Naviny
Małady Front pieraabraŭ Sieviarynca
MF usio ž akazaŭsia pad pahrozaj raskołu: na Sojmie staršyniom pieraabrali Paŭła Sieviarynca (106 hałasoŭ proci 45 za Alaksieja Šydłoŭskaha). Sieviaryniec prapanavaŭ sabie ŭ namieśniki Jaŭhiena Skočku (sport), Alaksieja Čarniajeva (suviaź z hramadzkimi arhanizacyjami), Alaksieja Šeina (presa), Natallu Makovik (zamiežža), rehijanalnych lideraŭ Sieržuka Bachuna (Bieraście), Andreja Mialešku (Horadnia) i Andrusia Kavalova (Mahiloŭ), a taksama prapanavaŭ «apazycyi» vyłučyć adnaho z namieśnikaŭ sa svaich šerahaŭ. Taja nie pahadziłasia z takoj mizernaj kvotaj, maŭlaŭ, Šydłoŭski sabraŭ 30% hałasoŭ, i vyjšła z zali — što było chutčej reakcyjaj na kryŭdnuju parazu.
Pavał Sieviaryniec abiacaje zrabić usio, kab raskołu nie adbyłosia, ale pakul sa sp.Šydłoŭskim nie sustrakaŭsia. Kiraŭnictva BNF, kab nie zhubić častku moładzi, prapanavała dysydentam utvaryć mocnuju maładziovuju frakcyju ŭ składzie niepasredna BNF.
Tady jak Małady Front staje bolš samastojnym i, jak možna mierkavać pa delehatach, pieratvarajecca z kamsamolskaj u pijanerskuju arhanizacyju, a starejšyja siabry MF vidavočna abyjakavyja da jaje losu — tolki 151 z 189 delehataŭ dali sabie kłopatu prahałasavać, niahledziačy na ŭsie dyskusii, što razharelisia na źjeździe.
B.T.
Kamunisty ŭ dabračynnych stałoŭkach
Barysaŭskaje habrejskaje tavarystva «Śviatło Menory» ad červienia pačało arhanizoŭvać biaspłatnyja štodzionnyja abiedy pry stałoŭcy, što na centralnym praspekcie Revalucyi, dzie charčujucca z paŭsotni hałodnych barysaŭcaŭ. Stałymi spažyŭ-cami darmovaha charču źjaŭlajucca nia tolki ludzi, što načujuć u kanalizacyjach i sutareńniach, ale j zvyčajnyja veterany vajny j pracy. Niekatoryja ź ich dahetul nosiać znački kštałtu «Udarnik kamunistyčnaje pracy». Hady ŭdarnaje kamunistyč-naje pracy pryviali da adnoha vyniku — poŭnaje halečy j zaniadbanaści.
Vital Kraŭcevič, Barysaŭ
Krajoŭcy syšli ŭ les
25 červienia ŭ Červieni (Ihumienie) adbyłosia ŭšanavańnie pamiaci achviaraŭ stalinskich represijaŭ. Asobnaj kalonaj pryjšli na cyrymoniju kala 10 čałaviek z arhanizacyi «Kraj», jakich možna było paznać pa bieł-čyrvona-biełych ściahach ź dźviuma čornymi stužkami. Miascovaja milicyja i KHB nia zdoleli ich zatrymać, vyklikali jašče amonaŭcaŭ ź Miensku, ale krajoŭcy paśpieli schavacca ŭ lesie i źnikli. Krajoŭcy ŭdzielničali taksama ŭ niadaŭnim ušanavańni pamiaci rasstralanych savietami viaźniaŭ miadzielskaj turmy.
