Chranałohija trahiedyi — ad terakta da vykanańnia prysudu

11 krasavika 2011, pieršaja hadzina paśla trahiedyi ŭ mietro

U internecie źjaŭlajucca pieršyja źviestki pra vybuch na stancyi «Kastryčnickaja». U 17:56, u hadzinu pik, na pieronie stancyi prahučaŭ vybuch.

Reparciory paviedamlajuć pra zabitych i skalečanych. Źjaŭlajucca pieršyja fotazdymki (fota 1, 2): razhublenyja, pierapałochanyja, pierapeckanyja pyłam i kryvioj tvary ludziej.

Z vulic horada biez supynku danosiacca sireny «chutkich». Vyratavalnyja słužby pracujuć zładžana. Im dapamahajuć prostyja ludzi: vynosiać paranienych. Trymajuć kropielnicy.

Ahulnaj jasnaści taho, što zdaryłasia, pakul niama. Dziaržaŭnyja telekanały maŭčać. Mabilnaja suviaź pracuje ź pierabojami.

Pad kaniec taho strašnaha dnia stali viadomyja papiarednija ličby achviar: 12 zabitych i kala 150 paranienych. Paźniej kolkaść achviar vyraście da 15 čałaviek.

Pieramovy supracoŭnikaŭ MNS na miescy trahiedyi.

* * *

13 krasavika 2011 u Minsku abviaścili žałobu ŭ suviazi z trahiedyjaj u mietro (fota 4). Na budynkach stalicy pryspuścili dziaržaŭnyja ściahi z žałobnymi stužkami. Da kanca tydnia ŭ stalicy byli admienienyja zabaŭlalnyja mierapryjemstvy. U Kałodziščach, što pad Minskam, prajšli pieršyja pachavańni achviar terakta. Inšych pachavali na nastupny dzień na Paŭnočnych mohiłkach i ŭ Atolinie.

«Maskoŭskaja» linija mietro jašče nie pracavała. Naziemny hramadski transpart na praśpiekcie pierahružany.

Na vychadzie z «Kastryčnickaj» z boku ŭniviersama «Centralny» ŭstalavali časovyja šyldy z fotazdymkami achviaraŭ vybuchu. Sotni ludziej pryjšli da pastamienta z kvietkami i źničkami (fota 5—7). Mnohija z nas tady ŭsio jašče nie mahli pavieryć, što padobnaje mahło zdarycca ŭ Biełarusi.

* * *

14 krasavika 2011 stancyja mietro «Kastryčnickaja» zapracavała ŭ štatnym režymie. Novaja plitka na miescy vybuchu vyhladała jak ścipły miemaryjał (fota 8). Na kałonach pobač byli jašče bačnyja ślady ad vybuchu.

Chtości z pasažyraŭ pakłaŭ kvietki na novuju plitku, ale jany pralažali tam niadoŭha: supracoŭniki padziemki pieranieśli ich da ŭvachodu ŭ mietro.

* * *

21 lipienia 2011 a 13.30 la pamiatnaha znaku achviaram vybuchu ŭ minskim mietro źjaviŭsia mužčyna na mylicach z kvietkami ŭ rukach. 21 lipienia A 13.30 la pamiatnaha znaku achviaram vybuchu ŭ minskim mietro źjaviŭsia mužčyna na mylicach z kvietkami ŭ rukach (fota 9). Padyšoŭ da pamiatnaj šyldy na ŭvachodzie stancyi «Kastryčnickaja» i sa słovami «Viečnaja pamiać» uskłaŭ kvietki.

Heta byŭ 47-hadovy Vadzim Ciuciunoŭ, jaki byŭ mocna paranieny ŭ časie vybuchu — u toj momant znachodziŭsia zusim pobač.

Doŭhi čas lačyŭsia ŭ Respublikanskim špitali MUS. Dziakujučy miedykam paśpiachova prajšoŭ reabilitacyju. Pieršaje, što jon zrabiŭ jak staŭ na nohi — adnios kvietki da mietro.

