KDB zdoleła ŭrazić navahrudskaha pastara z dapamohaj kłasičnych pryjomaŭ
Śledčy stvaryŭ uražańnie, što ŭsio viedaje, i havaryŭ na temu, jakaja cikaviła padślednaha.
Uładzimir Kačahur, siabar vybarčaha štaba Vitala Rymašeŭskaha, udzielnik Płoščy, pastar carkvy “Novaje žyćcio” paśla naviedvańnia KDB u Miensku zrabiŭ vysnovu: tam usio pra ŭsich usio viedajuć.
Kačahura vyklikali ŭ KDB Biełarusi paśla taho, jak jon admoviŭsia davać pakazańni čekistam u Navahradku, pakolki tyja zabaraniali pry hetym prysutničać jahonaj davieranaj asobie.
10 sakavika jon prabyŭ u śledčaha šeść hadzin i pavinien źjavicca jašče i siońnia.
Sa słoŭ Kačahura, jany najmienš havaryli sa śledčym pra Płošču, amal uvieś čas hutaryli pra Boha. Ale najbolej Kačahura ździviła daśviedčanaść čekistaŭ pra ŭsich i pra ŭsio.
Kačahur navat zajaviŭ: “Chavać ad ich niešta biessensoŭna, jany navat skazali mnie, u jakija my karty hulali i chto vyjhraŭ. Jany viedajuć absalutna ŭsio i pra toje, chto tam dźviery raźbiŭ taksama. A ŭ mianie zbolšaha pytalisia pra Nastu Pałažanku – ci viedaju ja jaje? Ja skazaŭ, što viedaju, nie staŭ hetaha chavać”.
Sa słoŭ Kačahura, śledčy pakazaŭ jamu videa z Płoščy, na jakim dobra byŭ bačny sam Kačahur, ale na hetym akcent nie rabiŭsia. Nijakaha cisku, ź jaho słoŭ, nie akazvałasia, naadvarot, razmova viałasia prystojna.
U KDB vyklikany inšyja aktyvisty Chryścijanskaj Demakratyi z Navahradka: Darja Bachar, Siarhiej Voŭčak, Juraś Kazak.
Raniej ich trojčy vyklikalisia ŭ pravaachoŭnyja orhany z metaj dapytać ich u spravie padziejaŭ 19 śniežnia na Płoščy, ale nie źjaŭlalisia tudy. Paźniej sud Navahrudskaha rajona asudziŭ ich za heta na 200 tysiač rubloŭ štrafu.
A jašče paźniej jany admovilisia davać pakazańni śledčym KDB u Navahrudku biez prysutnaści pry hetym ich davieranych asobaŭ. Aktyvisty zajaŭlali śledčym, što takoje prava im harantuje Kanstytucyja Biełarusi.
Kamientary