Pavarot. Urad prezentavaŭ prajekt pastavak nafty praz Łatviju

Biełaruś pierahladaje kancepcyju enerhietyčnaj biaśpieki. "Naftan", jaki moža zabiaśpiečvacca naftaj z marskoha terminału ŭ Ventśpiłsie, maje stać jaje klučavym elementam. A.Łukašenka akcentuje na skaračeńni biudžetnych vydatkaŭ, naroščvańni prytoku zamiežnych investycyj u krainu, uzmacnieńni roli pryvatnaha biznesu ŭ ekanomicy. I patrabuje ad Rasiei apłaty za ziamlu pad nafta- i hazapravodami.

"AAT "Naftan" pavinna stać klučavym pradpryjemstvam u pytańni zabieśpiačeńnia enerhietyčnaj biaśpieki Biełarusi”. Ab hetym zajaviŭ Alaksandar Łukašenka na naradzie pa pytańniach funkcyjanavańnia ekanomiki va ŭmovach rostu cenaŭ na rasiejskija enerhanośbity.

Pavodle słovaŭ A.Łukašenki, “asnoŭnaja zadača zaklučajecca ŭ tym, kab "Naftan" staŭ pryvabnym dla naftazdabyŭnych kampanij i jany sami imknulisia da supracoŭnictva z "Naftanam". Dla hetaha treba vykarystać u kompleksie takija faktary, jak hłybinia pierapracoŭki nafty, unikalnaść i jakaść atrymanych praduktaŭ, alternatyŭnaść krynic syraviny i efektyŭnaść raboty ŭsich padraździaleńniaŭ i vytvorčaściej”.

Schavanaja ŭ siaredzinie hetaha śpisu “alternatyŭnaść krynicaŭ” nasamreč hałoŭnaja ŭ im. Čamu “Naftan”? Bo jość mahčymaść za minimalny termin arhanizavać pastaŭki nafty na zavod z marskoha terminału ŭ Ventśpiłsie.

“Całkam realna i siońnia my abmiarkoŭvajem užo takuju mahčymaść”, -- dałažyŭ u Navapołacku vice-premjer Uładzimier Siamaška, adkazny za paliŭna-enerhietyčny kompleks. “Interfaks” paviedamlaje pra słovy U.Siamaški, što ŭžo praviedzienyja papiarednija pieramovy z pradstaŭnikami švajcarska-anhielskaj kampanii “Vitoła” pa mahčymaści realizacyi prajektu, źviazanaha z pastaŭkami nafty z Ventśpiłsu ŭ Navapołacak. Ź biełaruskaha boku zatraty na madernizacyju naftapravodu składuć $ 15-30 młn. Adnak u Ventśpiłsie zamiežnaj kampanii pryjšłosia b budavać novyja terminały.

Na dumku U.Siamaški, tym ža šlacham paśla dabudovy niekalkich pieramyčak možna budzie pampavać naftu j na Mazyrski zavod.

Vice-premjer miarkuje, što perspektyvy naftapravodu Adesa-Brody zastajucca “tumannymi” z pryčyny adsutnaści volnych zapasaŭ nafty ŭ Kaśpijskim rehijonie.

Havorka na naradzie išła i pra rasiejski vektar pastavak. A.Łukašenka abviarhaŭ U.Pucina i patrabavaŭ ad uradu vystavić Rasiei novyja rachunki za tranzyt: "Rasija pavinna zapłacić za pasłuhi, što akazvajucca joj u Biełarusi”, -- cytuje jaho BiełTA.

Pavodle jaho słoŭ, u suviazi sa źmianieńniem umoŭ pastavak rasiejskich hazu i nafty Biełaruś u 2007 hodzie stračvaje $3,5 młrd. A.Łukašenka kanstatavaŭ, što “ŭsie damoŭlenaści pa nafcie i hazie niavyhadnyja dla nas proci minułaha hodu”. Pavodle jahonych słovaŭ, Biełarusi sioleta daviadziecca pavialičyć apłatu pastavak hazu na $2,5 młrd, a za naftu – na $1 młrd. Heta trochi niečakanyja ličby. Ekanamisty aceńvali imaviernyja straty Biełarusi ad pavyšeńnia cany hazu na 400 młn dalaraŭ (nadbaŭka cany minus nadbaŭka apłaty za tranzyt minus pieršaja tranša płaty za “Biełtranshaz”), a na nafcie – ad 0,5 da 2,7 młrd u zaležnaści ad sposabu apadatkavańnia reekspartu naftapraduktaŭ.

