U Kałumbii na cichaakijanskim uźbiarežžy adbyŭsia mahutny ziemlatrus mahnitudaj 7,4. Pa infarmacyi miascovych uładaŭ, zahinuli nie mienš za 69 čałaviek, jość šmat paciarpiełych i značnyja razbureńni, piša Bi-bi-si.
Ziemlatrus adbyŭsia ranicaj u paniadziełak u 07:34 pavodle miascovaha času. Epicentr znachodziŭsia niedaloka ad nasielenaha punkta San-Chase-del-Palmar na hłybini kala 96 kiłamietraŭ.
Surjoznyja nastupstvy zafiksavanyja ŭ niekalkich haradach. U Kali, trecim pa kolkaści nasielnictva horadzie krainy, spačatku paviedamlałasia pra 18 zahinułych i nie mienš čym 20 paškodžanych abo razburanych budynkaŭ. Paźniej kolkaść achviar pavialičyłasia.
U horadzie Kibdo šmat damoŭ atrymali značnyja paškodžańni, jość paranienyja. U Pierejry taksama paviedamlajecca pra surjoznyja paškodžańni niekatorych budynkaŭ. Miascovyja ŭłady adznačajuć abvalenyja fasady i inšyja kanstrukcyi.
Padziemnyja šturški adčuvalisia navat u stalicy Kałumbii Bahacie, jakaja znachodzicca za sotni kiłamietraŭ ad epicentra. Padčas ziemlatrusu tam chistalisia śviatłafory i drevy, ludzi vybiahali z budynkaŭ. Niekalki budynkaŭ byli evakujavanyja. Adnak surjoznych razbureńniaŭ u stalicy, pa słovach jaje mera, nie zafiksavana.
Praź ziemlatrus uźnikli prablemy i ŭ pracy niekalkich aeraportaŭ. Paškodžańni adznačajucca ŭ rehijanalnych aeraportach Pierejry, Manisalesa, Kibdo i inšych haradoŭ.
U Manisalesie paciarpieŭ katalicki sabor. Taksama źjavilisia kadry abvalenych budynkaŭ, dzie ratavalniki sprabujuć vyśvietlić, ci nie zastalisia ludzi pad zavałami.
Siejsmołahi papiaredžvajuć pra mahčymaść novych padziemnych šturškoŭ, tamu ratavalniki i miascovyja słužby praciahvajuć pracavać u paciarpiełych rajonach.
Ziemlatrus u Kałumbii adbyŭsia nieŭzabavie paśla mocnych padziemnych šturškoŭ u susiedniaj Vieniesuele. Tam 24 červienia byli zafiksavanyja ziemlatrusy mahnitudaj 7,2 i 7,5, paśla jakich adbyłosia kala 1500 afteršokaŭ. Tady zahinuli bolš za piać tysiač čałaviek, jašče bolš za 16 tysiač atrymali traŭmy, a tysiačy ludziej zastalisia biez žylla.
U vyniku ŭčorašniaha ziemlatrusu ŭ Japonii zahinuli 13 čałaviek
Mocny ziemlatrus u Pieru paškodziŭ chram XVI stahodździa
Kolkaść zahinułych u vyniku ziemlatrusu ŭ Vieniesuele pieravysiła piać tysiač čałaviek
U Vieniesuele mužčyna pravioŭ paśla ziemlatrusu pad zavałami 8 dzion. Jaho ŭratavała vartavaja budka
Kamientary