Na kanfierencyju pa biaśpiecy ŭ Minsk pryjechaŭ ministr zamiežnych spraŭ Vienhryi
Ministr zamiežnych spraŭ Vienhryi Peter Sijarta ŭziaŭ udzieł u mižnarodnaj kanfierencyi pa jeŭrazijskaj biaśpiecy, jakaja prachodzić u Minsku i sabrała ŭ asnoŭnym pradstaŭnikoŭ dziaržaŭ, jakija padtrymlivajuć ciesnyja suviazi z Rasijaj, uklučajučy Kitaj, Iran i Siryju, piša Radyjo Svaboda.
Vystupajučy na adkryćci kanfierencyi jak adzin z hałoŭnych vystupoŭcaŭ, Sijarta znoŭ zajaviŭ pra toje, što Budapiešt vystupaje suprać sankcyjnaj palityki ŭ adnosinach da Rasii. Budučy členam ES, Vienhryja tym nie mienš uchvaliła ŭsie 14 pakietaŭ sankcyj, uviedzienych u suviazi z uvarvańniem Rasii va Ukrainu. Pa słovach Sijarta, u Jeŭrazii nieabchodna paźbiahać «błokavaha myśleńnia» i, naadvarot, nieabchodna «budavać masty».
Udzieł kiraŭnika vienhierskaha MZS u kanfierencyi, arhanizavanaj Biełaruśsiu — krainaj, u dačynieńni da jakoj taksama byli ŭviedzieny sankcyi Zachadu — jašče raz padkreśliŭ značnyja roznahałośsi, jakija isnujuć pamiž Vienhryjaj i bolšaściu jaje sajuźnikaŭ pa ES i NATA ŭ pytańni ŭzajemadziejańnia z Rasijaj u cełym i vajny va Ukrainie ŭ pryvatnaści. Vydańnie Politico u čaćvier paviedamiła, što pradstaŭniki krain NATA adčuvajuć usio bolšaje zaniepakojeńnie ŭ suviazi ź ciesnym supracoŭnictvam Vienhryi z Maskvoj i Piekinam.
Vienhierskija ŭłady niadaŭna admovilisia ŭdzielničać u abmierkavańni hetaj prablemy na sustrečy ŭ ambasadzie ZŠA ŭ Budapiešcie. Amierykanski pasoł Devid Presman padčas hetaj sustrečy raskrytykavaŭ niadaŭna abvieščanuju vienhierskimi ŭładami daktrynu «ekanamičnaha niejtralitetu», jakaja praduhledžvaje roŭnaje supracoŭnictva jak z Zachadam, tak i z Rasijaj i Kitajem.
Pra hety «niejtralitet» havaryŭ i Sijarta ŭ Minsku.
Čakajecca, što kiraŭnik MZS Vienhryi sustreniecca ŭ Minsku ź ministram zamiežnych spraŭ Rasii Siarhiejem Łaŭrovym.
Toj užo pravioŭ pieramovy ź vice-premjeram Sierbii, jaki taksama prybyŭ na kanfierencyju, i sa śpiecpradstaŭnikom Kitaja Li Chuejem. U svaim vystupie Łaŭroŭ, siarod inšaha, adznačyŭ, što da kanca hoda Rasija padpiša dahavor ab stratehičnym partniorstvie ź Iranam, jaki praduhledžvaje pašyreńnie supracoŭnictva ŭ halinie biaśpieki. Padobny dahavor z Paŭnočnaj Karejaj, padpisany Rasijaj raniej, praduhledžvaje ŭzajemnuju vajennuju dapamohu. Apošnim časam źjavilisia paviedamleńni ab tym, što Paŭnočnaja Kareja nakiravała ŭ Rasiju sałdat dla ŭdziełu ŭ vajnie suprać Ukrainy. Pakul nie viadoma, ci budzie padobny punkt u dahavory ź Iranam.
U Biełarusi ŭžo niekalki viečaroŭ prablemy ź internetam. Raskazvajem, što adbyvajecca1
Kamientary