram EZ, prezydentu, parlamentu i ŭradu Biełarusi, Parlamenckaj Asamblei Rady Eŭropy i ABSIE.

• 0
• 0
• 0
• 0
• 0
• 0
• 0
• 0