Top-5 novych biełaruskich prahram dla Androidaŭ

Štodzień u śviecie źjaŭlajucca dziasiatki i sotni novych prahram dla płatformy Android. Niekatoryja ź ich raspracavanyja dla biełaruskich realijaj. Vykarystańnie ich moža ŭ peŭnych situacyjach dapamahčy ŭładalnikam smartfonaŭ. U studzieni “Naša Niva” składała rejtynh z 7 samych karysnych prahram, siońnia my dadajem da jaho jašče piać spasyłak.

1. Čyhunka. Elektryčki Biełarusi. https://play.google.com/store/apps/details?id=com.deadyogi.apps.chugunka

Prahrama z raskładam ruchu biełaruskich pryharadnych ciahnikoŭ. Pry kožnym zapycie jana źviartajecca ŭ internet, kab spraŭdzić infarmacyju na sajcie Biełčyhunki. Praŭda, atrymanyja źviestki zastajucca ŭ kešy prahramy, tamu pahladzieć ich jašče raz atrymajecca i biez dostupa da sieciva. Prahrama mahła b być našmat bolš karysnaj, kali b stvaralniku ŭdałosia dadać u jaje infarmacyju pra pasažyrskija ciahniki.

2. Kanstytucyja Biełarusi https://play.google.com/store/apps/details?id=com.zodinplex.constitution.by

3. Kryminalny kodeks Biełarusi https://play.google.com/store/apps/details?id=com.zodinplex.penalcode

Dźvie biaspłatnyja prahramy ad adnaho aŭtara dapamohuć uzhadać patrebnuju farmuloŭku z dakumientaŭ. Adnak karystacca imi budzie zručna tolki tym, chto razumieje strukturu Kanstytucyi i Kryminalnaha kodeksu. Adsutnaść pošuku pa numary artykuła ci pa klučavych słovach prymušaje šukać patrebny punkt uručnuju, pa raździełach. U stresavaj situacyi, naprykład, kali nad vami staić milicyjant, heta naŭrad ci atrymajecca zrabić chutka.

4. Aŭtavyznačalnik numara https://play.google.com/store/apps/details?id=by.rix.AndroCID

Pryncyp dziejańnia prahramy prosty – kali vam niechta telefanuje, numar aŭtamatyčna źviarajecca ź internet-bazaj i vyśviečvaje na ekranie imia i proźvišča vašaha surazmoŭcy, jahony dzień naradžeńnia i navat adras rehistracyi. Baza numaroŭ poŭnaja – jość i stacyjanarnyja telefony, i bazy troch mabilnych apierataraŭ. U papiaredniaj viersii prahramy isnavała mahčymaść pošuku pa hetych bazach. Ciapier takaja karysnaja funkcyja vyniesienaja ŭ płatnuju viersiju, jakaja kaštuje $90.

Pierad tym, jak zarehistravacca, varta zadumvacca, ci hatovyja vy ahałosić u adkaz svaje dadzienyja – proźvišča, imia i imia pa baćku, kantaktnyja numary i IMIEI svajho mabilnaha telefona.

5. Jandeks-mapy +Korki https://play.google.com/store/apps/details?id=ru.yandex.yandexmaps

Papularnaja rasijskaja prahrama, jakaja dapamahaje aryjentavacca na miascovaści i adsočvać korki na darohach, praciahvaje raźvivacca. U jaje dadałasia karysnaja funkcyja – mahčymaść zahruzki mapy nasielenych punktaŭ. Ź biełaruskich haradoŭ pradstaŭleny tolki Minsk (jaho mapa važyć kala 80 miehabajtaŭ). Spampavaŭšy jaje zahadzia, možna nie kłapacicca, što prahrama sažre kaštoŭny trafik. Ciapier praź internet pieradajecca tolki infarmacyja ab korkach.

Jak zahruzić prahramy?

Zajści ŭ prahramu «Google Play» u siabie na smartfonie i ŭvieści ŭ pošuk nazvu prahramu sa spasyłki. Naprykład, dla Kryminalnaha kodeksu heta «com.zodinplex.penalcode» (častka spasyłki, jakaja idzie paśla simvałaŭ «id=»). Albo spampavać fajły z ukazanych spasyłak sabie na kampjutar, a paśla skapiravać ich na smartfon i zapuścić.

• 0
• 0
• 0
• 0
• 0
• 0