* * *

15 vieraśnia 2011 — pieršy dzień sudovaha pracesu pa spravie 11 krasavika (fota 10, 11). Praces nad Dźmitryjem Kanavałavym i Uładzisłavam Kavalovym prachodziŭ u minskim Domie pravasudździa. Jon byŭ adkrytym. Miery biaśpieki, pryniatyja śpiecsłužbami, urazili nie tolki śviedak i paciarpiełych, ale i daśviedčanych žurnalistaŭ. Ščylny nadhlad na ŭvachodzie, šerahi śpiecnazaŭcaŭ pierad scenaj, słužbovyja sabaki, zbroja ŭ rukach ludziej u maskach, što vyzirali ź dźviarej za scenaj. U zale na kožnym šerahu siadzieli supracoŭniki ŭ cyvilnym, jakija sačyli za paradkam u zale.

U pieršy ž dzień pracesu Dźmitryj Kanavałaŭ pryznaŭ vinu za vybuch u mietro i na 3 lipienia.

* * *

15 listapada 2011. Advakat Kavalova Abraziej zajaviŭ pra mantaž videa, źniataha z kamier nazirańnia ŭ mietro. Paciarpieły Tyškievič vykazaŭ sumnieńni nakont dokaznaj bazy śledstva. Jon zajaviŭ šerah chadajnictvaŭ, ale ich nie zadavolili.

Pravam apošniaha słova skarystaŭsia tolki Kavaloŭ. «Mnie soramna pierad saboj i Dzimam, što akazaŭsia słabavolnym i daŭ pakazańni suprać jaho, — skazaŭ jon. — Kali ja znachodžusia ŭ hetaj kletcy, heta jašče nie značyć, što ja vinavaty». Jon paŭtaryŭ svaje słovy pra toje, što davaŭ pakazańni na Kanavałava pad psichałahičnym ciskam, a pra padrabiaznaści vybuchaŭ daviedaŭsia ad śledčych.

Da vyniasieńnia prysudu zastavałasia 15 dzion.

* * *

30 listapada 2011. Abvieščany prysud pa spravie ab vybuchu ŭ mietro. Sudździa Alaksandr Fiedarcoŭ pryznaŭ Dźmitryja Kanavałava i Uładzisłava Kavalova vinavatymi ŭ vybuchach 11 krasavika i 4 lipienia ŭ Minsku. I prysudziŭ ich da rasstrełu.

Usia sčarniełaja ad pieražyvańnia Luboŭ Kavalova zajaviła žurnalistam, što ličyć spravu sfabrykavanaj (fota 12). Jana napisała zajavu ab pamiłavańni na imia Łukašenki.

* * *

2 śniežnia 2011 na pres-kanfierencyi pa vynikach sudovaha pracesu prakuror Andrej Švied zajaviŭ, što «Kanavałaŭ i Kavaloŭ panieśli zasłužanaje pakarańnie». Supracoŭniki milicyi, KDB i prakuratury adkazvali na pytańni žurnalistaŭ, jakija, na ich dumku, nie byli ŭ poŭnaj miery raskrytyja ŭ časie pracesu (fota 13). Jak zatrymlivali Kanavałava-Kavalova? Jakija matyvy Kanavałava? Ci źniščać dokazy złačynstva? Adkazy supracoŭnikaŭ śpiecsłužbaŭ mnohim padalisia niepierakanaŭčymi.

* * *

15 sakavika 2012. Luboŭ Kavalova pryjechała ŭ Minsk daviedacca, ci žyvy jašče jaje syn i ŭ jakoj turmie jon znachodzicca (fota 15). Dniom raniej źjaviłasia infarmacyja, što Łukašenka admoviŭ asudžanym u pamiłavańni.

«Niama adčuvańnia, što ŭžo zdaryłasia samaje strašnaje, chacia całkam mahčyma», — skazała jana ŭ toj dzień žurnalistam. Nasamreč jaje syna, jak i Kanavałava, užo nie było ŭ žyvych.

• 0
• 0
• 0
• 0
• 0
• 0