Натаўцам мрояцца беларускія фрэгаты
У іхнім штабе мне сказалі: каб аб'ектыўна ацаніць ваша войска, варта было б разам пагуляць ў вайну. Піша ў сваім блогу Аляксандар Класкоўскі.
Сёньняшні Дзень абаронцаў Айчыны навеяў мілітарысцкі ўспамін.
Колькі часу таму давялося трапіць ў натаўскі штаб, што у бэльгійскім гарадку Монс.
На пытаньні журналістаў адказвала група іхніх афіцэраў.
Ну я вазьмі дый запытайся: як вы расцэньваеце сьцьверджаньне беларускага галоўнакамандуючага пра тое, што нашае войска — адно з самых баяздольных у Эўропе?
Натаўцы трохі сумеліся.
Потым адзін, канадыйскі марскі афіцэр (у іх жа там — інтэрнацыянал, і кожны ў сваіх пагонах), кажа: ведаеце, тут лепей не экспромтам адказваць. Варта мапы, даведнікі паглядзець. Ці мае ваша Беларусь выхады да мора, колькі ў яе фрэгатаў, падводных лодак і гэтак далей...
Канадыйскі марскі воўк адразу зьняў у мяне камень з душы.
Я зразумеў, што нашыя аматары страшыць з тэлевізара могуць трохі перавесьці дух. Вераломны монстр яўна не зьбіраецца нападаць на нас заўтра. Бо іначай бы трохі лепей вывучыў вайсковы патэнцыял гордае сухапутнае рэспублікі :)
Канешне, у НАТО ёсьць і большыя адмыслоўцы што да Беларусі. А ўвогуле, сказалі мне ў Монсе, каб аб'ектыўна ацаніць ваша войска, варта было б разам пагуляць ў вайну — то бок зладзіць сумесныя манэўры.
Але тут перашкоды, як вы разумееце, найперш палітычныя.
І нават, я сказаў бы, мэнтальныя.
Зрэшты, цяпер, калі нашае кіраўніцтва спрабуе ляцець на двух крылах, мо і зь вераломным монстрам трохі зблізімся?
Прынамсі, раскватараваная ва Ўруччы міратворчая рота сёлета мае ўзяць удзел ў міжнародных манэўрах. У Альбаніі :)
P.S. Аўтара гэтых радкоў, афіцэра запасу (на здымку зьлева), сталі раз-пораз выскубаць на манэўры падчас перабудовы, калі рэдагаваная ім тады газэта пачала пісаць на раней забароненыя тэмы кшталту нестатутных стасункаў у войску.
Давяральна тлумачылі: каб ня быў надта разумны :)
Фота з архіву аўтара.
Цяпер чытаюць
У Мінску масажыст Андрэй таемна здымаў голых кліентак27
Каментары