Pa vizu tolki praz telefon

Z 1 červienia 2007 hoda pasolstva Litvy ŭ Minsku pa prośbach naviednikaŭ ažyćciaŭlaje papiaredni zapis na atrymańnie vizy tolki pa telefonie.

Jak paviedamlaje litoŭskaje pasolstva, luby, chto pažadaje, moža patelefanavać u konsulskuju słužbu ŭ paniadziełak‑čaćvier z 10.00 da 13.00 pa telefonach +375‑29‑555‑33‑67 abo +375‑29‑555‑20‑67 i, nazvaŭšy svajo proźvišča i numar pašparta, zapisacca dla padačy dakumientaŭ na vizu.

Pry hetym, jak zaznačajuć u konsulskaj słužbie, dla tych, chto vyjazdžaje ŭ Litvu ŭ słužbovych metach, paradak nie źmianiŭsia, tamu što ŭsie prośby, atrymanyja vizavym adździełam ad arhanizacyj i pradpryjemstvaŭ svoječasova, zadavalniajucca poŭnaściu.

U pasolstvie taksama nahadvajuć, što biez abmiežavańniaŭ i papiaredniaha zapisu štodzionna pa vizavych pytańniach u konsulskuju słužbu mohuć źviartacca biełarusy, jakija dasiahnuli 65 hadoŭ, hramadzianie Kalininhradskaj vobłaści, Litvy i asoby, jakija majuć paśviedčańni ab zachavańni litoŭskaha hramadzianstva, pradstaŭniki Biełaruskaj čyhunki, hramadzianie, jakim patrabujecca viza typu «D», studenty Jeŭrapiejskaha humanitarnaha univiersiteta, pradstaŭniki akredytavanych u Biełarusi zamiežnych pasolstvaŭ i pradstaŭnictvaŭ.

Papiaredni zapis u pasolstvie Litvy viadziecca ź listapada 2006 hoda. Štodzionna, pavodle infarmacyi pasolstva, vydajecca bolš za 400‑500 litoŭskich viz. Pry hetym niaredkija vypadki, kali hramadzianie, jakija zapisalisia zahadzia, nie prychodziać, abo turystyčnyja firmy prynosiać mienšuju, čym było zadekłaravana, kolkaść pašpartoŭ, nie papiaredziŭšy ab hetym. Uźnikaje situacyja, kali da kanca pryjomu dakumientaŭ na vizy zastajecca čas, u jaki źjaŭlajecca mahčymaść pryniać pa‑za čarhoj tych, chto pryjšoŭ na zapis. Adnak čaściej za ŭsio takich nie znachodzicca, zaznačajuć u pasolstvie, bo ludzi akazvajucca nie hatovyja adrazu padać dakumienty.

U suviazi z hetym pasolstva zalikaje hramadzian, jakija prychodziać na papiaredni zapis, mieć pry sabie padrychtavany pakiet dakumientaŭ. Da prykładu, dla afarmleńnia vizy biez zaprašeńnia ź litoŭskaha boku dla adnarazovaj pajezdki terminam da 30 dzion treba akramia vizavaj ankiety, fotazdymka, konsulskaha zboru ŭ 5 jeŭra taksama pradstaŭlać strachavy polis na čas znachodžańnia ŭ Litvie i paćvierdzić najaŭnaść finansavych srodkaŭ z raźliku 40 jeŭra na dzień (u formie padpisanych darožnych čekaŭ i ich kopij abo daviedki z banka ab najaŭnaści hrošaj, vypiski z kredytnaj kartki).

Jak paviedamlaje litoŭskaje dyppradstaŭnictva, da kanca letniaha siezona płanujecca zakončyć budaŭničyja raboty pa pašyreńni konsulskaha adździeła, što dazvolić pavialičyć jaho prapusknuju zdolnaść.

• 0
• 0
• 0
• 0
• 0
• 0
• 0
• 0