U biełaruskaje zakanadaŭstva płanujecca ŭnieści papraŭki, jakija praduhledžvajuć adkaznaść baćkoŭ abo asob, jakija ich zamianiajuć, za znachodžańnie dziaciej na vulicy ŭnačy biez supravadžeńnia darosłych.
Jak paviedamiŭ na pres-kanfierencyi 6 vieraśni namieśnik načalnika adździeła ŭpraŭleńnia prafiłaktyki MUS Valeryj Mialeška, ciapier rabočaja hrupa z deputataŭ, pradstaŭnikoŭ Savieta ministraŭ, MUS, Hienieralnaj prakuratury, ministerstvaŭ achovy zdaroŭja i adukacyi abmiarkoŭvaje papraŭki ŭ Kodeks ab administracyjnych pravaparušeńniach i Zakon ab prafiłaktycy padletkavaj złačynnaści i bieznahladnaści ad 2003 hoda. Čakajecca, što jany buduć razhledžanyja nacyjanalnym schodam na vosieńskaj siesii i ŭstupiać u siłu ŭ kancy 2011 hoda abo pačatku 2012 hoda.
Na dadzieny momant, pa słovach Valeryja Mialeški, vialikuju prablemu ŭ pytańni načnych zabavaŭ padletkaŭ stvarajuć viaskovyja kłuby. Kłuby ŭ haradach, jakija naležać čaściej za ŭsio pryvatnym kampanijam, nie ryzykujuć parušać zakon i adsiavajuć niepaŭnaletnich. Inakš "administracyi kłubaŭ potym budzie vielmi baluča -- tam vielmi dobryja štrafnyja sankcyi, a druhoje - pazbaŭleńnie licenzii", nahadaŭ Valeryj Mialeška.
A voś viaskovyja damy kultury hrašać, zajaviŭ pradstaŭnik MUS. Pavodle jaho słoŭ, "iany ŭžo i skardziacca na nas i na prakuraturu, u ich, ci bačycie, zarobku niama, zarobak nie možam płacić". "Tam niama narmalnych prahram, niama narmalnaj techniki, muzyki, dydžeja, - zajaviŭ Valeryj Mialeška, - dy praviadzi ty na zvyčajnym uzroŭni hetuju dyskateku navat u try hadziny dnia paśla ŭrokaŭ, jany tudy pryjduć i budzie cikava".
Zhodna z papraŭkami, što prapanujucca ŭ zakanadaŭstva, dzieciam da 14 hadoŭ budzie zabaroniena źjaŭlacca adnym na vulicy ad 22-j da 6-j hadziny, ad 14 da 16 hadoŭ - ad 23-j da 6-j hadziny. Adnak, padkreśliŭ Mialeška, hetyja časovyja intervały nie kančatkovyja.
Kamientary