Ukrainskija bieśpiłotniki atakavali NPZ u rasijskim Orsku za paŭtary tysiačy kiłamietraŭ ad miažy
U horadzie Orsk Arenburhskaj vobłaści na terytoryi miascovaha naftapierapracoŭčaha zavoda paśla sieryi vybuchaŭ uspychnuŭ pažar. Miascovyja žychary publikujuć videa ź miesca zdareńnia, na jakich bačny słup dymu nad pradpryjemstvam, raźmieščanym bolš čym za 1500 kiłamietraŭ ad Ukrainy.
Hubiernatar rehijona Jaŭhien Soncaŭ paćvierdziŭ uviadzieńnie režymu niebiaśpieki ataki bieśpiłotnikaŭ na terytoryi vobłaści, adnak sam fakt udaru pa NPZ pakul nie kamientavaŭ.
Z-za pahrozy pavietranych atak aeraporty Orska i Arenburha časova prypynili pryjom i adpraŭku samalotaŭ. U horadzie praciahvajuć łunać vybuchi.
Pavodle papiaredniaj infarmacyi ŭkrainskich telehram-kanałaŭ, u vyniku ŭdaru biaśpiłotnikaŭ na NPZ u Orsku byŭ paražony kompleks hidrakrykinhu. Heta adzin z klučavych i najbolš sučasnych abjektaŭ madernizacyi pradpryjemstva z mahutnaściu 1,6 miljona ton na hod. Kompleks pryznačany dla hłybokaj pierapracoŭki i vytvorčaści śvietłych naftapraduktaŭ. Źniščeńnie hetaj ustanoŭki moža istotna źnizić vytvorčyja mahutnaści zavody.
Taksama siońnia nočču pažar adbyŭsia na NPZ u Kamsamolsku-na-Amury. Pryčyny ŭzharańnia nieviadomyja. Rasijskija pabliki pišuć, što ŭkrainskija drony dalacieli da Chabaraŭskaha kraja.
Kamientary