“Heta 3,5 młrd dalaraŭ, a nia tyja 5 młrd, nia tyja efemiernyja ličby, pra jakija kazaŭ prezydent Rasiei, – adznačyŭ A.Łukašenka. -- Tamu my pavinny prapanavać Rasii na pryncypach mižnarodnaha prava taksama zapłacić nam za ziamlu pad trubapravodam, za transparciroŭku nafty i inšyja pasłuhi. Ale rabić heta treba spakojna, nie zaciahvajučy da kanca hodu pierahavorny praces. My nie pavinny stracić hetyja $3,5 młrd", -- skazaŭ jon. Što ŭ pierakładzie aznačaje: novyja rachunki musiać być vystaŭlenyja nieadkładna.

A.Łukašenka ličyć nieabchodnym vybudoŭvańnie adnosin z Rasiejaj na suśvietnych pryncypach: "My pavinny mieć svaju vyhadu. Siońnia Biełaruś kuplaje naftu ŭ Rasiei pa suśvietnych cenach".

Jon taksama kanstatavaŭ, što pakul u Biełarusi niama alternatyŭnych Rasii krynicaŭ pastavak nafty, "a kali i jość, to my ich dastatkova nie prapracavali". "Kali niechta z rasiejskich naftazdabyŭnych kampanij nia choča pracavać ź Biełaruśsiu, my pavinny ŭziać ź ich bolš vysokuju canu za transparciroŭku ich nafty ŭ Eŭropu", -- zajaviŭ A.Łukašenka.

Pry hetym jon abrynuŭ krytyku na ŭrad: “Złačynstva składajecca z taho, što Sidorski i Siamaška rańš kuplali naftu daražej. Na 60--80 dalaraŭ – heta kiepska, i my pavinny heta pryznać”. Jon taksama zapatrabavaŭ poŭnaje admovy ad davalcavaje schiemy pracy. “Ja i vam, i ŭradu skazaŭ: nijakich davalcaŭ. Vy pavinny kupić naftu -- i da pabačeńnia. Rasieja, Venesueła, Iran -- jak tam budzie... Dziakuj, da pabačeńnia! Z Rasiejaj my na hetym i nastojvajem”.

Uradu jon paraiŭ “ zmahacca, a nia “sklejvać łasty i kryčać ratujcie”. “Rasieja ad Hospada Boha maje svoj resurs – syravinu. Nam Hospad Boh nia daŭ hetaha resursu. Ale daŭ inšy stratehičny resurs – hieahrafičnaje, hieapalityčnaje stanovišča. I my musim jaho skarystać, jak skarystoŭvaje svoj resurs Rasieja”.

“Pytańniaŭ šmat, ale ja chacieŭ by źjechać adsiul, viedajučy, što naš suverenitet nieparušny”, -- zajaviŭ A.Łukašenka. -- “My pavinny za heta zmahacca, chaj to budzie “chałodnaja” abo “haračaja” vajna”.

Apošniaje było, viadoma, patetykaj. U suchoj ža rešcie ŭpieršyniu kraina pačuła ad kiraŭnika dziaržavy kankretnyja schiemy dyversifikacyi krynicaŭ pastavak enerhanośbitaŭ u Biełaruś. Jany hruntujucca na idejach vykarystoŭvać hieapalityčnaje stanovišča Biełarusi ŭ jakaści stratehičnaha resursu, pavyšać płatu za tranzyt i vybudavać łancuh naftapravodaŭ miž bałtyjskimi i čarnamorskimi partami. Upieršyniu hetyja idei byli prapanavanyja Narodnym Frontam na pačatku 90-ch. Siońnia hetyja prajekty vyhladajuć realistyčnymi. Šancy na ich paśpiachovuju realizacyju pavysiacca jašče bolš paśla dabudovy naftapravodaŭ z Kaśpiju da Čornaha mora i z Adesy da Brodaŭ i dalej da Płocku. Praŭda, ich realizacyja kali j raspačniecca, to nadta pozna.

Kab kampensavać hetaje adstavańnie, na naradzie prapanoŭvalisia ŭsialakija časovyja miery, jak to Dyrektyva №3 pra ekanomiju resursaŭ i aščadnaść, pieravod 60% kamunalnaha ciepłazabieśpiačeńnia na miascovyja vidy paliva, zahad fermam vykarystoŭvać tolki drovy j torf.

U cełym hetym razam havorka išła pra surjozny pavarot u kursie krainy. Jak padkreślivaje BiełTA, A.Łukašenka na naradzie "akcentavaŭ na skaračeńni biudžetnych vydatkaŭ, naroščvańni prytoku zamiežnych investycyj u krainu, uzmacnieńni roli pryvatnaha biznesu ŭ ekanomicy".

Pačakajem reakcyi Rasiei. Jana budzie – sumnievaŭ niama. I najchutčej što nia tolki ekanamičnaja, ale i palityčnaja. Tym bolš što paśla padpisańnia pahadnieńniaŭ ab prodažy "Biełtranshazu" i taryfach na tranzyt nafty j hazu ruki ŭ Kramla raźviazanyja.

Fota z sajtu photo.bymedia.net

• 0
• 0
• 0
• 0
• 0
• 0
• 0
• 0