Žonka Kavalenki baicca, što muž moža nie pieranieści etapavańnia ŭ Navinki

Žonka viciebskaha aktyvista Kansiervatyŭna-chryścijanskaj partyi — BNF Siarhieja Kavalenki Alena baicca, što jaje muž moža nie pieranieści etapavańnia ŭ respublikanskuju psichijatryčnuju balnicu ŭ Navinkach (Minsk).

Nahadajem, što 10 krasavika sudovaja kalehija Viciebskaha abłasnoha suda pryznačyła Siarhieju Kavalenku kompleksnuju psichijatryčnuju ekśpiertyzu va ŭmovach stacyjanara. U Navinki jon pavinien być adpraŭleny ŭ chutkim časie.

«Ja nie viedaju, jak u jaho stanie, u stanie haładoŭki, jon pieraniasie etap, — skazała jana ŭ kamientaryi BiełaPAN. — U mianie jość tolki dźvie dumki pra heta. Pieršaja — jon pamre pa darozie, i tady zdymajucca ŭsie pytańni. Druhaja — pryznajuć, što ŭ jaho poŭnaściu adsutničaje pamiać, dyskredytujučy tym samym idei, za jakija jon zmahajecca, i pryznačać prymusovaje lačeńnie ŭ duchu savieckich časoŭ i karnaj psichijatryi», — miarkuje žonka apazicyjaniera.

Alena niepakoicca z-za taho, što ŭžo pryblizna troje sutak nichto sa svajakoŭ i blizkaha atačeńnia Siarhieja jaho nie bačyŭ. «Učora, 9 krasavika, da jaho nie dapuścili advakata. Siońnia jaho nie pryvieźli ŭ sud. Siońnia ž jaho ŭ kałonii „Vićba-3“ pasprabavała naviedać maci, adnak urač kałonii zajaviŭ, što Siarhieju ŭkałoli niejki siedatyŭny srodak, jon śpić i praśpić da viečara», — paviedamiła Alena Kavalenka.

Siarhiej Kavalenka abskardžvaje pryhavor, vyniesieny jamu 24 lutaha sudom Pieršamajskaha rajona Viciebska. Sud pryznaŭ jaho vinavatym va ŭchileńni ad adbyvańnia pakarańnia ŭ vyhladzie abmiežavańnia voli (art. 415 KK). Havorka idzie pra pakarańnie, vyniesienaje apazicyjanieru ŭ mai 2010 hoda za vyviešvańnie bieł-čyrvona-biełaha ściaha na hałoŭnaj navahodniaj jołcy Viciebska, — try hady pazbaŭleńnia voli ŭmoŭna. Kavalenka byŭ zatrymany 19 śniežnia 2011 hoda i z taho času znachodzicca ŭ źniavoleńni.

U znak pratestu suprać dziejańniaŭ uład aktyvist KCHP-BNF abviaściŭ haładoŭku, padčas jakoj straciŭ pałovu svajoj vahi. Zaraz, pavodle słoŭ žonki, jon važyć pryblizna 45 kiłahramaŭ zamiest raniejšych 83. Kavalenku ŭtrymlivajuć u psichijatryčnym adździaleńni balnicy na terytoryi viciebskaj papraŭčaj kałonii «Vićba-3».

1 krasavika jaho pačali prymusova karmić. Prymać ježu samastojna ŭ turemnych umovach apazicyjanier admaŭlajecca, niahledziačy na šmatlikija ŭhavorvańni rodnych, prośby pradstaŭnikoŭ hramadskaści i apazicyjnych palitykaŭ. Pry hetym Kavalenka zajaŭlaje, što spyniŭ by haładoŭku, kali b jaho pieraviali ŭ zvyčajnuju cyvilnuju balnicu.

Vyzvaleńnia viciebskaha apazicyjaniera patrabujuć pravaabaroncy i mižnarodnyja arhanizacyi.

• 0
• 0
• 0
• 0
• 0
• 0
• 0
• 0