Internet pa-biełarusku: kamu pahražaje administracyjnaja adkaznaść

Vierchniaja pałata biełaruskaha parłamienta 8 listapada ŭchvaliła zakonaprajekt, datyčny adkaznaści za parušeńni ŭ śfiery vykarystańnia internetu.

Zakonaprajekt ab uniasieńni źmienaŭ u Kodeks Respubliki Biełaruś ab administracyjnych pravaparušeńniach, raźmieščany na Nacyjanalnym pravavym internet-partale, vyklikaŭ dyskusii ŭ biełaruskim hramadstvie. Niekatoryja ekśpierty navat paviedamili, što biełarusy pazbaviacca internetu paśla ŭstupleńnia ŭ siłu hetaha zakona.

Nasamreč ža mienavita hety zakonaprajekt ničoha novaha dla biełaruskich karystalnikaŭ nie zabaraniaje.

Adnak zabarona na ažyćciaŭleńnie takoj dziejnaści dziejničaje ŭ našaj krainie ŭžo bolš za hod — jana ŭviedzienaja z 1 lipienia 2010 ukazam prezidenta Respubliki Biełaruś ad 1 lutaha 2010 hoda «Ab mierach pa ŭdaskanaleńni vykarystańnia nacyjanalnaha siehmienta sietki Internet». Prosta adkaznaść za parušeńnie hetaj normy była nie takoj surjoznaj.

Ukazam № 60, nahadaju, byli ŭviedzienyja dastatkova žorstkija dla biełaruskaha karystalnika ŭmovy karystańnia internetam.

Pa-pieršaje, usie internet-resursy ŭ damiennaj zonie.by pavinnyja byli prajści abaviazkovuju dziaržaŭnuju rehistracyju. Ukaz patrabavaŭ ažyćciavić takuju rehistracyju da 1 lipienia 2010 hoda, adnak jana była zavieršanaja značna paźniej.

Pa-druhoje, była ŭviedzienaja abaviazkovaja identyfikacyja ŭsich karystalnikaŭ internetu. Pravajdary abaviazanyja ažyćciaŭlać identyfikacyju abanienckich pryład karystalnikaŭ internetu i zachoŭvać ciaham hoda infarmacyju ab takich abanienckich pryładach i akazanych pasłuhach. Uładalniki kamputarnych kłubaŭ, internet-kaviarniaŭ i inšych arhanizacyj, jakija pradstaŭlajuć pasłuhi dostupu ŭ internet, abaviazanyja patrabavać u naviednikaŭ dakumienty, jakija paćviardžajuć asobu, i taksama zachoŭvać hetuju infarmacyju ciaham hoda.

Pa-treciaje, praduhledžanaja mahčymaść uviadzieńnia abmiežavańniaŭ dla karystalnikaŭ internetu pa dostupie da peŭnych sajtaŭ. Pryčym dla bolšaści karystalnikaŭ uviadzieńnie abmiežavańniaŭ ažyćciaŭlajecca na dobraachvotnaj asnovie praz zajavu svajho pravajdara. Adnak dla dziaržaŭnych orhanaŭ i arhanizacyj, arhanizacyj adukacyi i kultury takija abmiežavańni abaviazkovyja — pravajdary abaviazanyja abmiežavać dostup karystalnikaŭ z takich arhanizacyj da sajtaŭ, infarmacyja na jakich nakiravanaja na ažyćciaŭleńnie ekstremisckaj dziejnaści, niezakonny abarot zbroi i narkotykaŭ, raspaŭsiudžańnie parnahrafičnych materyjałaŭ, prapahandu hvałtu, žorstkaści i inšych dziejańniaŭ, zabaronienych zakanadaŭstvam.

Pa-čaćviortaje, praduhledžana, što akazańnie pasłuh, vykanańnie rabot, realizacyja tavaraŭ z vykarystańniem sietak i resursaŭ, jakija majuć padklučeńnie da sietki Internet moža ažyćciaŭlacca tolki biełaruskimi jurydyčnymi asobami i pradprymalnikami, tolki praz sajty, raźmieščanyja ŭ damiennaj zonie.by i tolki z dapamohaj siervieraŭ, raźmieščanych u Biełarusi.

Voś za parušeńnie hetaj normy i ŭvodzicca administracyjnaja adkaznaść.

Dyk ci zabaraniaje ci ŭkaz № 60 dziejnaść servisaŭ Google, Yandex, Facebook, Vkontaktie i inšych u Biełarusi? Z farmalna-jurydyčnaha punktu hledžańnia — tak, zabaraniaje. Kali nie brać pad uvahu pasłuhi elektronnaj pošty, ad rehistracyi jakoj dziaržava pakul admoviłasia, to ŭsie astatnija servisy hetych kampanij z pazicyi zakanadaŭstva źjaŭlajucca pasłuhami, choć i biaspłatnymi. Takim čynam, jany pavinnyja akazvacca biełaruskimi kampanijami ŭ damiennaj zonie.by i praź biełaruskija sierviery.

Adnak praktyčna realizavać hetuju zabaronu na siońniašni dzień nie ŭjaŭlajecca mahčymym. I sprava jak raz u adkaznaści. Pryniaty zakonaprajekt praduhledžvaje administracyjnuju adkaznaść tych arhanizacyj, jakija ažyćciaŭlajuć dziejnaść pa realizacyi tavaraŭ, rabot, pasłuh u Biełarusi. A pryciahnuć da adkaznaści kampanii Google, Yandex abo Facebook budzie vielmi i vielmi prablematyčna.

Normy adkaznaści, praduhledžanyja samim ukazam, taksama nieefiektyŭnyja ŭ dadzienym vypadku. Jany skiravanyja tolki na sami arhanizacyi, jakija akazvajuć pasłuhi, ale nie na karystalnikaŭ internetu. Ukaz praduhledžvaje vyniasieńnie pradpisańnia pra likvidacyju parušeńniaŭ, a paśla prypynieńnie pravajdaram akazańnia internet-pasłuh parušalniku patrabavańniaŭ ukaza. Uličvajučy, što vyšejzhadanyja kampanii nie majuć siervieraŭ u Biełarusi, prypynieńnie akazańnia internet-pasłuh dadzienym kampanijam budzie niemahčymym.

Adkaznaść dla hramadzian za karystańnie takimi resursami na siońniašni dzień nie praduhledžanaja.

Tamu i normy ŭkaza № 60, i pryniatyja źmieny ŭ Kodeks ab administracyjnych pravaparušeńniach skiravanyja ŭ pieršuju čarhu suprać biełaruskich kampanij i pradprymalnikaŭ, jakija realizujuć tavary, vykonvajuć pracy i akazvajuć pasłuhi praz internet. Takim arhanizacyjam i pradprymalnikam možna pracavać tolki ŭ damiennaj zonie.by i praz raźmieščanyja ŭ Biełarusi sierviery.

• 0
• 0
• 0
• 0
• 0
• 0
• 0
• 0