Načalnik słužby biaśpieki adkaža za abrazu taksista

1 śniežnia sud Savieckaha rajona Homiela razhledzieŭ na zakrytym pasiedžańni administracyjnuju spravu ŭ dačynieńni da načalnika słužby ŭłasnaj biaśpieki ŭpraŭleńnia departamienta finansavych rasśledavańniaŭ Kamiteta dziaržkantrolu pa Homielskaj vobłaści (UDFR KDK) Aleha Alaksandrava, abvinavačanaha ŭ abrazie homielskaha taksista.

Sud pryznaŭ jaho vinavatym u administracyjnym pravaparušeńni — naŭmysnym prynižeńni honaru i hodnaści asoby (abraza, artykuł 9.3 KaAP) i padvierhnuŭ administracyjnamu štrafu ŭ 10 bazavych vieličyń (350 tys. rubloŭ), pieradaje BiełaPAN.

Pastanova suda moža być abskardžanaja abo apratestavanyja praz Homielski abłasny sud.

Alaksandraŭ nie staŭ kamientavać rašeńnie suda, admovilisia ad kamientaroŭ milicyjanty-śviedki i taksist, jaki źjaŭlajecca paciarpiełym. Pa ich słovach, im zabaroniena razmaŭlać z presaj, bo čałaviek, pryznany vinavatym u abrazie, «zajmaje vysokaje stanovišča».

Razhlad administratyŭnaj spravy pa artykule na padstavie pratakoła, składzienaha ŭ dačynieńni da Aleha Alaksandrava, pačaŭsia ŭ sudzie 16 listapada. U toj dzień čynoŭnik KDK padaŭ chadajnictva ab praviadzieńni pasiedžańnia ŭ zakrytym režymie. Jon zajaviŭ, što «niezakonnyja dziejańni milicyi» źniavažyli jaho honar i hodnaść, a z pryčyny taho, što jon maje peŭny sacyjalny status, jon nie chacieŭ by, kab abstaviny spravy byli addanyja hałosnaści. Sudździa zadavoliŭ chadajnictva, i sprava razhladałasia na zakrytym pasiedžańni.

Jašče da sudovaha razboru milicyjanty, jakija prachodzili pa spravie śviedkami, paviedamili, što 6 kastryčnika kala 23 hadzin dva supracoŭniki PPSM prybyli na Rečyckuju šašu pa zajavie taksista ŭ słužbu «102» u suviazi z tym, što klijent nie raspłaciŭsia pa ličylniku.

Na miescy milicyjanty vyśvietlili, što pasažyr padniaŭsia ŭ kvateru, i z taksistam prajšli za im.

Dźviery im adkryŭ mužčyna, jaki, pa słovach supracoŭnikaŭ PPSM, abražaŭ i hrubiŭ im, pačaŭ pahražać niepryjemnaściami. Narad milicyi dastaviŭ hramadzianina ŭ Saviecki RAUS. Ad prachodžańnia ahladu na pradmiet ałkaholnaha apjanieńnia jon admoviŭsia.

Paśla zdareńnia, pa słovach milicyjantaŭ, mužčyna, jaki akazaŭsia načalnikam słužby ŭłasnaj biaśpieki UDFR KDK pa Homielskaj vobłaści, napisaŭ zajavu z prośbaj pryciahnuć milicyjantaŭ da kryminalnaj adkaznaści za pieravyšeńnie ŭłady (art. 426 KK).

Pravierku ŭ dačynieńni da milicyjantaŭ pravodzić śledčy adździeł prakuratury Homielskaj vobłaści. Pakul nieviadomyja vyniki pravierki. Načalnik śledčaha adździeła prakuratury vobłaści nie kamientuje incydent. Raniej načalnik słužby ŭłasnaj biaśpieki pracavaŭ tam śledčym.

Pa słovach milicyjantaŭ, jany ŭ svaju čarhu napisali zvaroty ŭ Administracyju prezidenta, KDB i KDK z prośbaj abjektyŭna razabracca ŭ dadzienaj spravie i pryciahnuć vinavataha da kryminalnaj adkaznaści za złoŭžyvańnie ŭładaj.

• 0
• 0
• 0
• 0
• 0
• 0
• 0
• 0