Udzielniki kanferencyi prapanavali nazvać imiem «Našaj Nivy» praspekt
Navukova-daśledčaja kanferencyja da 100-hodździa hazety «Naša Niva» adbyłasia siońnia ŭ Instytucie historyi NAN.
Navukova-daśledčaja kanferencyja da 100-hodździa hazety «Naša Niva» adbyłasia siońnia ŭ Instytucie historyi NAN. Jaje arhanizataram vystupiŭ sektar histaryjahrafii i metadalohii histaryčnych daśledvańniaŭ, jaki ŭznačalvaje Valancina Janoŭskaja. Raniej hety sektar nazyvaŭsia adździełam kapitalistyčnaj historyi, jaho kuryravaŭ Michaś Bič, viadomy daślednik «našaniŭskaj» spadčyny, jakomu sioleta spaŭniajecca 70 hadoŭ.
Napačatku vystupiŭ supracoŭnik hetaha sektaru Andrej Unučak, aŭtar navukovaj dysertacyi na temu «Naša Niva» i biełaruski nacyjanalny ruch: 1906-1915 hh.». Jon akreśliŭ asnoŭnyja temy dalejšaj dyskusii. Unučak kazaŭ pra toje, što «našaniŭcy» ŭ pačatku 20 st., niahledziačy na nie samy vialiki resursavy i finansavy patencyjał zmahli raspracavać prahramy reformaŭ u bolšaść sferach hramadztva, a taksama zmahli značna paŭpłyvać na chadu historyi. Unučak padkreśliŭ, što za adnosna nievialiki pramiežak času «našaniŭcy» zmahli padrychtavać nacyjanalnuju elitu, heta vyklučny prykład u suśvietnaj praktycy.
Paśla byli dakłady ad imia inšych udzielnikaŭ kanferencyi. Aleh Janoŭski z histfaku BDU kazaŭ pra faktyčnaje stvareńnie biełaruskaha ŭniversyteta ŭ Vilni, jaki znajšoŭ svajo adlustravańnie na staronkach «Našaj Nivy».
Akademik Michaś Kaściuk i dekan histaryčnaha fakultetu BDPU imia M.Tanka Mikałaj Zabaŭski zbolšaha spynilisia na tvorčaści i daśledavańniach Michasia Biča.
Ź nievialikim słovam vystupiŭ viadomy historyk Zachar Šybieka. Udzielniki kanferencyi vykazvali dumki, što nazvu «Naša Niva» varta nadać jakomu-niebudź mienskamu praspektu. Taksama prysutnyja zhadzilisia, što akurat zaraz nadyšoŭ čas zapačatkavać novyja metady ŭ vyvučeńni «našanivaznaŭstva», bo staryja ŭžo nie zusim aktualnyja dla siońniašnich realij.
Mnie vypaŭ honar pryvitać ad imia siońniašniaj redakcyi «Našaj Nivy» ŭdzielnikaŭ kanferencyi. Raskazać pra stan u jakim ciapier znachodzicca vydańnie. Pra asnoŭnyja dasiahnieńni i pieraškody, ź jakimi sutykajucca supracoŭniki «Našaj Nivy».
Skončyŭ kanferencyju ŭsio toj ža Andrej Unučak, jaki ŭ niekalkich słovach padsumavaŭ usio prahučanaje.
Kamientary