Jak Vudzi Ałen i Skarlet Jochansan łavili zabojcu
Maładaja žurnalistka Sondra Pranski ŭ kampanii ź niedarekam-iluzijanistam pa navodcy pryvida-repartera łoviać seryjnaha zabojcu-arystakrata.
Sensacyja (Scoop)
Vialikabrytanija – ZŠA, 2006, kalarovy, 96 chv.
Režyser: Vudzi Ałen
Roli vykonvajuć: Skarlet Jochansan, Vudzi Ałen, Hju Džekman, Kievin Makneli, Jen Makšejn
Žanr: Kamedyja
Adznaka: 7 (z 10)
Maładaja žurnalistka Sondra Pranski ŭ kampanii ź niedarekam-iluzijanistam pa navodcy pryvida-repartera łoviać seryjnaha zabojcu-arystakrata.
Kamedyjnuju paračku składajuć Skarlet Jochansan i sam Vudzi Ałen – i bolej vytančanaha, iraničnaha j paciešnaha dueta ŭjavić niemahčyma.
Seksapilnaja hierainia Jochansan tolki pačynaje svaju pracu ŭ žurnaliskaj prafesii – i maje schilnaść spać z kožnym, kaho jana pieraśleduje. Zatoje hetaja słabaść kampensujecca natchnieńniem, kali hutarka zachodzić pra zubnuju emal (siamiejnaja tradycyja stamatolahaŭ-hihijenistaŭ).
Čaraŭnik Sid pa mianušcy Cudzini davodzić da ručki ŭsich kartačnymi fokusami, mitusicca, kampleksuje – i ŭračysta hraje rolu iłžetaty Sondry, što nieabchodna, kab vykryć niahodnika.
Ale śledztva sutykajecca z meladramatyčnymi pieraškodami: mierkavany zabojca (Hju Džekman) – piekny małady čałaviek, u jakoha adrazu zakachałasia hora-žurnalistka; i kachańnie heta ŭzajemnaje.
“Sensacyja” – druhi londanski film Vudzi Ałena i druhaja jahonaja stužka sa Skarlet Jochansan. Ale ŭ adroźnieńni ad trahiedyjnaha “Matč Pojntu” – “Sensacyja” nadziva lohkaja j piaščotanaja karcina, raskviečanaja “ałenizmami” ź brytanskimi intanacyjami.
“Ja byŭ vychavany ŭ judaiźmie, ale pierajšoŭ u narcysizm… Ty z artadaksalnaj siamji – ci prymuć jany seryjnaha zabojcu?” Pikiroŭki pamiž hierojami prosta čaroŭnyja, a arystakratyčnyja maniery Staroha Śvietu idealna prystasavany dla iraničnych zabavak Vudzi Ałena.
Ale samuju zalimitnuju paciechu razyhryvaje 70-hadovy Ałen na ładździ Charona. Čarhovyja kartačnyja fokusy pad naviaźlivuju muzyku “maleńkich lebiedziaŭ” – heta bieznadziejny j hienijalny aptymizm, nastolki kinematahrafičny, što chočacca pažadać režyseru jašče sotniu padobnych filmaŭ.
Seansy ŭ kinateatry “Pieramoha” z 23 pa 26 studzienia a 19.00, 27 i 28 studzienia – a 17.00 i 19.00.
Kamientary