Ci vyzvalić sud Cimocha Drančuka?

Siońnia Centralny sud Miensku maje razhledzić pytańnie ab umoŭna‑daterminovym vyzvaleńni palitviaźnia Cimocha Drančuka. Nahadajem, nahladnaja kamisija papraŭčaj kalonii ŭ Miensku na vulicy Kalvaryjskaj rekamendavała Cimafieja Drančuka na ŭmoŭna‑daterminovaje vyzvaleńnie. Ciapier rekamendacyju musić razhledzić sud.

Jakija šancy maje palitźniavoleny? Z hetym pytańniem my źviarnulisia da pradstaŭnika nahladnaj kamisii Hieorhija Kozieła, adnak jon admoviŭsia davać niejkija tłumačeńni.

Kozieł: «Kamisija prymaje rekamendacyjnaha planu rašeńnie. A chto prymaje rašeńnie? Sud. Pytańni da sudu, kali łaska. Kamisija adpaviednaje rašeńnie pryniała. I pieradała pa instancyi».

U Centralnym sudzie paćvierdzili, što sprava budzie razhladacca, ale znoŭ ža – biez kamentaraŭ.

Aktyvista «Partnerstva» Cimafieja Drančuka pakarali hodam źniavoleńnia za ŭdzieł u niezarehistravanaj arhanizacyi. Ad 21 lutaha jaho trymajuć pad vartaj. Baćka Cimafieja Valery Drančuk spadziajecca na stanoŭčaje rašeńnie.

Drančuk: «Baćkoŭskaje spadziavańnie, što ja ŭbaču syna da pieršych Kaladaŭ, da 25‑ha. I spadziajucca ŭsie našy svajaki, bo 25‑ha da taho ž heta jašče i 80 hadoŭ u babuli, jakuju Cimoch vielmi lubić i jakaja jaho čakaje, čakaje, što Cimafiej jaje pavinšuje z voli. Ja spadziajusia na toje, što Cima sam zmoža jaje pavinšavać».

Čakaje Cimafieja i syn Płaton, jakomu ŭsiaho 8 z pałovaj miesiacaŭ.

Drančuk: «Płaton vielmi čakaje baćku, a baćka vielmi chvalujecca, što tak stałasia, što z dnia naradžeńnia nia bačyŭ jaho, nie trymaŭ na rukach. Voś heta epizod va ŭsioj hetaj spravie vielmi kranalny i balučy dla nas. Ja dumaju, što heta ŭ rešcie rešt samaje chvalujučaje, pryjemnaje i radasnaje, što baćka sustreniecca z synam, maim unukam Płatonam».

Cimafieja Drančuka zatrymali supracoŭniki KDB 21 lutaha, u dzień narodzinaŭ jahonaj žonki Volhi Ancypovič. U kvatery zrabili pieratrus i zabrali ŭsie nośbity infarmacyi. Razam ź Cimafiejem za kraty śledčaha izalataru trapili Mikoła Astrejka, Enira Branickaja j Alaksandar Šałajka. Eniru i Alaksandra pakarali źniavoleńniem na šeść miesiacaŭ, Mikołu Astrejku — na dva hady, a Cimafieja prysudzili da hodu pazbaŭleńnia voli. Enira Branickaja j Alaksandar Šałajka vyjšli na volu ŭ žniŭni. Lideru arhanizacyi «Partnerstva» Mikołu Astrejku 17 listapada źniavoleńnie zamianili na papraŭčyja raboty.

• 0
• 0
• 0
• 0
• 0
• 0
• 0
• 0