Nataŭcam mrojacca biełaruskija frehaty
U ichnim štabie mnie skazali: kab abjektyŭna acanić vaša vojska, varta było b razam pahulać ŭ vajnu. Piša ŭ svaim błohu Alaksandar Kłaskoŭski.
Siońniašni Dzień abaroncaŭ Ajčyny naviejaŭ militaryscki ŭspamin.
Kolki času tamu daviałosia trapić ŭ nataŭski štab, što u belhijskim haradku Mons.
Na pytańni žurnalistaŭ adkazvała hrupa ichnich aficeraŭ.
Nu ja vaźmi dyj zapytajsia: jak vy rasceńvajecie śćvierdžańnie biełaruskaha hałoŭnakamandujučaha pra toje, što našaje vojska — adno z samych bajazdolnych u Eŭropie?
Nataŭcy trochi sumielisia.
Potym adzin, kanadyjski marski aficer (u ich ža tam — internacyjanał, i kožny ŭ svaich pahonach), kaža: viedajecie, tut lepiej nie ekspromtam adkazvać. Varta mapy, daviedniki pahladzieć. Ci maje vaša Biełaruś vychady da mora, kolki ŭ jaje frehataŭ, padvodnych łodak i hetak dalej...
Kanadyjski marski voŭk adrazu źniaŭ u mianie kamień z dušy.
Ja zrazumieŭ, što našyja amatary strašyć z televizara mohuć trochi pieravieści duch. Vierałomny monstr jaŭna nie źbirajecca napadać na nas zaŭtra. Bo inačaj by trochi lepiej vyvučyŭ vajskovy patencyjał hordaje suchaputnaje respubliki :)
Kaniešnie, u NATO jość i bolšyja admysłoŭcy što da Biełarusi. A ŭvohule, skazali mnie ŭ Monsie, kab abjektyŭna acanić vaša vojska, varta było b razam pahulać ŭ vajnu — to bok zładzić sumiesnyja maneŭry.
Ale tut pieraškody, jak vy razumiejecie, najpierš palityčnyja.
I navat, ja skazaŭ by, mentalnyja.
Zrešty, ciapier, kali našaje kiraŭnictva sprabuje lacieć na dvuch kryłach, mo i ź vierałomnym monstram trochi zblizimsia?
Prynamsi, raskvataravanaja va Ŭruččy miratvorčaja rota sioleta maje ŭziać udzieł ŭ mižnarodnych maneŭrach. U Albanii :)
P.S. Aŭtara hetych radkoŭ, aficera zapasu (na zdymku źleva), stali raz-poraz vyskubać na maneŭry padčas pierabudovy, kali redahavanaja im tady hazeta pačała pisać na raniej zabaronienyja temy kštałtu niestatutnych stasunkaŭ u vojsku.
Daviaralna tłumačyli: kab nia byŭ nadta razumny :)
Fota z archivu aŭtara.
Ciapier čytajuć
Pamiatajecie byłoha pamiežnika, jaki staŭ dalnabojščykam i ŭ Hiermanii pryznavaŭsia ŭ lubovi da Łukašenki? Ź im biada17
Kamientary