Biełaruskija pravaabaroncy prosiać Kavalenku spynić haładoŭku

Jak paviedamiŭ pravaabaronca Valancin Stefanovič, taki zaklik utrymlivajecca ŭ śpiecyjalna pryniataj zajavie. Jaho aŭtary adznačajuć, što «ź vialikaj tryvohaj» sočać za tym, jak pryncypova Kavalenka adstojvaje svaje pierakanańni i hramadzianskuju pazicyju. Razam z tym pravaabaroncy zaklikajuć apazicyjaniera spynić haładoŭku jak maha chutčej, bo ciapierašnija ŭłady nie pavažajuć ni jaho pierakanańniaŭ, ni jaho žyćcia. «My ličym Vaš pieraśled vyklučna palityčnym i zaklikajem Vas źbierahčy svajo zdaroŭje dla svajoj siamji, žonki, dziaciej, a taksama dla Biełarusi i jaje budučyni», — skazana ŭ zajavie, jakaja siońnia budzie adpraŭlena jamu ŭ śledčy izalatar Viciebska.

«U vypadku, kali sudovy pryhavor budzie źviazany z pazbaŭleńniem voli, my budziem zmahacca za Vaša vyzvaleńnie, jak i za vyzvaleńnie kožnaha z palityčnych źniavolenych. Na sumleńni hetaj ułady ŭžo nie adno złačynstva, ale nie varta takim čynam achviaravać saboj», — pierakanany aŭtary zajavy.

Nahadajem, Kavalenka znachodzicca ŭ viciebskim SIZA z 19 śniežnia 2011 hoda. 20 śniežnia jon abjaviŭ haładoŭku ŭ znak pratestu suprać svajho zatrymańnia. Kavalenka byŭ zatrymany ŭ miežach spravy na padstavie artykuła 415 KK (uchileńnie ad adbyvańnia pakarańnia ŭ vyhladzie abmiežavańnia voli), aktyvistu pahražaje da troch hadoŭ pazbaŭleńnia voli. Nahodaj dla kryminalnaha pieraśledu stali čatyry parušeńni, jakija Kavalenka nibyta ŭčyniŭ, adbyvajučy pakarańnie pavodle pryhavoru suda Kastryčnickaha rajona Viciebska. U mai 2010 hoda jon byŭ asudžany na try hady pazbaŭleńnia voli ŭmoŭna za vyviešvańnie bieł-čyrvona-biełaha ściaha na hałoŭnaj jołcy Viciebska 7 studzienia.

«Abvinavačańni ŭ naŭmysnym uchileńni ad adbyvańnia pakarańnia absurdnyja, — zajaviŭ Valancin Stefanovič u kamientaryi BiełaPAN. — Ja taksama chaču nahadać, što pieršapačatkova Kavalenka stavili ŭ vinu nie tolki parušeńnie hramadskaha paradku, ale i supraciŭleńnie milicyi. Adnak tady była „libieralizacyja“, i Kavalenku pakinuli na voli, chaj i ŭmoŭnaj. Zaraz dla kiraŭnictva Viciebska taki čałaviek stvaraje šmat prablem, tamu jaho i sprabujuć izalavać».

Spynić haładoŭku Kavalenku taksama zaklikaŭ lidar KCHP-BNF Zianon Paźniak. Prezident Jeŭraparłamienta Marcin Šulc zaklikaŭ biełaruskija ŭłady nieadkładna i biez usiakich umoŭ vyzvalić Kavalenku i akazać jamu ŭsiu nieabchodnuju miedycynskuju dapamohu.

Sud nad Kavalenkam pryznačany na 21 lutaha.

• 0
• 0
• 0
• 0
• 0
• 0
• 0
• 0