Adpačynak pa-biełarusku: Zapłaci 3 miljony i słuchaj vizhat «bałharki»
Na skarhi klijentaŭ na ramont u razhar siezonu kiraŭnictva turkompleksa «Narač» kaža — «pracujem pa prahramie prezidenta».
Na skarhi klijentaŭ na ramont u razhar siezonu kiraŭnictva turcentra «Narač» kaža — «pracujem pa prahramie prezidenta».
«Samy siezon, lipień, a jany pad voknami plitku piłujuć!» — u redakcyju «Našaj Nivy» patelefanavaŭ aburany hość sanatoryja turystyčnaha kompleksu «Narač», jaki naležyć Fiederacyi prafsajuzaŭ Biełarusi. Pa jaho słovach, užo katory dzień rabočyja kładuć pierad hałoŭnym uvachodam plitku. Praca kipić pad samymi pad voknami sanatoryja.
«Ad 8-j ranicy da 5-j viečara pracujuć. Piłujuć bałharkaj plitku — šum staić žudasny, pył lacić. Pad voknami jeździć budaŭničaja technika. A kiraŭnictva na našy skarhi nie źviartaje ŭvahi»,— raskazvaje Mikałaj. Jaho aburaje toje, što ramont pačali ŭ samy razhar siezonu: «Niaŭžo heta nielha było zrabić zahadzia, a nie tady, kali my pryjechali adpačyć?»
Mikałaj kaža, što sutki adpačynku ŭ sanatoryi kaštujuć ad 240 da 280 tysiač rubloŭ. «Voś pryjechaŭ niechta na 10 dzion, zapłaciŭ 3 miljony i słuchaje za svaje ž hrošy vizhat “bałharki”!»
Mikałaj dasłaŭ u redakcyju fota i videa pracaŭ, što adbyvajucca na terytoryi turystyčnaha kompleksu «Narač». Składvajecca absurdnaja situacyja, miarkuje jon. Sanatoryj — miesca adpačynku, i hałoŭnyja pa vyznačeńni tut tyja, chto za adpačynak płacić, to bok klijenty sanatoryja. Ale na praktycy atrymlivajecca, što administracyja całkam zachapiłasia ramontam i na svaich haściej nie źviartaje nijakaj uvahi.
«Im važniej, dzie znajści cemient, a nie toje, ci zdoleje chtości z nas adpačyć u takich umovach, zapłaciŭšy niemałyja hrošy».
«U nas prezidenckaja prahrama»
U turkompleksie «Narač» paćvierdzili fakt praviadzieńnia rabot na prylehłaj da žyłoha korpusu terytoryi. Na pytańnie, a jak ža sanitarnyja normy, adznačyli:
«Pracy viaducca zhodna prezidenckaj prahramy dobraŭparadkavańnia terytoryi, tamu my ničoha nie parušajem».
Karespandent «NN» źviarnuŭsia ŭ minskaje abłasnoje adździaleńnie Biełaruskaha tavarystva abarony spažyŭcoŭ. Tam klijentam sanatoryja paraili dla pačatku aformić svaje pretenzii ŭ vyhladzie indyvidualnych piśmovych zvarotaŭ na imia administracyi ŭstanovy. Zhodna zakanadaŭstva, kiraŭnictva sanatoryja abaviazanaje piśmova adkazać na takija zapyty.
U lubym vypadku, vyrašyć sprečnaje pytańnie mohuć tolki śpiecyjalisty na miescy. Kab vyznačyć, ci parušajucca ŭ dadzienym kankretnym vypadku sanitarna-hihijeničnyja normy, zaćvierdžanyja Ministerstvam achovy zdaroŭja, treba zaprasić supracoŭnikaŭ sanepidemstancyi. Jany pavinny zamierać uzrovień šumu na miescy praviadzieńnia pracaŭ i vynieści vierdykt.
Zhodna patrabavańniaŭ sanitarnych praviłaŭ i normaŭ, pryniatych u Biełarusi, norma dapuščalnaha ŭzroŭniu huku ŭ pałatach balnic i sanatoryjaŭ u dzionny čas (7—23 h.) składaje 50 decybieł, u žyłych pakojach pansijanataŭ i damoŭ adpačynku — 55. Na terytoryjach, prylehłych niepasredna da žyłych budynkaŭ sanatoryjaŭ norma składaje 60, a na placoŭkach, śpiecyjalna abstalavanych dla adpačynku — 50 dB. Sučasnyja plitkarezy zdolnyja «vydavać» ad 90 da 120 dB.
«NN» jašče vierniecca da hetaj temy ŭ bližejšy čas.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty46
Kamientary