Da apošniaha času livijskaha dyktatara Kadafi ź ciepłynioj prymali ŭ mahutniejšych jeŭrapiejskich krainach, a taksama ŭ Rasii.
Da apošniaha času livijskaha dyktatara Kadafi ź ciepłynioj prymali ŭ mahutniejšych jeŭrapiejskich krainach, a taksama ŭ Rasii
U suviazi z dramatyčnymi padziejami ŭ Livii ŭsio čaściej hučać abvinavačvańni ŭładaŭ Biełarusi ŭ sumnieŭnych hiešeftach ź livijskim režymam. Najpierš heta datyčyć padazreńniaŭ našaj krainy ŭ faktach prodažu livijskim uładam zbroi. Pieršaja sustreča Alaksandra Łukašenki z Muamaram Kadafi adbyłasia ŭ 2000 h. u Livii. Z toj sustrečy zachavałasia videa, na jakim bačna, jak Łukašenka doryć svajmu kalehu Karan ručnoj raboty, zrobleny biełaruskimi majstrami. Pry hetym kiraŭnik Biełarusi havoryć, što «Ałach biaroh vas ad samaj strašnaj i śmiertanosnaj zbroi. Ciapier jon (Karan — zaŭv. nn.by) budzie abierahać vas».
U Biełaruś z aficyjnym vizitam Kadafi naviedaŭsia 3 listapada 2008 h. Aficyjnaj metaj sustrečy z Łukašenkam było abmierkavańnie pytańniaŭ handlova-ekanamičnaha dy inviestycyjnaha supracoŭnictva. Zdahadki pra toje, što z tych sustreč nie patrapiła ŭ kadry aficyjnaj chroniki, a mienavita — handal zbrojaj, źjaŭlalisia i raniej. Novyja viersii źjavilisia ŭ suviazi z apošnimi livijskimi padziejami: zachodniaja presa piša pra zahadkavyja avijarejsy pamiž Biełaruśsiu i Livijaj dy razvažaje pra mahčymaści ŭciokaŭ siamji Kadafi ŭ Biełaruś.
Adnačasova z paviedamleńniami pra biełaruski śled u Livii źjaŭlajecca infarmacyja pra reakcyju Zachadu na padziei ŭ Livii — vizavyja sankcyi ŭ dačynieńni da siamji Kadafi i najbližejšaha atačeńnia, zamarožvańnie rachunkaŭ. Tym časam, niamieckaja lavackaja hazieta Die Tageszeitung nahadvaje, što nie tak daŭno livijskaha dyktatara z pryjaznaściu prymali nie tolki ŭ Biełarusi, ale i ŭ mahutniejšych jeŭrapiejskich krainach, a taksama ŭ Rasii. Ciepłynia tych pryjomaŭ, kali ŭhledziecca ŭ podpisy da admysłovaj fotapadborki «Naš siabar Muamar»/Unser Fruend Muammar, tłumačycca banalnaj prahmatyčnaściu — sustrečy ź livijskim dyktataram zakančvalisia dla jeŭrapiejcaŭ miljardnymi ŭhodami ŭ śfiery naftazdabyčy i handlu.
Voś jak vyhladaje chranałohija zvyšprybytkovych sustreč Muamara Kadafi ź jeŭrapiejskimi lidarami pavodle Die Tageszeitung:
15 kastryčnika 2004 h. Sustreča Muamara Kadafi z Hierchardam Šroderam adkryła šlach niamieckim kampanijam, Siemens u tym liku, na livijski rynak.
29 maja 2007 h. Sustreču z Muamaram Kadafi tahačasny premjer Vialikabrytanii Toni Błer nazvaŭ «pazityŭnaj i kanstruktyŭnaj». Čamu i Intaresy brytanskich naftavych kampanij Shell i BP u Livii vymiarajucca miljardami dalaraŭ.
10 śniežnia 2007 h. Muamar Kadafi i Nikala Sarkazi. Niezadoŭha da vizitu livijskaha kiraŭnika ŭ Francyju, Sarkazi zajaviŭ pra namier padpisać z Kadafi šerah kantraktaŭ na sumu ŭ 10 młrd jeŭra. Havorka išła pra mahčymuju pabudovu AES u Livii. Raniej syn Kadafi kazaŭ pra namiery nabyć u Francyi samaloty Aerobus na sumu ŭ 3 młrd jeŭra, a taksama 14 źniščalnikaŭ Rafale.
17 śniežnia 2007 h. U Madrydzie prajšła sustreča Muamara Kadafi z kiraŭnikom ispanskaha ŭrada Chase Łuisam Sapateram. Vynik: naftavyja ŭhody i budaŭničyja kantrakty na miljardy dalaraŭ.
1 listapada 2008 h. Muamar Kadafi sustreŭsia ŭ Maskvie ź Dźmitryjem Miadźviedzievym.
Abmiarkoŭvalisia pytańni handlova-ekanamičnaha supracoŭnictva ŭ enierhietyčnaj i vajskova-techničnaj śfiery.
2 sakavika 2009 h. Sustreča premjer-ministra Italii Silvio Bierłuskoni i kiraŭnika Livii skončyłasia atrymańniem lhotaŭ dla italjanskaj naftavaj kampanii ENI.
Kamientary