Pasoł Ukrainy zaniepakojeny situacyjaj u Biełarusi

Toje, što adbyvajecca siońnia ŭ Biełarusi na finansavym i spažyvieckim rynkach — usiaho tolki pačatak. Takoje mierkavańnie vykazaŭ pasoł Ukrainy ŭ Biełarusi Raman Biaśśmiertny u intervju ŭkrainskamu vydańniu «Dzierkało tižnia».

Jon adznačyŭ, što za apošnija paŭtara miesiacy vielmi ŭskładniłasia situacyja na valutna-finansavym rynku. «A siońnia hety faktar ​​uzmacniaje strach u biełaruskim hramadstvie. Bo, niahledziačy na ​​toje što pa aficyjnym kursie adzin dalar pa-raniejšamu staić 3100 biełaruskich rubloŭ, u susiedniaj Litvie pry kupli aŭtamabilaŭ dalar mianiajuć pa 4700. Asobnyja banki na tarhach ŭžo prapanoŭvajuć za dalar 6100 biełaruskich rubloŭ. Zaraz u Minsku možna ŭbačyć čerhi la abmiennych punktaŭ. U internecie źjavilisia kadry, kali ludzi bjucca za dalary ŭ abmieńnikach. Na tym tydni z pryłaŭkaŭ asobnych supiermarkietaŭ źnikli cukar, alej. Heta sparadziła ažyjatažny popyt. Ułady sprabujuć napoŭnić kramy hetymi tavarami. Ale ŭ suviazi z takim kursam i ažyjatažam na valutnym rynku, ludzi masava skuplajuć pradukty «, — raspaviadaje ab situacyi ŭ Biełarusi ukrainski dypłamat.

Na dumku Biaśśmiertnaha, heta vyklikana ekanamičnaj palitykaj, deficytam apłatnaha bałansu, niehatyŭnym salda zamiežnaha handlu. «Akramia taho, pieramovy pa ŭvaznych pošlinach na aŭtamabili i naftu, jakija pravodziła Biełaruś z Rasijaj i Kazachstanam u ramkach stvareńnia Mytnaha sajuza, zaviaršylisia adnaznačna nie na karyść Minska. U minułym hodzie miascovyja analityki kazali pra deficyt biudžetu ŭ piać miljardaŭ dalaraŭ. Dumaju, siońnia hety deficyt značna bolš. Usio heta vyklikaje niedachop valuty, choć z pačatku hoda Nacbank Biełarusi vydatkavaŭ amal adzin miljard dalaraŭ sa svaich reziervaŭ dla pahašeńnia hetaha popytu. Ale prablema zastajecca. I ŭładam pryjdziecca jaje vyrašać «, — kanstatuje pasoł.

Na pytańnie, ci moža ŭ Biełarusi valutna-finansavy kryzis pieraraści ŭ palityčny, ukrainski ambasadar adznačyŭ nastupnaje: «Składana skazać. Ale toje, što siońnia adbyvajecca na finansavym i spažyvieckim rynkach, usiaho tolki pačatak. My, ukraincy, pryvykli da taho, što nas supravadžaje stychijny faktar ​​rynku. Ale ŭjavicie, što vy pieranieślisia ŭ krainu z płanavaj sistemaj, dzie nichto nie čakaŭ nijakich bied, dzie ŭsie kazali, što ŭsio budzie dobra. I voś raptam ŭźnikaje prablema, jana pałochaje ludziej. Jany prosta nie hatovyja da takoha pavarotu padziej «.

Razam z tym Raman Biaśśmiertny ličyć, što ŭ Biełarusi jość šmat instrumientaŭ, kab pahasić hety kryzis, pieraadoleć jaho. «Siońnia kraina znachodzicca ŭ tych umovach, kali jašče mahčymyja karekcyi. Ale tolki ad biełaruskaj ułady zaležyć, jakoje rašeńnie jana prymie, jaki abiare instrumient. Na siońniašni dzień, pa-pieršaje, vidavočna, što ŭłada rychtujecca da pryvatyzacyi: na prodaž budzie vystaŭleny ceły šerah pradpryjemstvaŭ dla taho, kab atrymać nieabchodnyja finansavyja srodki i trochi pahasić toj kryzis, jaki pačaŭsia na valutnym rynku. Pa-druhoje, viaducca pieramovy z Rasijskaj Fiederacyjaj i Antykryzisnym fondam JeŭrAzES ab atrymańni kredytaŭ na ahulnuju sumu ŭ try miljardy dalaraŭ. Na dniach źjaviłasia infarmacyja ab pačatku hetych pieramovaŭ. Kali jany mohuć być zavieršany, składana adkazać «, — skazaŭ ukrainski dypłamat.

• 0
• 0
• 0
• 0
• 0
• 0
• 0
• 0