Syn i muž šukali Natallu Abražej da troch nočy.44-hadovaja Natalla viartałasia z pracy prykładna ŭ adzin i toj ža čas i pa adnym maršrucie.
— Jana pracavała ŭ Rakavie, i kožny viečar ich pryvozili ŭ Minsk da mietro «Kamiennaja Horka». Ź joj jechali dźvie žančyny. Jany vyjšli ź mietro na stancyi «Niamiha», a mama pajechała da «Kupałaŭskaj», kab pierajści na inšuju liniju, — raskazaŭ syn zahinułaj Jaŭhien.
Uviečary ŭ dzień trahiedyi maładomu čałavieku patelefanavali z pracy maci i spytali, ci dajechała jana dadomu. Ale Jaŭhien nie adrazu daviedaŭsia pra vybuch i nie nadaŭ zvanku vialikaha značeńnia…
— Kali siabry paviedamili pra trahiedyju, ja pačaŭ šukać infarmacyju ŭ internecie. Uspomniŭ, što jakraz u hety čas mama pierachodzić z adnoj linii mietro na druhuju…
Jaje telefon byŭ niedastupny, i tady ja pačaŭ telefanavać znajomym, jakija mahli apynucca pobač. Ale byli pieraboi sa suviaźziu… Ja abjeździŭ usie balnicy, ale jaje proźvišča ŭ śpisach nie było. My čakali i šukali jaje da apošniaha. Choć razumieli, što raz jana nie viarnułasia dadomu i ŭ śpisach paciarpiełych nie značycca — nadziei mała…
My nie mahli znajści mamu da troch nočy. Nie chočacca dumać, što ad nas chavali, dzie znachodziacca nieapaznanyja cieły. Niahledziačy na toje, što moj ajčym — były supracoŭnik milicyi… Tolki ŭ čatyry nočy my pajechali na apaznańnie. I ŭsio…
U internecie źjaviłasia videa ź miesca vybuchu. Ale infarmacyi mała. Niaŭžo nie vidać, dzie vybuchnuła? Ja potym užo pa televizary ŭbačyŭ, jak cieła majoj mamy nakryvajuć praścinaj. Značyć, čałaviek užo miortvy… Na joj čamuści nie było štanoŭ, ale ja nie bačyŭ, kab jaje nohi byli ŭ kryvi ci šnarach. Z adnaho boku ŭ jaje abhareŭ tvar… Mama była ŭ vahonie, jaki, mabyć, prajazdžaŭ abo stajaŭ kala miesca vybuchu.
A kali ja jeździŭ pa balnicach, nie raz čuŭ ad paciarpiełych pra toje, što na stancyi mietro «Kastryčnickaj» było dva vybuchi.Z roźnicaj u doli siekundy. Adzin — la łavy, druhi — kala eskałatara. Ale kali heta nie tak, čamu varonka ad vybuchu znachodzicca ŭ adnym miescy, a praź niekalki dziasiatkaŭ mietraŭ u eskałataraŭ vyrvała humavyja poručni?..
Ale dakładna ja viedaju tolki adno: treba znajści hetych padonkaŭ. A dla hetaha my pavinnyja być razam.
Ciapier čytajuć
Jak skłaŭsia los internacyjanalnych dziaciej, jakich vychoŭvali ŭ Žodzinie ŭ pieršym u Biełarusi dziciačym domie siamiejnaha typu?5
Kamientary