23 lutaha Źmitra Daškieviča pieraviazuć z Žodzina ŭ Minsk

Spravu lidara «Maładoha frontu» (zarehistravany ŭ Čechii) Źmitra Daškieviča pieradali ŭ sud Maskoŭskaha rajona Minska. Źmicier skazaŭ pra heta svajmu baćku padčas spatkańnia 20 lutaha.

Viačasłaŭ Daškievič raspavioŭ, što «syn na ŭmovy ŭtrymańnia nie skardziŭsia. Vyhladaŭ dobra i navat uśmichaŭsia. Tak što mnie trochi lahčej stała».

Natalla Jasievič, maci siabra Źmitra Daškieviča, zabrała rečy ŭ śledčaha, jaki rasśledavaŭ spravu lidara «Maładoha frontu».

Jana raspaviała «Narodnaj Voli»: «Ja zabirała rečy ŭ śledčaha ŭ sieradu. Źmicier sam u liście paprasiŭ mianie heta zrabić. Jakija rečy? Płašč-pałatka, hadzińnik i pusty hamaniec. Ja prasiła, kab viarnuli noŭtbuk. Chopić daryć užo noŭtbuki, a to zabirajuć i nie viartajuć nikoli. A śledčy mnie skazaŭ, što noŭtbuk u prakuratury.

Majho ž syna taksama vyklikali na dopyt u vajskovuju kontrraźviedku. A tut mnie susiedzi skazali, što ŭ piatnicu pryjechali ŭ maju viosku Zajamačnaja, heta ŭ Minskim rajonie, 6 čałaviek. Jany chadzili pa chatach, kazali, što źjaŭlajucca supracoŭnikami KDB. Zapytvali, kali moj syn Źmicier pryjazdžaŭ dadomu, z kim jon byŭ, ci byli ŭ jaho jakija-niebudź rečy.

Jany padychodzili da voknaŭ i hladzieli ŭ chatu, ale dźviery łamać nie stali.

U chacie nikoha nie było. Paprasili susiedziaŭ telefanavać učastkovamu, infarmacyju pra jaho roznuju dakładvać — z kim jon, u kolki hadzin bačyli, ci maje pry sabie niejkija pakunki i ŭsio takoje».

Źmitra Daškieviča zatrymali za niekalki hadzin da pačatku akcyi 19 śniežnia. Za dvoje sutak da zatrymańnia Źmicier pisaŭ u skajpie, što znachodzicca ŭ arandavanaj kvatery, bo nie choča, kab jaho zatrymali adrazu paśla vychadu na vulicu, kab izalavać na čas praviadzieńnia vuličnaj akcyi ŭ dzień hałasavańnia. A ŭžo za sutki da zatrymańnia jon napisaŭ, što kvatera zabłakavanaja — u padjeździe i kala jaho ludzi ŭ cyvilnym. U apošnim svaim paviedamleńni jon napisaŭ, što vyrašyŭ sa svaimi siabrami pasprabavać dajści da Kastryčnickaj płoščy. Paźniej stała viadoma, što Źmitra Daškieviča i Eduarda Łobava zatrymali litaralna praź niekalki chvilin paśla vychadu z doma. Na vulicy da ich padyjšli niekalki čałaviek i adrazu zaviazałasia bojka. Ciapier tyja ludzi fihurujuć u spravie jak paciarpiełyja.

23 lutaha Źmitra Daškieviča pieraviazuć z žodzinskaha SIZA ŭ minski śledčy izalatar, što na vulicy Vaładarskaha. Pakolki kryminalnaja sprava suprać lidara «Maładoha frontu» užo nakiravana ŭ sud Maskoŭskaha rajona, to ciapier pracesa daviadziecca čakać niadoŭha.

• 0
• 0
• 0
• 0
• 0
• 0
• 0
• 0