Milinkievič: Udziełam ci niaŭdziełam u vybarach my nie vyzvalim palitviaźniaŭ

Kiraŭnik ruchu «Za Svabodu», eks-kandydat u prezydenty Alaksandar Milinkievič braŭ udzieł u Hlabalnym forumie, jaki adbyvajecca hetymi dniami va Ŭrocłavie. Naš karespandent Jury Drakachrust paprasiŭ jaho prakamentavać niekatoryja aktualnyja siužety biełaruskaj i eŭrapiejskaj palityki.

Drakachrust: Jak vy aceńvajecie vyniki vizytu ŭ Biełaruś prezydenta Rasiei Ŭładzimiera Pucina?

Milinkievič: Ja miarkuju, što adbyłosia toje, što ŭ Biełarusi i čakali. Dla Rasiei siońnia, na hetym etapie stvareńnia Eŭrazijskaha sajuzu samaje hałoŭnaje — nablizić Biełaruś, zrabić jaje zaležnaj u ekanamičnaj sfery. I Pucin heta padkreślivaje svaim vizytam. Dla stvareńnia hetaj novaj imperyi bolš važnaja Ŭkraina, ale Ŭkraina siońnia bolš samastojnaja, čym Biełaruś.

Ja miarkuju, što da vosieni buduć žorstka pastaŭlenyja pytańni ab pryvatyzacyi hałoŭnych biełaruskich pramysłovych aktyvaŭ, ab uviadzieńni rasiejskaha rubla, ale na hetych pieramovach byli chutčej «pierniki», čym «bizuny».

Drakachrust: Užo niekalki miesiacaŭ u apazycyi viaducca haračyja sprečki nakont staŭleńnia da vosieńskich parlamenckich vybaraŭ, vakoł dylemy — udzieł ci bajkot? Jakoje staŭleńnie da hetaj dylemy vašaha ruchu i vas asabista?

Milinkievič: Uzrovień hetych sprečak śviedčyć pra stan apazycyi.

Sprečki iduć ab tym, što absalutna niecikava ludziam. Ludzi žyvuć absalutna inšym žyćciom, navat zacikaŭlenyja palityčnymi prablemami.

My ŭsie nie pryznajom hetyja vybary, jany nia buduć ni lehitymnymi, ni svabodnymi, nichto ich nie pryznaje. Udzieł ci bajkot nia zrobić ich dla Zachadu lehitymnymi. Heta pa-pieršaje. Pa-druhoje, sacyjalahičnyja apytańni siońnia pakazvajuć, što tolki 10% nasielnictva źbirajucca siońnia nie pajści na vybary.

Bolšaść pryjdzie na vybary. Apazycyja nie takaja ŭpłyvovaja siońnia, kab jaje pasłuchali. I apošniaje — ŭ hramadztvie niama staŭleńnia da hetych vybaraŭ jak da padziei, jakaja vyrašaje los ich siamji i krainy.

Apazycyja nie sfarmulavała, jakuju metu jana choča dasiahnuć. Kali stavić na mecie pavialičyć svoj upłyŭ, źmianić mentalitet ludziej, spryjać pašyreńniu praeŭrapiejskich nastrojaŭ, pakazać alternatyvu — što jość prystojnyja ludzi, jakim možna davieryć uładu, tady, zrazumieła, treba ŭdzielničać. Inšaja sprava — da kanca ci nie da kanca, treba ci nia treba zdymać kandydatury, ale ja liču, što ŭdziełam ci niaŭdziełam my nia vyzvalim palitviaźniaŭ, ich vyzvalaje ŭpłyŭ inšych čyńnikaŭ. I padychod, što my zapeckajemsia pachodam na vybary — ja ź im niazhodny.

Treba vykarystoŭvać kožnuju mahčymaść. Vybary nia tak časta byvajuć. Tamu ja liču, što abmiežavany ŭdzieł — heta absalutna słušny padychod.

Drakachrust: Jak vy staviciesia da inicyjatyvy palityčnaha emihranta Ŭładzimiera Baradača nakont stvareńnia rady nacyjanalnaha adradžeńnia, u miežach jakoj miarkujecca ŭtvaryć pierachodny ŭrad?

Milinkievič: Pačnu z taho samaha pytańnia — jakaja meta?

Pazbavicca ad kedebistaŭ u apazycyi, pastroić usich, vypracavać adnu liniju i zrabić adnaho lidera? Hetyja mety adnaznačna nia buduć dasiahnutyja. Heta jašče bolš pasvaryć apazycyju, jak pasvaryła jaje dyskusija nakont bajkotu i ŭdziełu. Heta jašče bolš addalić apazycyju ad ludziej.

Kali ludziej spytać — ci chočacie vy, kab źjaviŭsia niejki ŭrad, jaki budzie dbać pra vas, dyk śmiajacca ž buduć. Kali my chočam upłyvać na ludziej, dyk treba aperavać niejkimi zrazumiełymi dla ich katehoryjami. Tut my nia možam urad stvaryć pa šmat jakich pryčynach, u tym liku i abjektyŭnych. Mnohija ludzi, jakija pracujuć u ciapierašnim uradzie, buduć i ŭ budučym. Ale kali my ich nazaviem, to jany i siońnia nia buduć pracavać.

Kali my ŭžo źbirajemsia rabić urad, to treba tudy vyłučać ludziej, kab ludzi skazali pra ich — my takich uradoŭcaŭ chočam. A kali samazvancy sami siabie pryznačać — ja dumaju, što heta nia budzie karysna ni apazycyi, ni ludziam.

Drakachrust: My z vami biarem udzieł u hlabalnym forumie va Ŭrocłavie. Jon moža i nie pradstaŭlaje saboj pazycyi ŭsiaho Zachadu, ale što vy možacie skazać, nakolki Eŭropa, Zachad ciapier zacikaŭlenyja Biełaruśsiu?

Milinkievič: Našy partnery ŭ demakratyčnych krainach mocna stomlenyja. Stomlenyja Łukašenkam, na jakoha nie ŭpłyvajuć ni bajkot, ni sankcyi, u Eŭropy niama instrumentaŭ, kab pamianiać sytuacyju.

Stomlenyja apazycyjaj, jakaja pasvaranaja, padzielenaja, jakaja dyskutuje pa pytańniach, jakija nie takija važnyja dla losu krainy.

Varta skazać, što instrumenty ŭździejańnia na sytuacyju siońnia jość tolki ŭ Rasiei, ni ŭ apazycyi, ni ŭ Eŭropy, ni ŭ ZŠA sposabaŭ uździejańnia niama. Nu i ekanomika. Ekanamičny kryzis moža paskoryć pracesy, ale nieviadoma, ci pazytyŭnyja jany buduć. Naprykład, abvalny kryzis pryviadzie da taho, što Rasieja lohka kupić toje, što tak doŭha nia moža atrymać u Biełarusi.

• 0
• 0
• 0
• 0
• 0
• 0
• 0
• 0