Čym rasijskija vybary adroźnivajucca ad biełaruskich?

4 sakavika Rasija budzie abirać prezidenta. U vybarach voźmuć udzieł piać kandydataŭ. Siońnia ž tam — dzień cišyni, zabaroniena lubaja ahitacyja.

Siarod ich były kiraŭnik krainy i siońniašni prem'jer-ministr Uładzimir Pucin, tradycyjnyja sparynh-partniory kamunist Hienadź Ziuhanaŭ i «libieralny demakrat» Uładzimir Žyrynoŭski, eser Siarhiej Mironaŭ i aliharch Michaił Procharaŭ.

Apazicyja zaklikaje hałasavać za kaho zaŭhodna, aproč Pucina. Tym nie mienš, pavodle apošnich sacyjałahičnych daśledavańniaŭ, prem'jer-ministr nabiraje bolš za 50%.

Šmat kamu zdajecca, što rasijskija vybary padobnyja da biełaruskich, ale pry bolš detalovym razhladzie prajaŭlajecca bolš adroźnieńniaŭ, čym padabienstvaŭ.

1. Veb-kamiery i prazrystyja skryni

91400 vybarčych učastkaŭ u Rasii buduć abstalavanyja veb-kamierami. Kab była mahčymaść prosta ŭ režymie realnaha času sačyć za hałasavańniem na ŭčastkach. Zrabić heta zahadaŭ asabista Pucin.

Praciŭniki ŭłady raskrytykavali hetuju inicyjatyvu, jak prafanacyju i vykidvańnie na viecier biudžetnych srodkaŭ. Suśvietnyja ahienctvy ablacieli fotazdymki, jak vebkamiery ŭstaloŭvajuć u hłuchich viosačkach Sibiry.

Na tracinie ŭčastkaŭ krainy buduć ustalavanyja prazrystyja skryni. Najpierš jany buduć ustalavanyja ŭ bujnych haradach — Maskvie, Sankt-Pieciarburhu. «Heta zroblena dla taho, kab praduchilić ukidvańnie ŭ skryni pačkaŭ biuleteniaŭ jašče da pačatku hałasavańnia», — adznačyŭ staršynia rasijskaha CVK Uładzimir Čuraŭ.

U Biełarusi ž niama ni skryniaŭ, ni vebkamieraŭ. Pierad vybarami-2010 naš CVK tłumačyŭ, što na prazrystyja skryni niama hrošaj, ale ŭ toj ža čas kamisija nie hatovaja prymać dapamohu ad biznesoŭcaŭ.

2. Daterminovaje hałasavańnie

Jość mierkavańnie, što mienavita ź biuleteniami tych, chto pryjšoŭ na vybary daterminova, lahčej rabić falsifikacyi. Apazicyja pastajanna zaklikaje prychodzić na ŭčastki tolki ŭ asnoŭny dzień hałasavańnia. Na apošnich miascovych vybarach zdarałasia, što demakratyčnyja kandydaty vyjhravali ŭ kankurentaŭ u dzień vybaraŭ, ale prajhravali z ulikam daterminovych hałasoŭ.

Na prezidenckich vybarach 2010 hoda ŭ Biełarusi raniej pryznačanaha času prahałasavała 23%, a ŭ 2006 — 31%. U internatach, na zavodach administracyja zaklikaje hałasavać daterminova. Heta vyklikaje šmat padazreńniaŭ.

Što datyčyć Rasii, to ŭ daterminovym hałasavańni, jakoje pačałosia jašče 17 lutaha, udzieł uźniało mienš za 1% vybarcaŭ.

3. Nazirańnie

Za padlikam hałasoŭ u Rasii majuć prava sačyć jak siabry vybarčaj kamisii, tak i naziralniki (rasijskija i mižnarodnyja), davieranyja asoby kandydataŭ.

U Biełarusi jość prava naziralnikaŭ «sačyć za padlikam hałasoŭ ź miesca, jakoje nie zaminaje pracy siabroŭ kamisii. Jany tak ščylna abstupajuć stoł pry padliku hałasoŭ, što ŭbačyć napisanaje na biuleteniach stanaviłasia spravaj amal nierealnaj.

Naziralnikam u Rasii dazvolena vieści videa i fotazdymki.

4. Ahitacyja

U adroźnieńnie ad Biełarusi, kandydaty na prezidenta Rasii źjaŭlajucca na respublikanskich telekanałach nie dva razy padčas televystupaŭ. Pra kandydataŭ niejtralna raskazvajuć u vypuskach navinaŭ, tam nie pradstaŭleny adzin Pucin.

Jašče jość mahčymaść tranślavańnia na TV ahitacyjnych rolikaŭ, jakija paśpiavaje vyvučyć kožny vybarca. A nie daznajecca proźviščy kandydataŭ z vypadkova atrymanaj ulotki.

Usie kandydaty bieśpieraškodna pravodziać mitynhi ŭ svaju padtrymku. Dy i nie tolki kandydaty. Apazicyja, jakaja zastałasia na vybarach biez svaich pradstaŭnikoŭ, taksama pravodzić dazvolenyja ŭładami akcyi. Zatrymanych na ich niama.

Svabodnaj kankurencyi palitykaŭ u Rasii jašče niama. Adnak i ŭłada Pucina nie takaja absalutnaja, jak u Łukašenki.

***

Hramadzianie Rasii zmohuć prahałasavać na prezidenckich vybarach u siami haradach Biełarusi.

Minsk — vuł. Navavilenskaja, 1a, pasolstva RF u Biełarusi;

Viciebsk — vuł. Majakoŭskaha, 1, haradski centr kultury;

Homiel — vuł. Iryninskaja, 16, haradski centr kultury;

Mahiloŭ — vuł. Leninskaja, 61, licej Biełaruska¬rasijskaha ŭniviersiteta;

Babrujsk — vuł. Sacyjalistyčnaja, 90, filijał Biełaruskaha dziaržaŭnaha ekanamičnaha ŭniviersiteta;

Brest — vuł. Puškinskaja, 10, hienieralnaje konsulstva Rasii;

Hrodna — pł. Tyzienhaŭza, 5, Hrodzienskaja dziciačaja škoła mastactvaŭ.

• 0
• 0
• 0
• 0
• 0
• 0