Štotydzień biełarusy źjazdžajuć na pracu ŭ hetu krainu.
«Davać intervju nam nie rekamiendujuć. A na pytańni ab pracy možna adkazvać tolki z dazvołu». Biełaruska Volha raskazała pra svoj pobyt u Karakasie.
«Naša Niva»: Čamu vyrašyli pajechać u Vieniesuełu?
Volha: Mahčymaść moŭnaj praktyki. Hodny zarobak (u Biełarusi davoli ciažka znajści pracu ź ispanskaj movaj u zamiežnaekanamičnaj dziejnaści, a nie pierakładčyka). U Karakasie ŭ mianie hadavaja damova ź biełaruskaj firmaj. Pracuju ekanamistam.
«NN»: Šmat było žadajučych vyjechać tudy na pracu? Jak prachodziŭ adbor?
V: Mnohich pałochaje vysoki ŭzrovień złačynnaści ŭ krainie, asabliva ŭ stalicy. Upeŭniena, što va ŭmovach ciapierašniaj ekanamičnaj situacyi, kolkaść žadajučych značna pavialičycca, niahledziačy na dalokaje znachodžańnie krainy i ciažki klimat.
Ja prachodziła adbor viasnoj. Heta akazaŭsia praces nie ź lohkich. Psichałahičny test, sumoŭje na ispanskaj movie, kompleksnaje miedycynskaje abśledavańnie. Nakolki viedaju, ciapier miedahlad prachodziać u lečkamisii i adbor našmat uskładniŭsia. Tak što krainu pakidaje zdarovy hienafond. Sami ŭračy pytajucca, vypisvajučy daviedki, a chto tut budzie pracavać.
«NN»: Vy pracujecie razam ź vieniesuelcami. Nakolki heta vysoka kvalifikavanyja śpiecyjalisty?
V: Na budoŭli ich značna bolš, čym u ofisach, dzie jany składajuć prykładna čverć. Na budoŭli za imi patrabujecca pastajanny kantrol. Punktualnaściu taksama nie vyłučajucca. Ja b skazała, što ŭ ich dziejničaje łozunh: «Da pracy treba stavicca abyjakava!»
«NN»: A biełarusaŭ šmat u Vieniesuele?
V: Na maim prajekcie pracujuć kala 50 (15 — u Karakasie, astatnija na budoŭli ŭ horadzie Barynas). Apošnim časam amal štotydzień pryjazdžajuć novyja śpiecyjalisty — architektary, inžyniery, elektryki — biez vałodańnia ispanskaj movaj i pracujuć praź pierakładčykaŭ.
«NN»: Vieniesueła — kraina z vysokim uzroŭniem złačynnaści. Za svaju biaśpieku nie baiciesia?
V: Kali prytrymlivacca ŭsich praviłaŭ biaśpieki — nie chadzić unačy, nie zajazdžać u rajony «barjo», pažadana nie chadzić z noŭtbukami i kaštoŭnymi rečami — možna paźbiehnuć niepryjemnych situacyj. Chacia ad hetaha nichto nie zastrachavany, i vypadki kradziažu siarod biełarusaŭ niaredkija.
«NN»: Ci jość u Karakasie na što tracić hrošy?
V: Žyćcio ŭ Karakasie abychodzicca značna daražej, čym u Biełarusi. Tannaje tolki paliva. Bak bienzinu možna zapravić na $1, a canu adnaho litra navat nichto nie ličyć. Ale prajezd u hramadskim transparcie budzie darahi. Raznastajnaść sadaviny ździŭlaje. Naviedvańnie muzyčnaha teatra, pastanoŭki sučasnaha miuzikła, u pieravodzie na biełaruskija rubli abydziecca ŭ 350 tysiač. Sacyjalizm prajaŭlajecca tolki ŭ svabodnym uvachodzie ŭ bolšaść muziejaŭ.
«NN»: Ci hatovyja zastacca ŭ Vieniesuele na novy kantrakt?
V: Chaču viarnucca ŭ Biełaruś. Darahaja taja chatka, dzie radziła ciabie matka. Vidać, u Vieniesuełu ja hatovaja była b pryjazdžać na zimu, kab pahrecca na karybskim uźbiarežžy. A da piensii možna było b i damok nabyć.
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1919
Kamientary