Kruhły stoł ab cenach na paliva praviali ŭ chole haścinicy «Arbita»

Kruhły stoł na temu «Paliŭna-enierhietyčny kompleks Biełarusi: ceny na paliva i ŭzajemasuviaź ź inšymi halinami ekanomiki» infarmacyjna-aśvietnaj ustanovie «Za Aŭto» pryjšłosia pravieści ŭ chole minskaj haścinicy «Arbita».

Na mierapryjemstva byli zaprošany pradstaŭniki ŭrada, kancerna «Biełnaftachim», ministerstvaŭ ekanomiki, transpartu i kamunikacyj, pryvatnych aŭtamabilnych kampanij i kampanij-pieravozčykaŭ. Čakałasia, što ŭ sustrečy voźmuć udzieł taksama eks-kandydat na pasadu prezidenta na vybarach-2010 Viktar Ciareščanka i šerah inšych ekśpiertaŭ.

Adnak administracyja haścinicy «Arbita», dzie pavinna było prajści mierapryjemstva, 30 žniŭnia papiaredziła kiraŭnictva aŭtamabilnaj supolnaści ab admienie broni kanfierenc-zały «pa techničnych pryčynach». Pamiaškańnie było zabraniravana jašče ŭ siaredzinie žniŭnia. Užo na miescy dyrektar «Za Aŭto» Arciom Šarkoŭ pasprabavaŭ damovicca ab vykarystańni pakoju pieramoŭ, adnak atrymaŭ admovu. Nie ŭdałosia pravieści kruhły stoł i ŭ restaranie haścinicy.

Kala 16.00 na sustreču z aktyvistami ŭstanovy prybyli hałoŭny savietnik analityčnaha ŭpraŭleńnia aparatu Savieta ministraŭ Alaksandr Narolenkaŭ, a taksama supracoŭnik aparatu Alaksandr Vasilkoŭ. Razmova pradstaŭnikoŭ ułady i hramadskaści adbyłasia ŭ chole haścinicy.

Narolenkaŭ zhadziŭsia z tym, što abmiarkoŭvać paliŭnyja pytańni treba za kruhłym stałom z kanstruktyŭnymi prapanovami pa źmianieńni padychodaŭ na paliŭna-enierhietyčnym rynku. Jon paprasiŭ Šarkova pradstavić jamu kankretna sfarmulavanyja prapanovy pa hetym pytańni. Čynoŭnik nie staŭ abiacać, ale adznačyŭ, što jon, mahčyma, pasadziejničaje ŭ arhanizacyi kruhłaha stała z pradstaŭnikami Minfina, Minekanomiki, Saŭmina i kancerna «Biełnaftachim», kali «budzie što razhladać».

«Pytańni, jakija my chacieli abmierkavać, naturalna, uźniać nie ŭdałosia, tamu što heta nie abstanoŭka — razmaŭlać na nahach u kalidory, — zajaviŭ žurnalistam Šarkoŭ. — U lubym vypadku ich prysutnaść, žadańnie iści na kantakt i pačuć kanstruktyŭnyja prapanovy pa stabilizacyi situacyi na paliŭna-enierhietyčnym rynku krainy źjaŭlajucca stanoŭčym krokam ź ich boku».

Asnoŭnaje pytańnie, jakoje ŭstanova choča ŭźniać na pašyranym kruhłym stale, — źnižeńnie padatkovaj nahruzki dla naftapierapracoŭčych pradpryjemstvaŭ i apierataraŭ aŭtazapravačnych stancyj, kab dola ich padatkaŭ nie zakładvałasia ŭ kančatkovy košt naftapraduktaŭ.

Pavodle słoŭ Šarkova, u pieršaj dekadzie vieraśnia prapanovy ŭstanovy buduć nakiravany ŭ Saviet ministraŭ. Čakajecca, što pašyrany kruhły stoł adbudziecca ŭ pačatku kastryčnika.

• 0
• 0
• 0
• 0
• 0
• 0
• 0
• 0