Čorny Vojna
Hryb patrabuje biełaruskaha sudu
Jan Hryb, jaki byŭ zatrymany 19 traŭnia kala harsudu ŭ Miensku pad čas abviaščeńnia prysudu M.Čyhiru, ad sudździ Viktoryi Ściapanavaj zapatrabavaŭ, kab jana viała sud pa-biełarusku. Sudździa padumała-padumała i sapraŭdy pieraniesła praces na 4 lipienia i paabiacała zabiaśpiečyć pierakładčyka. Siońnia sud pakaža, ci paŭpłyvaje heta na vynik.
B.T.
Prajaždžaje Fiłaret
Jašče adnym farpostam rasiejskaha pravasłaŭja paboleła na Barysaŭščynie. 24 červienia była aśviečanaja Spasa-Praabraženskaja carkva ŭ vioscy Vialacičy. Aśviaciŭ bažnicu sam Fiłaret, jakoha, nie raŭnujučy Łukašenku, z kvietkami sustrakali staršynia Barysaŭskaha rajvykankamu z namieśnicaj, dyrektary miascovaha saŭhasu j siaredniaj škoły. Aprača taho, ekzarch padaravaŭ carkvie abraz i ahałosiŭ svoj nakaz z daručeńniem baciušku Chviedaru Čarniakovu «abkarmlać» jašče j prychadžanaŭ Śviata-Ŭśpienskaje carkvy susiedniaj vioski Zoryčy, što da kamunistaŭ nazyvałasia Smorki. Prašpacyravaŭšy pa alei hierojaŭ i hanarovych hramadzianaŭ vioski, zazirnuŭšy ŭ tutejšy muzej i pažadaŭšy mnohija leta ludu, Fiłaret źjechaŭ u Miensk.
Lavon Ihnatovič, Barysaŭ
Na Połaččynie — šaściznačnyja numary
Z 1 lipienia ŭ numaroch telefonaŭ u Połacku j Navapołacku budzie 6 ličbaŭ. Pierad navapołackimi numarami treba nabirać dadatkovuju «piaciorku», a pierad połackimi — «čaćvierku». Źmianilisia j mižharodnija telefonnyja kody hetych haradoŭ. Kab datelefanavacca, paśla «vaśmiorki» tre budzie nabirać 0214 i dadavać 6-značny numar.
Medalistaŭ šmat, biełarusaŭ vobmal
811 navapołackich junakoŭ i dziaŭčat skončyli sioleta siaredniuju škołu. Siarod vypusknikoŭ až 62 medalisty (letaś było 75). Bolš za pałovu medaloŭ pa tradycyi «adchapili» navučency liceju pry Połackim dziaržaŭnym universytecie — 7 załatych i 25 srebnych.
Apošnija hady 60% vychavancaŭ navapołackich siarednich škoł pastupajuć uva ŭniversytety Biełarusi ci zamiežža (siaredniaja ž ličba na Viciebščynie — tolki 35%).
A ŭ vieraśni ŭ 15 škoł horadu pryjduć kala tysiačy šaścihodkaŭ. Z 50 pieršych klasaŭ u nastupnym navučalnym hodzie tolki adzin budzie biełaruskamoŭny. I toje, kali dastatkovaja kolkaść baćkoŭ navažycca padać adpaviednyja zajavy. Nahadajem, što pavodle apošniaha pierapisu 23% žycharoŭ Navapołacku ličać siabie rasiejcami pa nacyjanalnaści. Heta nasieleny punkt z samaj vialikaj u vobłaści adnosnaj kolkaściu rasiejcaŭ.
Andrej Alaksandraŭ, Połacak
Zatrymali na feście za nacyjanalny ściah
24 červienia na histaryčnym festyvali ŭ Navahradku miascovaja milicyja zatrymała troch haściej ź Bieraścia, što razmachvali bieł-čyrvona-biełym ściaham — Sieržuka Bachuna, Bazyla Andrasiuka i Jurasia Šulhana. Supracoŭniki milicyi śćviardžali, što bieł-čyrvona-bieły ściah zabaronieny. Ale chłopcy milicyjantaŭ pierakanali, što nikim naš štandar nie zabaronieny.
B.T.
Kamientary